1 Akajika, Daudi awatowaga na kuwahuma Wafilisiti niyo autaha mzi wa Metegi ama kulawa mwo udahi wa Wafilisiti.

2 Naho Daudi awahumaga Wamoabu. Awaikaga mwe misafa miidi na kuwahima kwa utali wa sigi awo watahigwa, mafyo ayo nayakomwa, naho eze ahime nk'hanana ya katatu, fyo idyo nakadileka kunda gima. Ivo Wamoabu wandaga mwo udahi wa Daudi woho nawo wamwigailaga Daudi kodi. 3 Akajika Daudi atowanaga na Hadadezeli mwana ywa Lehobu, seuta ywa Soba, umwo agendaga kuvuza udahi wakwe hant'hu aho ho mto Efulate. 4 Daudi nakataha magali ya nk'hondo elufu imwenga, na wagendeza magali alufu mfungate, na watowani wakugenda lwa viga alufu milongo miidi. Daudi nakakant'ha zinyuge ze viga kunyuma ye zifalasi zose za magali. Asigazaga du falasi gana. 5 Na awo Wasilia wa Damasko weze waite wakamwambize Hadadezeli seuta ywa Soba, Daudi nakawatowa na kuwakoma want'hu alufu milongo miidi na waidi. 6 Niyo Daudi aika nkambi ya watowani mwo mzi wa Wasilia wa Damesiki. Ivo, Wasilia niyo wenda wandima wakwe wakamliha kodi. Mnungu kamwink'ha Daudi uhumi kokose uko aitile. 7 Daudi nakaziguha nk'hindo za zahabu izo zandaga za wank'hondo wa Hadadezeli no kuziigala Yelusalemu. 8 Naho nakaguha shaba nyingi kulawa mwo mzi wa Beta na Belotia, indile mizi ya hadadezeli. 9 Mwo lupisi lwa seuta Toi ywa Hamati, eze eve kugamba Daudi kawahuma wank'hondo wose wa Hadadezeli, 10 Nakamtuma mwanawe Yolamu kwa seuta Daudi kumwigaila ndamsa na kumtunya kwaviya nakatoana na Hadadezeli na kumhuma. Kwaviya Hadadezeli nakatoana na Toi nk'hanana nyingi, Yolamu nakamwigaila Daudi geleko dya vyombo va masawa na zahabu na shaba. 11 Geleko idyo, hamwenga na matundu na zahabu izo azitahile kwe ziisi zose izo azihumile, nakamlava Zumbe Mnungu, 12 vint'hu ivo ni kulawa Edomu, na Moabu na Amoni na Filisitia na Amaleki hamwenga na izo atahile kwa seuta Hadadezeli, mwana wa Lehobu seuta wa Soba. 13 Daudi nakakeongezela kumanyikisa. Akanda akauya mwo kwajika kumhuma Hadadezeli, nakawakoma Waedomu alufu mlongo na mnane, mwe dikolongo dya munyu. 14 Kaika nkambi za watowani mwe Edomu yose. Na awo Waedomu wose wa uko niyo wenda wandima wakwe. Zumbe Mnungu nakamwink'ha uhumi Daudi kokose kudya aitile. 15 Ivo, Daudi niyo ailongoza Izilaeli yose, akawatendela uwagilwa want'hu wakwe wose haheina kwazagula. 16 Yoabu mwana ywa Seluya, nakanda mkulu wa wank'hondo. Yehoshafati mwana wa Ahiludi, nakanda aika nk'humbukila kwa yose nayakalaila. 17 Sadoki mwana ywa Ahitubu na Ahimeleki mwana ywa Abiatali nawanda walavant'hambiko, Seluya nakanda mwandisi mkulu. 18 Benaya mwana ywa Yehoyada nakanda kilongozi ywa Wakileti na Wapeleti nawo wana wa Daudi niyo wanda vilongozi wakulu.