1 Mwo lupisi lutuhu nokulaila gumbo itendese mwo useuta wa Daudi. Sala iyo neinda ya miyaka mitatu. Daudi amlombezaga Mnungu, Zumbe Mnungu naye niyo amgamba, "Sauli na want'hu wakwe wana masa ya ukomi kwaviya wawakomaga Wagibeoni."

2 Ivo seuta Daudi niyo awetanga Wagibeoni na kulonga nawo. Wagibioni awa hawandaga Waizilaeli, mna wandaga ni Waamoli wasigalaga. Izilaeli waikaga kilapi kuwaleka kunda wagima, mna Sauli agezaga kuwakoma wose kwaviya andaga akawaungisa Waizilaeli na want'hu wa Yuda. 3 Daudi niyo awauza Wagibeoni, "Niwadamanyilei? Nenilihize vivihi kwa uwihi mdamanyilwe niho muwavikile isi na want'hu wa Zumbe Mnungu?"

4 Wagibeoni niyo wamgamba, "Nk'humbizi yetu suwe na Sauli ne mp'huga yakwe hakikuunga kulihigwa masawa hegu zahabu, hegu kukome mnt'hu yeyose mwe isi ya Izilaeli." Seuta niyo awauza naho,

"Haluse mwaunga niwadamanyileni mbwai?"

5 Woho niyo wamgamba seuta, "Sauli nakaunga kukikoma suwe asekusigaza hata mnt'hu yumwenga mwe isi yose ya Izilaeli. 6 Ivo, kink'he want'hu mfungate mwa welekwa wakwe we kilume, naswe kiwanyogotole ha Zumbe Mnungu mwo mnima wa Gibea, kwo mzi wa Sauli seuta asagulwe ni Zumbe Mnungu." Seuta niyo awagamba,

"Neniwenk'hize want'hu awo kwenyu."

7 Mna seuta amhonyaga Mefibosheti mwana Yonasani kwajili ya kilapi icho Daudi na Yonasani mwana Sauli waikilanaga ha Zumbe Mnungu. 8 Mna seuta awaguhaga wana waidi awo Lisipa mwana kike ywa Ahiya amwelekele Sauli, Amoni na Mefibosheti, hamwenga na wana wose wa kilume wa Mikali, mwana kike ywa Sauli uyo amwelekele Aduleli mwana Bazilai ywe dikabila dya Wameholati. 9 Daudi awenk'hizaga kwa Wagibeoni, awo welekwa we kilume mfungate, Wagibioni nawo wawahwelezaga want'hu awo mwo mnima hant'hu ha kumvika Zumbe Mnungu. Wose mfungate niyo wabanika hamwenga. Want'hu awo wakomagwa mwe nk'hongelo yo uvuni we shaili.

10 Niyo Lisipa mwanakike ywa Ahia aguhaga valo dya gunia, no kuketandikila mwo luwe. Ekalaga aho kukongela mwo uvuni mpaka aho fula yavinyeelaga ivimba. Havilekaga ivimba ivo vibanangwe ni ndege nyika hegu ni makala matuhu nekilo. 11 Daudi eze eve yadya adamanye Lisipa mwanakie ywa Aya, muwele ywa Sauli, 12 agendaga kuguha mavuha ya Sauli na Yonasani mwanawe kulawa mwa wakaya wa Yabeshi Gileadi. Mavuha ayo wayabawaga kulawa mwo lwazo lwa want'hu wose uko Beti Sheani, aho Wafilisiti wamhwelezaga Sauli na Yonasani mwe dizuwa diya Wafilisiti wamkomaga Sauli mwo mnima Giliboa. 13 Ivo, Daudi ayavuza mavuha ya Sauli na Yonasani uyo mwanawe kulawa uko, naho ayaduganyaga mavuha ya wabwanga mfungate awo wahwelezwagwa. 14 Ivo want'hu wa Daudi niyo wayamosela msanga mavuha ya Sauli na Yonasani uyo mwanawe mwe isi ya Benjamini uko Sela mwe kikuta cha Kishi ise dya Sauli. Wadamanyaga kila kint'hu enga ivo seuta agambaga vidamanywe. Yeze yajike ayo, Mnungu awevaga kulombeza kwawe kwajili ye isi yawe.

15 Niyo Wafilisiti watowana nk'hondo na Waizilaeli naho. Daudi naye na watowani wakwe wagendaga kutowana nawo, uko Daudi asokelesaga. 16 Ishibi Benobu, yumwenga mwa welekwa wa mazint'hu, uyo andaga na mjungo wa shaba wandaga wa kilo nt'hatu na nusu, akevalaga sime mp'ya, agambaga naamkome Daudi. 17 Mna Abishai mwana Seluya, agendaga kumwambiza Daudi, Abishai amtowaga yudya Mfilisiti na kumkoma, ivo, watowani wamwikilaga kilapi Daudi wakagamba, "Hekiitanye na weye naho kwe nk'hondo. Weye niwe dikawiilo dyetu hakikuunga kukwaza."

18 Ize yajike nk'hondo iyo, kwalailaga nk'hondo nt'huhu na Wafilisiti uko Gobu. Uko Sibekai Mhushati, amkomaga Safu uyo andaga yumwenga ywa welekwa wa mazint'hu we dikabila dya Lefai.

19 Nokulaila naho nk'hondo na Wafilisiti uko Gobu. Elinani mwana Yaaleo Ligimu uyo Mbetelehemu amkomaga Goliati Mgiti, uwo mjungo wakwe wandaga na mhini mkulu enga mfunda wa lusazi.

20 Niyo naho kwalaila nk'hondo nt'huhu uko Gati. Kwandaga na zint'hu kulu, dyandaga na madole mtandatu mwe kila mkono wakwe na kiga chakwe. Uwazilo wa madole yakwe yose dyandaga na madole milongo miidi na mane. Dyoho nadyo dyandaga mwo welekwa wa mazint'hu ayo. 21 Umwo dyandaga dikawabela Waizilaeli Yonasani mwana ywa Shimei nduguye Daudi adikomaga.

22 Awane awo wandaga welekwa wa mazint'hu uko Gati, awo nawo wakomwagwa ni Daudi hamwenga na watowani wakwe.