1 Nokunda na nk'hondo ya lupisi lutali mwa want'hu wawazumile Sauli, na wadya wamzumile Daudi. Mna Daudi ongezekelaga ludole, na want'hu wa Sauli wagendeelaga kusokela.

2 Wana kilume welekagwa na Daudi uko Hebuloni wandaga ni Amoni nt'hula sasu ywakwe, nine andaga Ahinoamu kulawa Yezileeli, 3 Kileabu mwanawe ywa kaidi, nine andaga Abigaili afiilwe ni mgosi uyo Nabali kulawa Kalimeli, Abisalomu mwanawe ywa katatu, nine andaga Maaka mwanawe ywe kike Talimai, seuta ywa Geshuli. 4 Adoniya mwanawe ywa kane, nine andaga ni Hagiti, Shefatia mwanawe ywa shano, nine andaga ni Abitali, 5 na Iteleamu mwanawe ywa mtandatu, nine andaga Egila, mkaziwe Daudi. Wakaziwe Daudi nawamwelekela wana awo wose akanda uko Hebuloni.

6 Mwo kugendeela ink'hondo watowani wa Daudi na wa Sauli, Abineli nakatendesa kunda na ludole mwa watowani wa Sauli.

7 Sauli nakanda na muwele yumwenga etangwagwa Lisipa, mwana Aya, lupisi lumwenga, Ishibosheti niyo amuuza Abineli, "Nii ukagona na muwele ywa Tate?" 8 Abineli nakanda na maya vitendese kwajili yo ulosi wa Ishiboleti, akagamba, "Togola, wagamba miye nadaha kumhituka Sauli? Togola kumanya kugamba miye ni mhuwilwa mwe mp'huga ya Yuda? Kaula, miye hinda mnt'hu ywedi kwa iso Sauli na wanduguze na wambwiyaze naho hikuikile mwo udahi wa Daudi mpaka dyelo. Mna, dyelo ivi waniona kunda na masa kwa ajili ya mvele uyu. 9 Mnungu anikome uneva hinadamanye yose Mnungu amlagane Daudi." 10 Mnungu nakamsigiila Daudi kugamba nausamize useuta kulawa mwe mp'huga ya Sauli na kumwinka yehe. Naye nawalongoze Izilaeli na Yuda kulawa Dani mpaka Beelisheba. 11 Ishibosheti hakadaha kulonga ulosi, kwaviya nakanda akamuogoha Abineli.

12 Ivo, Abineli niyo awatuma want'hu kwa Daudi, uko Hebuloni wakamgambile, "Togola, isi ino ni ani nailongoze? Damanya Ndagano na miye, na miye nohwambize Izilaeli yose inde yako."

13 Daudi niyo agamba, "Vedi, nenidamanye Ndagano na weye, mna nina mbuli imwenga kulawa kwako, nayo ni ino, usekwiza kwangu mpaka unigaile Mikali mwana kike wa Sauli, niho noudahe kwiza kwangu." 14 Ivo Daudi niyo atuma want'hu kwa Ishibosheti, mwana wa Sauli, akagamba nivuzile mkazangu Mikali, uyo namlombaga kwa machupu gana ya Wafilisiti. 15 Ivo Ishibosheti kasigiila want'hu wakamguhe Mikali kulawa kwa mgosiwe Pateli, mwana Laishi. 16 Uyo mgosiwe niyo atongelana nae, akagendela kuwila, akamtimila mpaka Bahulimu. Niho Abineli akamgamba, "Heye, uya." Naye niyo auya.

17 Abineli agendaga kusimuila na wadala wa Izilaeli, akawagamba, "Kwa lupisi lwomboke mnda mkamuunga Daudi ande seuta ywenyu. 18 Haluse, leteni mbuli iyo mwe kiyeti kwaviya Zumbe nakamsigiila ivi Daudi, ‘Nohwink'he udahi mndima ywangu, uwakombole want'hu wangu wa Izilaeli kulawa mwa Wafilisiti na kulawa mwa wank'hondo wako watuhu.’ " 19 Abineli niyo asimwiila na want'hu we dikabila dya Benjamini, no kuita mpaka Hebuloni niyo wamgambila Daudi yadya want'hu wose wa Izilaeli na kabila dyose dya Benjamini ivo waivane wadamanye.

