1 Zuwa dimwenga, Naomi amgambaga Luti. "Naungigwa nikuzunguile mgosi vileke akulele. 2 Haluse yudya Boazi, uyo udamanye ndima hamwenga na wavuni wakwe we kivele ni wa lukolo lwetu, haluse tegeleza, kisingi iki naande aheta shaili. 3 kwaivo uhake mazi na mavuta uvale suke zako zedi niyo uite kudya ukuhetela ngano mna kaula usekukelagisa kwakwe mpaka aho naabindile kudya no kunywa. 4 Iviya iviya uhamanye hant'hu aho akuunga agone, anagona du ita mp'halahole gubula mgolole niyo ugona aho. Yehe naakugambile dyo kudamanya."

5 Luti niyo amhitula, "Nenidamanye yose ayo unigambile."

6 Kwa ivo Luti aitaga hadya ho kuhetela shayili, niyo adamanya enga viya asigilwe na nine vyala. 7 Boazi eze abinde kudya na kunywa, niyo asangalala. Niyo aita hagihi na idya shayili niyo agona. Luti aitaga mp'halahole niyo agubula mgolole wakwe na kugona aho. 8 Ize ibule kilo gati, Boazi niyo asetuka, niyo ahituka, ehelwagwa eze aone mvele kagona mwe viga vakwe. 9 Niyo auza, "Weye ni we ani?"

Luti niyo amhitula, "Mkulu, ni miye Luti, mndima ywako. Kwaviya weye ywi ndugu ywangu ywa hagihi, nilombe miye mtumwa ywako."

10 Boazi niyo agamba, "Zumbe naakuvike, kwaviya yadya yose udamanye kulagisa wogohi utendese kujinka yadya udamanye aho nk'hongo, kwaviya hukuwazungula wabwanga wakiwa hegu wagoli uleke wakulombe. 11 Haluse mwanangu usekogoha, nenikudamanyile dyodyose ukulombeza kwaviya kila mnt'hu mo mzi uno kamanya uwedi wako ivo wili. 12 Ni kindedi kugamba miye ni ndugu ywako ywa hagihi naho yaungwa hulele mna eyuko mnt'hu andile hagihi kujink'ha hata miye. 13 Kwaivo ikala aha nekilo iki chose, luvi mtondo nekione uneva naaunge akulele hegu bule. Uneva anaunga kwikala na weye ni vedi. Analemela, kwa zina dya Zumbe Mnungu mta ugima, miye nenikukombole. Gona aha mpaka luvi mtondo."

14 Ivo Luti niyo agona hadya mpaka mtondo, mna ize ibule mtondo niyo akelauka vileke asekuoneka, kwaviya Boazi hakuunga mnt'hu yeyose amanye kugamba hant'hu hadya nahanda na mvele. 15 Boazi niyo amgamba, "Tandika digunya dyako hasi". Luti niyo atenda ivo. Boazi niyo akupula shayili debe dimwenga na vihimo vishano niyo amtwika, Luti niyo auya ko mzi. 16 Eze abule ko mzi, nine vyala niyo amuza, "Togola mwanangu?"

Luti niyo amgambila nine vyala yadya yose Boazi amtendele. 17 Luti niyo agendeela kulonga, "Kanigamba nisekuuya kaya kwa mame vyala hiina kint'hu chochose niyo anikupuila debe dimwenga na vihimo vishano va shayili."

18 Naomi niyo agamba, "Haluse tondowala mwanangu, mpaka aho nouone idyo dikuunga dilaile. Boazi dyelo heekale mpaka aho eze aone kabinda yose."