1 Yoabu agambilagwa kugamba seuta andaga akaila na kuhongeza mwe file ya Abisalomu. 2 Kwa ivo uhumi mwe dizuwa idyo nounda wa kuhongeza kwa watowani wose, weze weve seuta amuhongezela Abisalomu. 3 Ivo zuwa idyo want'hu wengilaga mwo mzi kwa kinyele enga want'hu wakuuya mwo mzi wakaona soni kwa kunyilika nk'hondo. 4 Seuta agubikaga futa yakwe na kuila kwa izwi kulu akagamba, "Hoo mwanangu Abisalomu! Hoo mwanangu Abisalomu!"

5 Niho Yoabu abulaga kaya kwa seuta akamgamba, "Dyelo kukigela soni suwe wandima wako wose awo dyelo kiukombole wikazi wako na wikazi wa wanawo wa kilume na wikazi wa wanawo we kike na wikazi wa want'hu wako na wawele wako. 6 Weye wawaunga wadya wakukuihiya naho wawaihiya wadya wakukuunga. Kukilagisa pwilili kugamba wakulu wa watowani na watowani wawe hi kint'hu kwako. Naona kugamba dyelo Abisalomu andile mgima, suwe naswe chabanike, hegu weye nokunda na kinyemi. 7 Haluse kimala ukawagele moyo. kwaviya nakelisa kwa Zumbe Mnungu mta udahi kugamba, uneva hukuita kulonga nawo, hehali hata yumwenga naande hamwenga na weye dyelo kisingi. Ino neinde mbuli ihise kwako kujink'ha uwihi wako uutendile kukongela mwo ubwanga wako." 8 Ivo seuta afosaga na kugenda kwikala ho ukalo wakwe hagihi ne nk'hili. Want'hu wose weze wagambilwe kugamba seuta ekwe nk'hili wamwitilaga.

Mafyo yose ya watowani wa Izilaeli ayo yandaga hamwenga na Abisalomu yauyaga kwe zikaya zawe. 9 Want'hu wose nawanda wakahigana woho kwa woho mwe makabila yose ya Izilaeli, wakagamba, "seuta Daudi akiyokolaga mwo udahi wa wank'hondo wetu, naho akiyokolaga mwo udahi wa Wafilisiti. Mna haluse kainyilika isi akamnyilka Abisalomu. 10 Naho Abisalomu uyo kimwikile kunda seuta ywetu, haluse kakomwa kwe nk'hondo. Haluse nii hakikulonga mwo kumvuza seuta Daudi?"

11 Seuta Daudi niyo atuma wegala ulosi kwa mlavant'hambiko Sadoki na Abitali, Wagambileni wadala vilongozi wa Yuda, "Nii woho wanda want'hu wa kunyuma kumvuza seuta mwe kaya yakwe? Kiya walongile Waizilaeli hikiiva miye seuta. 12 Nyuwe wandugu zangu, naho ni sakame yangu, nii mwanda want'hu wa kunyuma kunivuza miye seuta mwe kaya yangu?" 13 Daudi awagambaga mgambeni Amasa kugamba, "Yehe naye sakame yangu. Naho Mnungu naanikome uneva himtendile kunda mkulu we difyo dyangu dya watowani kukongela dyelo kujink'ha Yoabu!" 14 Ivo Daudi awatendaga want'hu wose wa Yuda wamzumile enga mnt'hu yumwenga. Ivo niyo wamwigaila ulosi kugamba auye kaya weye na wandima wako wose.

15 Ivo seuta niyo eza mto Yolodani na want'hu wose wa Yuda niyo weza mpaka Giligali kumsingila seuta na kumombosa mto Yolodani. 16 Shemei mwana Gela ywe dikabila dya Benjamini kulawa Bahalimu, asunguzaga kuita na want'hu watuhu vileke wamsingile seuta Daudi. 17 Shimei aitaga hamwenga na want'hu we dikabila dya Benjamini alufu imwenga. Siba mndima ywa mbuyaye ywa Sauli hamwenga na wanawe mlongo na wandima milongo miidi, waitaga nawo kwo mto Yolodani wakamsingile seuta Daudi. 18 Ivo wombokaga mto Yolodani vileke waitanye hamwenga na mbuyaye dya seuta na kumdamanyila seuta yadya yose yaungaga. Shimei mwana Gela niyo eza na kufunamiza mtwi wakwe hasi kwa kumtunya, mwo lupisi seuta andaga hagihi na kudendeluka mto Yolodani.

19 Shimei niyo amgamba seuta, "Nakulombeza usekufanyanya uwihi udya hudamanyile umwo wahalawaga yelusalemu usekugendeela kuufanyanya. 20 Kwaviya miye mndima ywako himanya kugamba nehidamanya wavu. Ivo nivo vikuleka hiza dyelo, nehinda ywa nk'hongo mwe dikabila dya Yusufu, kwiza kukusingila weye mkulu ywangu seuta."

21 Niho Abishai mwana Seluya niyo agamba, "Togola hikugamba vaungwa Shimei akomwe kwaviya amligitaga mnt'hu uyo akumbagwa mvuta ni Zumbe Mnungu mwenye?"

