1 Ivo Zumbe Mnungu amtumaga mlotezi Nasani kwa Daudi. Nasani niyo aita kwa Daudi, akamgamba, "Kwandaga na wagosi waidi mwo mzi umwenga, yumwenga andaga mgoli na mtuhu naye andaga mkiwa. 2 Yudya mgoli andaga na ngoto na ng'ombe zibindile ingi. 3 Mna yudya mkiwa andaga na mwate umwenga augulaga. Aukaulisaga niyo wakula hamwenga na wanawe. Amwink'haga nk'hande iidya naakadya yehe, na kuulela vedi, mwate uwo wandaga enga mwana kike ywakwe. 4 Zuwa dimwenga, mta kwiza aitaga kwa yudya mgoli. Ivo mgoli uyo haungile kuguha ngoto yakwe imwenga hegu ng'ombe vileke amchinjile yudya mta kwiza ywakwe, mna aitaga na kumuhoka idya ngoto yakwe , na kumchinjila yudya mtakwiza ywakwe mkiwa."

5 Daudi eze eve ayo, andaga na maya mwa yudya mgoli. Na kumgamba mlotezi Nasani, "Nakelisila kwa Zumbe Mnungu mta udahi kugamba mnt'hu adamanye mbuli enga iyo aungwa akomwe! 6 Vaungwa amlihe mwana ngoto yudya mkiwa, nk'hanana nne, kwaviya kadamanya mbuli ihile naho handile na mbazi."

7 Nasani niyo amgamba Daudi, "Weye ni we mnt'hu uyo." "Naho aya nayo akulonga Zumbe Mnungu ywa Izilaeli akulonga, ‘Miye hikuika kunda seuta mwa Izilaeli na kukukombola mwo udahi wa Sauli. 8 Nakwink'haga nyumba ya mkulu ywako na wavele wakwe wande wako, naho nehikwink'ha want'hu wa Izilaeli na want'hu wa Yuda uwekaile. Naho uneva aya nayanda madodo kwako hegu nehikongezela nk'hanana mbili mwa ayo. 9 Nii elo, kubela ulosi wangu miye Zumbe Mnungu na kudamanya wiihi uno hangu? Kumkoma Ulia we dikabila dya Wahiti, kwa sime, na kumguha mkaziwe ande mkazio. Kuwatenda Waamoni wamkome Ulia mwe nk'hondo! 10 Kwa ivo elo, kwa viya kunibela na kumguha mkaza Ulia Mhiti, ande mkazio, wamwenga mwa welekwa wako nawakomigwe kwa sime ukomi houhauke. 11 Naikakilapi kwako kugamba, neniseleze makunt'ho mwa want'hu wako mwenye.Neniwaguhe wakazio na kumwink'ha mbwiyayo, naye naagone nawo mwe kiyeti ivi ukakaula. 12 Weye nokudamanya mbuli iyo kwa kinyele, mna miye neniyatende ha waizilaeli wose mwe kiyeti.’ "

13 Ivo, Daudi niyo amgamba Nasani, "Hidamanya wavu mwa Zumbe Mnungu." Nasani niyo amgamba, "Zumbe Mnungu kakulekela wavu uwo, weye nawe houbanike. 14 Hata ivo, kwajili yo udamanyi wako kwa kumbela Zumbe Mnungu, mwanao naabanike." 15 Akajika Nasani niyo auya kaya.

Zumbe Mnungu amtowaga umwana yudya Ulia uyo amwelekelaga Daudi, mwana uyo niyo anda mnyonge.

Zumbe Mnungu amtendaga mwana mkaza Ulia amweleke na Daudi kundilisa mnyonge 16 Daudi amlombezaga Mnungu kugamba mwana ahone. Afungaga ukudya kint'hu chochose, kilo chose ekalag kwe chumba chakwe akagona hasi mwa magunia. 17 Wadala vilongozi wakulu we mwe nyumba iyo wambasaga na kumgamba enuke, mna yehe alemelaga, naho hadyaga nk'hande hamwenga nawo. 18 Mna zuwa dya mfungate kulongole, mwana uyo abanikaga. Wandima wa Daudi wogohaga kumgambila kugamba mwanao kabanika, kwaviya nawafanyanya, "Mwana uyo umwo andile mgima nawalonganya, mna hakitegeleze. Haluse nekimgeeze kugamba mwanao kabanika? Vadahika naakekome!"

19 Daudi eze akaule wandima wakwe wakatakanizana, abunk'hulaga kugamba mwanawe kabanika. Ivo niyo awauza, "Togoleni mwana kabanika?" Na woho niyo wamhitula,

"Heye! Kabanika."

20 Daudi enukaga kulawa hasi na kuhaka mazi. Akehakaga mavuta na kusakanya suke zakwe. Akajika engilaga kwe Nyumba ank'hulu ya Mnungu na kumvika. Eze auye kaya alombezaga nk'hande niyo enk'higwa no kudya. 21 Niho wandima wakwe wamuuza, "Ni mbuli yani ino udamanye? Mwanao umwo andile mgima, weye wafungaga na kumwiila. Mna eze abanike, weye kwinuka na kudya nk'hande!"

22 Daudi niyo awahitula, "Ni kindedi mwanangu ivo andile mgima, nehifunga na kuila. Nehidamanya ivi kwaviya nehagamba, ‘Niani akumanya? Vadahika Zumbe Mnungu naamtende ande mgima.’ 23 Mna haluse kabanika, ya mbwai nifunge? Togoleni miye nadaha kumvuzila ugima? Zuwa dimwenga name neniite uko aitile, mna yehe hakudaha kuuya kwangu."

24 Niyo Daudi amsangalaza Betisheba mkaziwe. Niyo agona naye, niyo enula ubovu na kwingila nyumba mwana kilume, uyo Daudi amwitangaga Selemani. Zumbe Mnungu amuungisaga mwana uyo, 25 na yehe niyo amsigila mlotezi Nasani kwa Daudi kugamba amwitange mwana uyo Yedidia nuko kugamba Zumbe Mnungu amuungisaga.

26 Lupisi ulwo, Yoabu autowaga mzi wa Laba wa Waamoni, na kuutaha mzi uwo we kiseuta. 27 Yoabu niyo asigiila wegala ulosi kwa Daudi, "Hiutaha mzi wa Laba, na kuditozeleza dikawa dyawe dya mazi. 28 Haluse waduganye watowani wose wasigale, utowe nk'hambi kuuzunguluka na kuutaha. Vituhu vakwe nnautaha miye nowitangwe kwa zina dyangu." 29 Ivo Daudi awaduganyaga fyo dyose dya watowani niyo waita Laba, na kuutowa mzi uwo na kuutaha. 30 Akajika niyo waguha taji ye kiseuta kulawa mwo mtwi we dihili dya mnungu ywa Waamoni, mnungu Moleki Daudi aiguhaga itaji iyo ye zahabu yandaga na uzami wa kilo milongo mitatu na shano, nayo yandaga na iwe dya yombe kulu. Daudi aguhaga diiwe idyo niyo adimamika mwe tajinyakwe mwenye. Naho atahaga vint'hu vibindile ingi mwo mzi uwo. 31 Niyo awaguha want'hu wo mzi uwo na kuwaika wadamanye ndima kwa misumeno, sululu za kilama, na hoya ya kilama na kuwatenda wadamanye ndima ya kudamanya matofali, ivo nivo awatendaga want'hu we mizi iyo yose ya Waamoni. Aaho niyo Daudi na fyo dyakwe dya watowani niyo wauya Yelusalemu.