1 Kwandaga na mnt'hu yumwenga mwiihi uko Giligali etangwagwa Sheba mwana Bikili ywo lukolo lwa Benjamini. Ivo Sheba niyo atoa gunda akagamba, "Hakihamwenga naye uyo Daudi mwana Yese. Nyuwe want'hu wa Izilaeli, kila yumwenga naafunganye mwe dihema dyakwe!" 2 Ivo want'hu wose wa Izilaeli niyo wamleka Daudi na kumtimila Sheba mwana Bikili. Mna want'hu wa Yuda wamtimilaga seuta Daudi kwa uhuwilwa kulawa mto Yolodani mpaka mwo mzi wa Yelusalemu.

3 Ivo niyo Daudi engila kwe kaya yakwe mwo mzi wa Yelusalemu. Seuta awaguhaga wawele wakwe mlongo awo awalekaga wakaule inyumba yakwe, na kuwaika mwe nyumba imwenga mwo wamizi, awalelaga vedi, mna hagonaga nawo. Naivo wavele awo wekalaga mwe nyumba mpaka mwe dizuwa dyo kubanika kwawe, wekalaga enga wavele wafiilwe ni wagosi zawe.

4 Akajika seuta Daudi niyo amgamba Amasa, "Niduganyile watowani wose wa Yuda kwa lupisi lwa mazuwa matatu, na weye mwenye unde aaho." 5 Ivo Amasa uyo andaga mkulu ywa watowani hant'hu ha Yoabu, agendaga kuwetanga watowani wa Yuda. Mna niyo hasunguze kuuya mwo lupisi ludya aikilwe ni seuta. 6 Daudi niyo amgamba Abishai, "Haluse Sheba mwana Bikili, naakigaile masulumizo kujink'ha yadya ya Abisalomu. Guha watowani wangu naho mumtimile sema anengile mwe mizi ina gomela niyo anyilika kisekumuona naho." 7 Abishai niyo afosa hamwenga na Yoabu, Want'hu we dikabila dya Keleti na we dikabila dya Peleti hamwenga na watowani wadahi wose. Awo wose nawahalawa Yelusalemu na kumtimila Sheba mwana Bikili. 8 Weze wabule mwe diiwe dikulu idyo dili uko Gibeoni, Amasa afosaga awasingile. Yoabu andaga kavala valo dya nk'hondo, na mwe divalo idyo nokunda na msipi utozile isime mwe kigudi chakwe ukanda mwe yala yakwe. Yoabu eze abule hagihi, sime yakwe yatomokaga hasi. 9 Yoabu niyo amgamba Amasa, "Togola wivihi ndugu yangu?" Yoabu niyo amtoza Amasa vileke amlamse kwa kumnonela. 10 Mna Amasa haone sime yandile mwo mkono wa Yoabu. Yoabu niyo amjunga Amasa mwe zinda, utumbo wakwe niyo wafosa kuse niyo abanika. Yoabu havuzagize kumjunga.

Niyo Yoabu na nduguye Abishai wagendeela kumbasa Sheba mwana Bikili. 11 Mnt'hu yumwenga ywa Yoabu ezaga hagihi ne kimba cha Amasa, akagamba, "Yeyose akumuunga Yoabu na yeyose akumuunga Daudi, amtimile Yoabu!" 12 Amasa andaga kalambala mwe sakame yakwe mgati mwe sila ink'hulu. Mna want'hu wombokaga aaho, weze wamuone Amasa wakimalaga, mna yudya mnt'hu eze aone wose weza kukimala aaho, akigalaga ikimba icho kwo mgunda na kukigubika ne suke. 13 Amasa eze ahauswe mwe sila nk'hulu, watowani wose wagendeelaga kumtimila Yoabu na Sheba mwana Bikili.

14 Sheba ombokaga mgatigati mwa makabila yose ya Izilaeli mpaka mwo mzi wa Abeli Beti Maaka. Watowani wose wa lukolo lwa Bikili waduganaga na kumtimila. 15 Watowani wose wandaga hamwenga na Yoabu wagendaga kuuzunguluka mzi wa Sheba uwo wa Abeli Beti Maaka. Wautemangizaga mzi uwo kwa kuika vifyo va watowani, niyo wakonga kumola lukandula. 16 Niyo mvele mtuhu mta umanyi evigwagwa akagamba, "Tegelezeni! Tegelezeni! Mgambeni Yoabu eze nilonge naye." 17 Yoabu niyo aita hagihi naye, uyo mvele niyo amgamba, "Togola ni weye Yoabu?"

Yoabu niyo amhitula, "Heiye ni miye."

Yudya mvele niyo amgamba "Nitegeleze miye mndima ywako."

Yoabu niyo amgamba "Nakutegeleza,"

18 Uyo mvele niyo amgamba, "Aho kale want'hu wandaga wakagamba, ‘Iteni mkazungule ulangilizi kulawa mwo mzi wa Abeli.’ Nivo want'hu wadahaga kulamula masa yawe. 19 Miye ni yumwenga mwa wadya wakuunga utondowazi na uhuwilwa mwe Izilaeli. Nii wageza kuubananga mzi uwo wili enga nine dya Iziaeli? Nii waunga uubanange mzi wa Zumbe Mnungu?"

20 Yoabu niyo amhitula, "Bule." "Mwo wikazi wangu hyaungile niubanange hegu kuumola pele. 21 Ivo ulongile hiyo kindedi! Mna eyuko mnt'hu yumwenga kulawa kwe isi ye vigulu va Ifulaimu zuna dyakwe Sheba mwana Bikili, aunga asaguke kwa seuta Daudi. Nink'heni mnt'hu uyo name nenihalawe mwo mzi wenyu." Yudya mvele niyo amgamba Yoabu,

"Mtwi wakwe neni uduule kombokela mwo lukandula." 22 Niyo yudya mvele mwo ubala wakwe aitaga kwa want'hu wose akawalangilize. Woho nawo wamkant'haga Sheba umtwi wakwe na kuuduula kuse ya Yoabu. Ivo Yoabu atowaga gunda, na kuwausa want'hu wakwe mwo mzi uwo wa Abeli, kila yumwenga akeitilaga kwe kaya yakwe. Yoabu naye niyo auya kwa seuta uko Yelusalemu.

23 Yoabu andaga mkulu ywe difyo dyose dya watowani wa Izilaeli. Beneya mwana Yehoyada andaga mkulu ywa Wakeleti na Wapeleti awo wandaga wamizi wakwe. 24 Adolamu andaga mkimalizi ywe zindima zo kutigizwa, Yehoshafati andaga niye naaka wandika zink'humbukila. 25 Shausha andaga mwandisi, Sadoki na Abiatali nawo wandaga walavant'hambiko, 26 Ila naye kulawa Yaili andaga mlavant'hambiko ywa Daudi.