20 Abineli eze amwitile Daudi akanda na want'hu milongo miidi, Daudi nawa sank'hanilaga ludyo. 21 Abineli niyo amgambila Daudi, "Miye haluse neniite na kukuletela want'hu wose wa Izilaeli, weye Zumbe ywangu. Naweze wadamanya Ndagano na weye, vileke unde Zumbe ywawe, na weye nouwalongoze wose enga ivo ukuunga." Daudi niyo amlaga Abineli akeitile naye niyo aita kwa utondowazi.

22 Akajika aho wandima wa Daudi hamwenga na Yoabu nawauya kulawa kwo kutoana naho wauyaga na vitahigwe vibindile wingi. Mna Abineli handile hamwenga na Daudi uko Hebuloni kwaviya Daudi nakamleka akeitile, naye niyo aita kwa utondowazi. 23 Yoabu eze auye hamwenga na watowani wakwe wose endile nao, nakagambilwa kugamba Abineli mwana Neli, ezaga kumsinya seuta Daudi, yehe naye niyo amlaga akeitile, naye niyo aita kwa utondowazi. 24 Yoabu nakamwitila seuta na kumgambila, "Haluse kudamanya mbwai? Kaula Abineli nekeza kwako, ni mbwai kumleka aite? 25 Togola, kumanya kugamba Abineli mwana wa Neli keza kukudantiliza? Keza kupelemba amanye ludole na lugendo lwako na yadya ukudamanya!"

26 Yoabu eze alawe kusimwiila na Daudi, nakawatuma want'hu wamlete Abineli, na woho niyo wabwiila mwe disima dya Sila. Mna Daudi hamanyize mbuli iyo. 27 Abineli eze auye kulawa Hebuloni, Yoabu amguhaga niyo amwingiza kwe chumba kugamba enga aunga kusimwiila naye kwa kinyele. Aho Yoabu niyo amtunga Abineli mwe zinda kwaviya Abineli nakanda kamkoma Asaheli nduguye, naye niyo abanika. 28 Kubula aho Daudi eze eve mbuli izo niyo agamba, "Miye na useuta wangu hekinde na masa ha Zumbe Mnungu mwe file ya Abineli mwana Neli. 29 Masa ayo ya ukomi nayande ya Yoabu na mp'huga yose ya Ise! Mp'huga ya Yoabu mazuwa yose nokunde na mnt'hu mta unyonge wa kisonono, hegu unyonge wa matana, hegu kugenda kwa makome hegu kukomigwa kwa sime, hegu mta gumbo!" 30 Yoabu na nduguye Abishai nawamkoma Abineli kwaviya nawamkoma nduguye Asaheli lupisi lwa nk'hondo uko Gibeoni.

31 Niho, seuta Daudi amgamba Yoabu na wadya wose wendile hamwenga naye, tatuleni zisuke zenyu naho mvale magunia vileke mumhongezele Abineli. mwo lupisi lwa kummosela msanga, seuta Daudi nakagendela kunyuma ye dijeneza. 32 Abineli nakamoswa msanga uko Hebuloni na seuta naye nakahongeza kwa izwi akanda hagihi ye dijeneza, naho want'hu watuhu wailaga. 33 Seuta niyo amhongeza Abineli akagamba, "Neinda vivihi Abineli abanike enga mhezi?

34 Mikono yako haikakilizwe.

Viga vako havigeligwe mnyololo.

Kabanika enga mnt'hu akomigwe na waihi!"

Want'hu wose niyo wamwiila naho.

35 Niyo, want'hu wose wagenda kudindiliza Daudi adye nk'hande kukei mtondo. Mna Daudi nakaika kilapi, akawagamba, "Mnungu naanikome uneva nenidye mkate hegu kint'hu chochose mpaka kisingi!" 36 Want'hu waone mbuli izo, woho nawo welelwa, kwa kila kint'hu kidamanywe ni seuta ivo kiwawagile. 37 Ivo, zuwa diya, Waizilaeli wose nawamanya kugamba hayendile ivo seuta Daudi kumkoma Abineli mwana wa Neli. 38 Seuta Daudi nakawagambila wandima wakwe, "Togoleni, hammanyize kugamba kilongozi mkulu kabanika mwe Izilaeli? 39 Hamwenga na kugamba mnikumba mavuta vileke ninde seuta, mna dyelo miye hina ludole. Awa wana wa Seluya ni wakomi vitendese. Zumbe Mnungu awasulumize want'hu awa vikuligana no uwihi wawe!"