1 Daudi awawazaga watowani andile nawo, na kuika mwawe wakulu wa watowani alufu na wakulu ywa watowani magana. 2 Daudi niyo awatuma watowani wakwe kwe nk'hondo mwe mafyo matatu. Fyo dimwenga di mwa Yoabu, na fyo dya kaidi di mwa Abishai mwana ywa Seluya nduguye dya Yoabu na fyo dya katatu di mwa Itai kulawa mwe dikabila dya Wagiti. Niyo Daudi awagambila wose, "Miye mwenye neninde hamwenga na nyuwe."

3 Mna watowani niyo wamgamba, "Houfose, kwaviya kinanyilika hawakitimile. Hata uneva neinde nusu ya watowani wetu nawabanike, hawangadike na suwe. Mna weye ni mnt'hu hwikuungwa kuswesekana kujink'ha want'hu alufu mlongo. Ivo ni vedi weye usigale aha mwo mzi na kukigaila vint'hu ukanda kwo mzi."

4 Seuta niyo awagamba, "Dyodyose mkuona ni dyedi, nenidamanye." Ivo, seuta niyo akimala mnk'handa mwe nk'hili, uku watowani wakwe wokomboka, magana na maelufu. 5 Seuta niyo amgamba Yoabu, Abishai na Itai, "Kwaajili yangu, mdamanyileni uwedi yudya mbwanga Abisalomu." Watowani wose wamwivaga seuta akawasiigiila wakulu wa watowani wakwe.

6 Ivo, watowani wa Daudi niyo waita kwe nyika na kutowana na want'hu wa Izilaeli. Nk'hondo iyo neinda kwe mbago ya Efulaimu. 7 Watowani wa Daudi wawahumaga Waizilaeli. Ukomi wa zuwa idyo nayanda makulu kwaviya want'hu alufu milongo miidi nawakomigwa. 8 Kutowana uko nokugendeela mwe isi yose na want'hu wengi wabanikaga mwe mbago kujink'ha wadya wakomigwe na sime.

9 Niyo Abisalomu akanda kakwela mwe mp'hunda falasi, abwilanaga na watowani ywa Daudi. Mp'hunda falasi iyo ikanda yomboka hasi yo mti wa mwaloni, aho mtwi wa Abisalomu niyo wafinyilizwa mwo mwaloni, Abisalomu niyo alekwa uku akahweela kulanga. mna mp'hunda falasi yakwe yagendeelaga kuita. 10 Mnt'hu mtuhu aone mbuli iyo, amgambaga Yoabu, "Himuona Abisalomu akahweela mwe mwaloni!"

11 Yoabu niyo amgamba mnt'hu uyo, "Mbwai? Kumuwona Abisalomu? Naho nii humkomile aho? Hegu nehitogola naho nehikwink'ha vibesu mlongo va masawa." 12 Mna yudya mnt'hu niyo amgamba Yoabu, "Hata una nink'ha vibesu alufu va masawa, hyagezile kumtowa mwana seuta. Kwaviya nekimwiva seuta akakusigiila weye Abisshai na Itai kugamba, ‘Mmwamile mbwanga Abisalomu.’ 13 Vituhu vakwe, uneva nehimtendela uwihi, naho hahana dikefisile ha seuta, weye mwenye nokunilemela."

14 Yoabu niyo amgamba, "Miye hina lupisi lwa kwaza miye na weye." Aho Yoabu niyo aguha mijungo midodo mitatu, niyo agenda kumjunga Abisalomu mo moyo, Abisalomu andaga akei mgima akahweela mwe ditambi dya mwaloni. 15 Niyo watowani mlongo wamwinuile vitowanilo Yoabu, wezaga na kumzunguluka Abisalomu, wamtowaga na kumbindiliza.

16 Naho Yoabu atowaga gunda, watowani wose wauyaga na kuwatimila want'hu wa Izilaeli, kwaviya Yoabu awalemezaga. 17 Niyo waguha kimba cha Abisalomu na kukiduula mwe dibome dikulu mwe mbago na kuumbika lundo kulu dya maiwe mnanga mwakwe. Want'hu wose wa Izilaeli niyo waguluka, kila yumwenga kwe kaya yakwe.

