1 Daudi nakawaduganya naho watowani wakwe wadahi wa Izilaeli, uwazilo wawe nawanda alufu milongo mitatu. 2 Yehe hamwenga na watowani wadahi waitaga ukwo Baale ya Yuda vileke wakadiguhe Disanduku dya Mnungu dikwitangwa kwa zina dya Zumbe Mnungu mta udahi, uyo akwikala mwe ngubiko ye Disanduku dye Ndagano hagatigati ye viumbwa vina mawawa vikwitangwa makelubi. 3 Niyo wadiguha Disanduku kulawa mwe nyumba ya Abinadabu iyo yandaga kwo mnima wadikweze mwe mnanga mwe digali idihya dikugendezwa ni zing'ombe. Uza na Ahio wana Abinadabu nawo wandaga wakadilongoza digali idyo, 4 dyandaga ne Disanduku dya Mnungu, Ahiyo naye akanda kulongole kwe disanduku idyo. 5 Daudi na want'hu wose wa Izilaeli, wandaga wakakema wila na kuvina kwa udahi wawe wose, ha Zumbe Mnungu. Watowaga mazeze na vinanda na vinubi na lupatu na ngoma. 6 Weze wabule mwo lwazo lwo kuhutila ulozo kwa nakoni, Uza nakachulula mkono wakwe na kuditoza Disanduku dya Zumbe Mnungu kwaviya ziya zing'ombe nezikobadika. 7 Aho, Mnungu niyo amuonela maya Uza. Mnungu kamkoma ahadya. Uza niyo abanika ahadya Mnk'handa mwe diya Disanduku dya Mnungu. 8 Naye Daudi niyo engila maya kwaviya Mnungu kamsulumiza Uza kwa maya. Ivo hant'hu aho niyo hetangwa Pelesi Uza mpaka ivi dyelo. 9 Daudi niyo amogoha Mnungu zuwa diya akagamba, "Nedize vivihi kwangu Disanduku dya Zumbe Mnungu?" 10 Ivo Daudi haungile kudileta sanduku dya Zumbe kwo mzi wa Daudi, mna Daudi niyo adisamizila mwe nyumba ya Obedi wa Edomu ywe dikabila dya giti. 11 Sanduku dya Zumbe Mnungu nakadiika mwe nyumba ya Obedi Edomu ywe dikabila dya giti, lupisi lwa miezi mitatu, naye Zumbe Mnungu niyo amvikila Obedi Edomu, ne mp'huga yakwe yose.

12 Akajika aho want'hu nawamgambila Daudi, kugamba Zumbe kamvikile Obedi edomu kila kint'hu ne mp'huga yakwe kwaviya yehe niye nakaamila Disanduku dye Ndagano, Daudi eze eve ivo yehe na want'hu watuhu waitaga kwa Obedi Edomu, na kudidiguha Disanduku kulawa kwa Obedi Edomu kuita Yelusalemu wakanga kwa kinyemi. 13 Want'hu wadya wadiinule sanduku dya Zumbe Mnungu kila aho wakagenda nk'hach mtandatu Daudi nakawagamba wakimale amlavile Zumbe Mnungu nt'hambiko ya jeku digimbale. 14 Daudi akanda kakefunga kazibau kwo ulavant'hambiko mwe kigudi chakwe nakavina kwa udahi wakwe wose ha Mnungu. 15 Ivo, yehe na waizilaeli wose nawadiigala Disanduku mpaka kwo mzi wa Daudi kwa kinyemi na izwi kulu dya magunda. 16 Sanduku dya Mnungu umwo dyandaga dikekingila mwo mzi wa Daudi, Mikali mwana kike wa Sauli nakasungila mwe dilisha niyo amuona seuta Daudi akapilika na kuvina ha Mnungu, ivo niyo ambela mwo moyo wakwe. 17 Mna wadiingiza sanduku dya Mnungu mndani mwe dihema idyo adikimaga Daudi niyo wadiika disanduku hant'hu hakwe. Daudi naye niyo alava nt'hambiko za kokigwa na nt'hambiko za utondowazi ha Mnungu. 18 Daudi eze ibinde kulava nt'hambiko zo kokigwa na za utondowazi, nakawavikila want'hu kwa zina dya Zumbe Mnungu mta udahi, 19 na kuwapangila want'hu wose, we difyo dya Izilaeli, wagosi na wavele, kila yumwenga, mkate, na kihendo cha nyama na mkate wa zabibu. wakajika aho, want'hu wose nawahalawa, kila mnt'hu nakauya kwe kaya yakwe. 20 Daudi eze auye kwe kaya yakwe vileke avikile imp'huga yakwe, Mikali mwana kike ywa Sauli, agendaga kumsingila, niyo agamba, "Hihungila seuta ywa Izilaeli kuketunya dyelo kwa kunda kimbwigili ha wandima wakwe wa kivele enga mnt'hu abwalate ivo akuhambula zisuke zakwe haheina soni ha want'hu!"

21 Daudi niyo amgamba Mikali, "Nehinda ha meso ha Mnungu yudya anisagulaga miye hant'hu ha iso, ne mp'huga yakwe, vileke ninde mkulu mwa Izilaeli, awo want'hu wakwe Mnungu, kwaivo miye nenivine du ha Mnungu. 22 Miye nenikeseleze mwenye kujink'ha ivi haluse. Weye nounione hiyo kint'hu, mna awo wandima wa kivele uwalongile nawanitunye!"

23 Ivo Mikali mwana kike ywa Sauli havadahikaga kupata na mwana mpaka mwo kubanika kwakwe.