1 Mwe nk'hongelo yo mwaka mhya, umwo maseuta wakaita kwe nk'hondo, Daudi amtumaga Yoabu na wakulu wa watowani akanda hamwenga ne difyo dyose dya Waizilaeli. Nawawakoma pele Waamoni na kuuzunguluka mzi wa Laba. Mna Daudi asigalaga Yelusalemu.

2 Zuwa dimwenga kisingi, Daudi enukaga mwo lusazi niyo aita hant'hu ho kuhumuila uko kulanga mwe nyumba ya kiseuta. Umwo andile akagenda genda uko kulanga, aonaga mvele yumwenga ahombweele andaga akahaka mazi. 3 Daudi asigilaga mnt'hu kuuza mvele uyo ni ani. Uyo asigiilwe niyo amgamba mvele uyo ni Betisheba mwana Eliyabu, naho ni mkaza Ulia kulawa mwe dikabila dya Mhiti. 4 Ivo, Daudi niyo asigiila want'hu wamwigale uyo mvele. Betisheba ezaga kwa Daudi, Daudi niyo agenda naye, naho mwo lupisi ulwo mvele uyo niho akukaga kulawa mwa mazuwa yakwe, niyo auya kwakwe. 5 Uyo mvele niyo enula ubovu, naye niyo asigiila mnt'hu kwa Daudi kugamba yehe kapata ubovu.

6 Ivo, Daudi niyo amgamba Yoabu, "Nigaile Ulia we dikabila dya Mhiti kwangu." Yoabu naye niyo amwigala Ulia kwa Daudi. 7 Ulia eze abule kwakwe, Daudi amuuzaga mbuli za Yoabu, na watowani na ivo nk'hondo ikugendeela. 8 Niyo Daudi amgamba Ulia, "Uya kwe kaya yako ukahumule hadodo." Ulia niyo ahalawa mwe kaya ya seuta, naho niyo seuta amwigaila mageleko. 9 Mna Ulia hauyaga kwe kaya yakwe, ivo agonaga hamwenga na wamizi wose wa seuta he nk'hili ye nyumba ya kiseuta. 10 Daudi eze agambilwe kugamba haitaga kwe kaya yakwe, Daudi amuuzaga Ulia, "Weye kulawa nt'hambo, nii hwiitile kwe kaya yako?"

11 Ulia amhitulaga Daudi, "Sanduku dye Ndagano hamwenga na watowani wose wa Izilaeli na Yuda wekala mwe viheha kwe nk'hondo. Mkulu ywangu Yoabu na vilongozi wakulu wose watoaga nk'hambi uko kwe nyika, Togola ni vedi miye niite kaya hadye na kunywa na kugona na mkazangu? Ikindedi hikudaha kudamanya kint'hu enga icho!" 12 Niyo Daudi amgamba Ulia, Haya, ikala dyelo aaha. Ivo Ulia niyo asigala mwo mzi wa Yelusalemu mwe dizuwa idyo. Zuwa ditimile, 13 Daudi amlalikaga Ulia vileke adye nk'hande na kunywa, niyo amtenda Ulia akolwe. Hata ivo, kilo icho Ulia haitaga kwakwe, ivo agonaga hamwenga na wandima wa seuta.

14 Mtondo wakwe, Daudi amwandikilaga baluwa Yoabu niyo amwink'ha Ulia amwigaile. 15 Mwe baluwa iyo Daudi awandikaga ivi, "Mwiike Ulia kulongole, hant'hu ukumanya nk'hondo itendesa, na kumwasa uko niyo weye wauya kunyuma vileke yehe akomigwe." 16 Umwo Yoabu andaga akautemangiza umzi amwikaga Ulia hant'hu amanyaga hana watowani wadahi wa nk'hondo. 17 Fyo dya wank'hondo wa dyafosaga na kuwatowa watowani wa Yoabu, wamwenga mwa wandima wa Daudi, wakomagwa, Ulia kulawa mwe dikabila dya Wahiti naye akomagwa.

18 Niyo, Yoabu egala mbuli zose kwa Daudi akamgambila ivo nk'hondo yandile. 19 Yoabu niyo amsigiila uyo mwigala ulosi akagamba, "Eze ajike kumgambila seuta mbuli zose ze nk'hondo, 20 seuta akanda kaihiwa niyo amuuza, ‘Niii mwiita hagihi no mzi mkatowana? Hamwamanyaga kugamba nawawalaseni ne misale kulawa mwe zikandula zawe? 21 Niani amkomaga Abimeleki mwana ywa Yelubesheti? Hi yudya mvele yumwenga mwo mzi wa Tebesi yudya akink'haga diiwe dya kusagila kulawa mwo lukandula nadyo niyo dyamkoma Abimeleki? Nii elo, mwita hagihi no lukandula?’ Uneva seuta ana kuuza, weye noumgambe, ‘Hata mndima ywako Ulia Mhiti naye kakomwa.’ "

22 Yudya asigiilwe aitaga kwa Daudi niyo amgambila yose agambagwa ni Yoabu ayalonge. 23 Yudya asigiilwe niyo amgamba Daudi, "Wank'hondo wetu wakihuma, wafoselaga kuse yo mizi niyo kukitowa mwe nyika. Hata ivo suwe nekiwagulusa mpaka kwe nk'hili yo mzi. 24 Niyo wakilasa misale wandima wako nawakomigwa. Hata mndima ywako Ulia kulawa mwe dikabila dya Wahiti naye kakomwa."

25 Daudi niyo amgamba yudya asigilwe, "Mgambe Yoabu usekwingila chevu kwaviya nk'hondo haina meso, mna mketogeze kutowana mwo mzi uwo, mpaka muwoke mzi uwo. Nivo noumgele ludole Yoabu."

26 Betisheba mkaza Ulia eze eve kugamba mgosiwe kabanika, amhongezelaga. 27 Lupisi lwa kuhongeza lwize lusile, Daudi asigiilaga Betisheba egalwe kwe nyumba yakwe. Niyo Betisheba anda mkaza Daudi, naye niyo amwelekela Daudi mwana kilume. Mnungu aihiyagwa mwe mbuli iyo atendile Daudi.