18 Abisalomu mwo lupisi lwakwe, andaga kakezengela mkola wa nk'humbukila mwe dikolongo dya seuta, kwaviya agambaga, miye hina mwana kilume wa kutenda zina dyangu digendeele kukumbukilwa. Mkola uwo awink'haga zina dyakwe mkola wa Abisalomu mpaka ivi dyelo.

19 Niyo, Ahimaasi mwana Sadoki agambaga, "Nilekeleni niite hamgambile seuta mbuli izi kugamba Zumbe Mnungu kamkombola mwo udahi wa wank'hondo wakwe."

20 Yoabu niyo amgamba, "Dyelo howigale mbuli izo. Wadaha kwigala mbuli izo zuwa tuhu kwaviya mwana seuta kabanika" 21 Niho Yoabu amgamba mtuhu yumwenga, Mkushi, "Weye ita ukamgambile seuta yadya uyaone." Mkushi niyo afunamiza mtwi wakwe hasi mwa Yoabu, na kuguluka kuita kwa seuta. 22 Niyo Ahimaasi mwana Sadoki amgambaga Yoabu naho, nakulombeza nilekele du nimgulukile yudya Mkushi. Yoabu niyo amgamba,

"Togola mwanangu nii waunga unyilike? Weye hougelekwe chochose mwe mbuli ino."

23 Ahimaasi niyo amgamba, Heye, guluka, Niyo Ahimaasi aguluka na kutimila sila ya kwe mbago na kumjink'ha yudya Mkushi.

24 Daudi andaga kekala mwe nk'hili yo kwingila mwo mzi, mwamizi we nk'hili naye akwelaga mwo lukandula mpaka kulanga ye nk'hili naho eze akaule amuonaga mnt'hu akaguluka ekedu. 25 Uyo mwamizi atowaga lwasu akamgamba seuta. Seuta niyo agamba, "Uneva ekedu, uyo ana mbuli yedi du." Yudya mnt'hu niyo anda hagihi.

26 Mwamizi amuonaga mnt'hu mtuhu andaga akaguluka na kwitanga naho mwamizi ywe nk'hili akagamba, "Kaula mnt'hu mtuhu aguluka ekedu. Seuta niyo agamba uyo naye egala mbuli."

27 Yudya mwamizi niyo agamba, "Naona kugamba yudya agulukisa kujink'ha Ahimaasi mwana Sadoki

"Seuta niyo agamba uyo ni mnt'hu ywedi, akigaila mbuli zedi."

28 Niho Ahimaasi akwezaga izwi ha seuta akagamba, mbuli zose ni zedi. Afunamiza mtwi wakwe mpaka hasi kwa kumtunya akagamba, "Atogolwe Zumbe Mnungu, Mnungu ywako akukombole kulawa kwa want'hu nawaka kusezenga, mkulu ywangu seuta!"

29 Seuta niyo amgamba, "Togola, mbwanga Abisalomu evihi? Ahimaasi niyo ahitula, umwo Yoabu eze anitume miye mndima ywako, nehiona kuna lwasu, mna hyamanyize nokulailai."

30 Seuta niyo agamba, "Ikala hank'handa naho ukimale aaho." Ivo Ahimaasi asogelaga na kukimala hank'handa.

31 Niyo yudya Mkushi abula niyo agamba, "Kuna mbuli yedi kwako mkulu ywangu seuta, kwaviya Zumbe Mnungu dyelo kakukombola mwa wadya wose nawakaunga wakukome!"

32 Seuta niyo amuuza, "Togola mbwanga Abisalomu evihi?"

Mkushi niyo agamba, "Mkulu, wank'hondo wako na wadya wose, nawakaunga wakukome enga uyo mbwanga Abisalomu."

33 Aaho seuta niyo anda na kinyulu, akwelaga kwe chumba chakwe cha kulanga che nyumba mwe nk'hili na kuila. Umwo andaga akakwela, andaga akaila akagamba, "Hoo mwanangu Abisalomu, mwanangu Abisalomu! Nevinda vedi nabanike miye kujink'ha weye mwanangu Abisalomu!"