22 Mna Daudi niyo awahitula wana Seluya kugamba, "Miye hina mbuli na nyuwe, nii mwaketenda kunda wank'hondo wangu dyelo? Togoleni kukomigwa mnt'hu yeyose mwe Izilaeli mwe dizuwa dya dyelo? Togola himanyize kugamba miye ni seuta ywa Izilaeli mwe dizuwa dya dyelo?" 23 Niyo seuta amgamba Shimei, "Weye houkomwe Seuta niyo amwikila kilapi Shimei."

24 Mefibosheti mwezukulu dya Sauli, aitaga naho kumsingila seuta Daudi. Kukongela aho seuta ahalawaga Yelusalemu, mpaka aho awiiye vedi, Mefibosheti andaga hanati kusunt'ha viga vakwe na kupucha fili zakwe naho hafigisa zisuke zakwe. 25 Ivo umwo eze abuile Yelusalemu kwo kumsingila seuta Daudi amuuzaga, "Togola Mefibosheti, nii hundile hamwenga na miye?"

26 Mefibosheti agambaga, "Zumbe ywangu seuta, mndima ywangu anidant'hilizaga. Kwaviya miye mndima ywako, nehimgamba, Niikile lumwe mp'hunda vileke niite hamwenga na seuta, kwaviya miye mndima ywako hiholomp'hala. 27 Haluse kanidant'hiliza miye, mkulu ywangu seuta. Mna weye mkulu ywangu, kunda enga mtumigwa ywa kwe mbingu ywa Mnungu, damanya dyodyose dikukwelela. 28 Kwaviya mp'huga ya baba nawanda ni want'hu wakuungwa kukomwa ha mkulu ywangu seuta. Mna kuniika hamwenga na wadya wakudya nk'hande hamwenga na weye. Togola nna uwedi wani utendese vikunileka nigendeele kukulombeza seuta."

29 Seuta niyo amgamba, "Usekunigambila mbuli zako du. Miye hilamula kugamba weye na Siba nompangilane isi ya Sauli."

30 Mna Mefibosheti amgambaga seuta, "Mlekele Siba aiguhe isi yose yehe ekedu. Miye hyelelwa kale kugamba weye seuta kuuya kaya kwa utondowazi."

31 Bazilai Mgileadi andaga kabula kulawa Logeilimu. Andaga kaita hamwenga na seuta mwo mto Yolodani vileke amdendeluse mto Yolodani. 32 Balizilai andaga kadalahala vitendese, mta miyaka milongo mnane. Balizilai andaga akamtendela uwedi seuta uko andaga Mahanaimu, kwaviya andaga mgoli vitendese. 33 Ivo, seuta Daudi amgambaga Balizilai, "Kiitanye uko Yelusalemu na miye nohulele vedi."

34 Mna Balizilai amgambaga seuta, "Togola nna miyaka mingi yo kwikala vikuleka niite hamwenga na weye Yelusalemu? 35 Miye dyelo nna miyaka mlongo mnane. Togola nna udahi wa kubunk'hula ayedi na yaihile? Togola miye mndima ywako, nadaha kubunk'hula kiya hudya hegu kunywa? Togola nenidahe kutambula uwedi wa maizwi ya wakemi wa kigosi hegu wa kivele? Nii miye mndima ywako ninde enga nt'hanu kwako mkulu ywangu seuta? 36 Miye mndima ywako neniite na weye mpaka mwe digundi dya mto Yolodani. Nii seuta anilihe nt'hunyo iyo nk'hulu? 37 Nakulombeza unilekele miye mndima ywako, nibanikile mwo mzi wangu, hagihi na kikuta cha tate na mnala. mna uyu mndima ywako Kimhamu mlekele aite na weye mkulu ywangu, naho mdamanyile dyodyose ukuona ni dyedi."

38 Seuta niyo amgamba, "Kimhamu neniitanye naye, naho nenimadamnyile dodyose dyedi kwako. naho dyodyose ukuunga hudamanyile nohudamanyile." 39 Niho want'hu wose wadendeluka mto Yolodani hamwenga na seuta. Seuta amvikilaga Bazilai na kumnonela, na Bazilai niyo auya kwe kaya yakwe.

40 Seuta agendeelaga mpaka Gileadi, Kimhamu andaga akatimilana naye. Want'hu wose wa Yuda na nusu ya want'hu wa Izilaeli wandaga wakamsindikiza seuta. 41 Niyo want'hu wose wa Izilaeli waita kwa seuta na kumgamba, "Nii ndugu zetu want'hu wa Yuda weza kwa kinyele niyo wakuguha weye ne mp'huga yako na watowani wako niyo wamidendelusani mto Yolodani?"

42 Want'hu wa Yuda wawagambaga want'hu wa Izilaeli, "Kwaviya seuta ni ndugu ywetu ywa hagihi. Nii mwaihiwa mwe mbuli ino? Togoleni kidya chochose mwo lupisi lwose kwa upati wa seuta? Hegu togoleni yehe kakiink'ha nt'hunyo yoyose?"

43 Want'hu wa Izilaeli wawahitulaga want'hu wa Yuda, "Kina uwagilwa nk'hanana mlongo mwa seuta, kujink'ha izo mnanazo nyuwe, na hata ya Daudi imwenye. Nii elo nomkibela? Togoleni suwe hachandile want'hu wa nk'hongo kugamba seuta ywetu avuzigwe?" Milosi ya want'hu wa Yuda yandaga itendesa kujink'ha idya ya Waizilaeli.