1 Akajika ayo, Ahitofeli amgambaga Abisalomu, "Nilekele nisagule want'hu alufu mlongo na waidi nihalawe nawo nimbase Daudi kilo cha dyelo. 2 Nenimtowe akanda kasokela na kwingila chevu, naho miye neni mtise. Want'hu wose ana nawo nawanyilike. Nenimkome seuta yehe ekedu, 3 na kuwavuza want'hu wose kwako enga mta ndoza akuita kwa mgosiwe. Kubanika kwa mnt'hu yumwenga nokuwatende want'hu wose wauye nawo want'hu wose nawande na utondowazi." 4 Mzungu uwo nouoneka kwa Abisalomu na kwa wadala vilongozi wose wa Izilaeli kunda wedi.

5 Abisalomu niyo agamba, "Mwitangeni Hushai, kulawa Aliki, kive kiya naalonge." 6 Hushai eze abule kwa Abisalomu, Abisalomu amuuzaga, "Ivo nivo alongile Ahitofeli. Togola kidamanye enga ivo alongile? Uneva hiyo ivo, haya kigambile ivo ukuona ni vedi."

7 Hushai niyo amhitula Abisalomu, "Ulangilizi alavile Ahitofeli mwo lupisi ulu hiyo wedi, 8 kwaviya kumanya kugamba iso na want'hu wakwe wadahi naho waihiwa enga simba ihokigwe wanawe, naho, kumanya kugamba iso mtowani mdahi ywa nk'hondo. Yehe haageze kwikala kilo chose hamwenga na watowani wakwe. 9 Hata ivi haluse kakefisa kale mwe zimp'hanga za uko hegu hant'hu hatuhu. Mnt'hu yeyose neeve kukomwa kwa want'hu naagambe want'hu wa Abisalomu awhumigwa. 10 Naho hata watowani wako wadahi wata mioyo enga simba, nawengile chevu kwa wogohi umwo wakeza kwiva ivo, kwaviya Waizilaeli wamanya kugamba iso mdahi na wadya wose eli nawo wadahi. 11 Ivo ulangilizi wangu ni uno, uwaduganye want'hu wose wa Izilaeli kukongela Dani nt'hendelo ya kasikazini mpaka Beel Sheba, uko kwa mwenye mzi, wande wengi enga sanga wa bahali, weye nawe wiite kwe nk'hondo. 12 Naho nekimzungule niyo chamkump'hukila Daudi enga mnyuzu hohose aho naande, umwo akanda hamanyize ni kihi kikulaila. Inde yehe hegu yeyose mwa watowani wakwe, hehali naasigale mgima. 13 Uneva ananyilikila mwo mzi wowose, want'hu wose wa Izilaeli nawegale sigi niyo wauzinganiza mzi uwo izisigi, niyo chaubulumula mzi uwo wose mpaka kwe dikolongo, kisekusigala hata iwe dodo dya mwo mzi uwo." 14 Abisalomu hamwenga na want'hu wose wa Izilaeli wagambaga, "Ulangilizi wa Hushai ni wedi kujink'ha udya wa Ahitofeli." Mna ino yandaga ni kwaviya Zumbe Mnungu kaika mzungu wa kugamba ulangilizi wa Ahitofeli use kutimilwa vileke adahe kumwigaila Abisalomu file yakwe.

15 Niyo Hushai awagambilaga walavant'hambiko Sadoki na Abiatali ivo yehe na Ahitofeli wamlangilize Abisalomu na wadala vilongozi wa Izilaeli. 16 Awagambaga wasunguze kumwigaila ulosi Daudi kugamba asekugona nekilo mwe midando ya mwe dijangwa, mna asunguze kudendeluka umto Yolodani sema anagwiligwe na kukomwa yehe hamwenga na want'hu wakwe wose.

17 Mwo lupisi ulo, Yonasani na Ahimaasi wakefisaga hagihi na kazuto ka Eni Logeli, vileke wasekuonwa ni mnt'hu yeyose wakeingila mwo mzi. Kila zuwa mndima ywa kike andaga akawegaila ulosi, nawo niyo wawigala kwa seuta Daudi kugamba hawakadaha kukomwa uneva wanaonwa ni want'hu wakengila mwo mzi. 18 Mna mwo lupisi ulu, waonekaga na mbwanga yumwenga uyo agendaga kumgambila Abisalomu. Ivo, Yonasani na Ahimaasi wasunguzaga kuhalawa, niyo waita Bahulimu mwe kaya ya mnt'hu mtuhu andile na sima dyakwe kwo uwa. Wengilaga mwe disima idyo niyo wakefisa. 19 Mkaziwe dya uyo mta inyumba aguhaga ngubiko iyo niyo agubika disima idyo, anjazaga uhule mnanga mwe ngubiko iyo, naho hakwandaga na yeyose amanyaga imbuli iyo. 20 Watowani wa Abisalomu weze wabule kwa uyo mvele, wamuuzaga, "Wehii Ahimasi na Yonasani?" Yudya mvele niyo awahitula, "Wadendeluka kazuto." Wawazungulaga mna hawa waonaga, ivo niyo wauya kwo mzi wa Yelusalemu. 21 Watowani wa Abisalomu weze wahalawe, Yonasani na Ahimaasi wafosaga mwe disima, niyo wagenda kumgambila seuta Daudi wamgambaga, "Sunguza udendeluke kazuto. Ino ni kwaviya Ahitofeli na Abisalomu waikaga mzungu wiihile mwa yehe." 22 Kwaivo, Daudi niyo ahalawa na want'hu wakwe wandile hamwenga naye, wadendelukaga mto Yolodani. Kwize kuche mtondo wose wandaga wadendeluka kale mto Yolodani

23 Ahitofeli eze aone kugamba ulangilizi wakwe hautimilwe, aiikaga lumwe imp'hunda yakwe na kukeuiya kaya kwo mzi wakwe. Eze abule uko aikaga vedi mbuli za mwe kaya yakwe, akenyulikaga na kubanika. Amoselwagwa msanga kwe kikuta che mp'huga ya ise.

24 Ivo, Daudi niyo aita Mahanaimu niyo Abisalomu naye na watowani wakwe wadendeluka mto Yolodani. 25 Mwo lupisi ulo, Abisalomu amsagulaga Amasa kunda mkulu wa watowani hant'hu ha Yoabu. Amasa andaga mwana ywa mnt'hu yumwenga etangwagwa Yeteli mwelekwa ywa Ishumaili. Nine dya Amasa andaga ni Abigaili naho andaga mwana kike ywa Nahashi naho ni lumbudye dya Zeluya nine dya Yoabu. 26 Abisalomu hamwenga na watowani wa Izilaeli waikaga nk'hambi yawe mwe isi ya Gileadi.

27 Daudi eze abule Mahanaimu, Shobi mwana ywa Nashani uyo Mwamoni kulawa mzi wa Laba, Makili mwana ywa Amieli kulawa mzi wa Lo Debali hamwenga na Balizilai kulawa mwe dikabila dya Mgileadi kulawa mzi wa Logelimu, 28 wegalaga vigonelo na mabilika na vyombo va ulongo na ngano na Shaili na unga, na nk'hunde, 29 uki na ngoto na mabongo kulawa mwe mifugwa vnyawe kwajili ya Daudi hamwenga na want'hu andile nawo, kwaviya nawagamba want'hu awa wana sala, naho wasokelesa naho wana nk'hilu uko kwe dijangwa.