1 Yoabu mwana Seluya, amanyaga kugamba seuta Daudi amuonelesa nk'wina Abisalomu du. 2 Ivo awatumaga want'hu uko Tekoa, vileke wamzungule mvele mta umanyi. Weze wamwigale wamgambaga, "Ketende enga wahongeza, uvale suke za kuhongezela naho usekuchana zifili zako uketende enga mvele emwe kuhongeza kwa lupisi lutali. 3 Akajika ita kwa seuta ukamgambile yadya nohugambile." Yoabu niyo amgambila zimbuli zo kumgambila seuta.

4 Uyo mvele kulawa Tekoa niyo aita kwa seuta na kufunamiza kihanga chakwe mpaka hasi kwa kumtunya seuta, akamgamba, "Seuta nambize!"

5 Seuta amuuzaga yudya mvele kugamba, "Una makunt'ho yani?"

Yudya mvele niyo ahitula, "Kikunisulumiza ni kubanikilwa ni mnumangu. 6 Miye mndima ywako nandaga na wana kilume waidi. Zuwa dimwenga wakanda kwe nyika, wakongaga nk'humbizi. Kwaviya hahandaga na mnt'hu wa kuwalamula,mwanangu yumwenga niyo amtowa miyawe na kumkoma. 7 Haluse wandugu zangu wose wanihituka miye mndima ywako, waunga nimlave mwana uyo amkomile miyawe vileke wamkome, ivo nawamkome uyu akaunga ande mkipe. Wanadamanya ivo nawanitende nisigale hiina mwana kilume. Nawadiuse dikawiilo dyangu disigale, naho mnumangu haande na mwana kilume wa kumwiikila zina mwe isi."

8 Seuta niyo amgamba yudya mvele, "Uya kaya, nenilave sigilizi mwe mbuli yako ikaulwe."

9 Yudya mvele kulawa Tekoa agambaga, "Mkulu ywangu seuta, uneva noupate makunt'ho mwo kuikaula mbuli ino masa yose yande mwangu na mwe mp'huga ya tate. Ivo weye no useuta wako homnde na masa."

10 Seuta niyo amgamba, "Mnt'hu yeyose anakutisa mwigale kwangu, uyo heeze ageze naho kukutisa."

11 Yudya mvele niyo amgamba, "Nakulombeza unilombezele kwa Zumbe Mnungu, vileke yudya ndugu yangu akuunga alihize kikoda cho ukomi wa mwanangu asekudamanya wavu mkulu kwa kumkoma yudya mwanangu asigale." Seuta Daudi niyo amgamba,

"Nakelisila kwa Zumbe Mnungu mta udahi, haluhali hata luvili za mwanawo nolutomoke hasi."

12 Yudya mvele niyo amgamba, "Miye mndima ywako, nalombeza nilekele nilonge mbuli imwenga du kwako seuta."

Seuta niyo amgamba, "Longa."

13 Yudya mvele niyo amgamba, "Nii elo kuika mzungu uno wiihile mwa want'hu wa Mnungu? Kumlemeza mwanao mwenye ase kuuya kulawa kudya anyilikile. Kwa ivo mwa ayo ulongile kukesengela mwenye. 14 Suwe chose nekibanike du. Suwe ni enga mazi yetike hasi ayo heyekutekwa naho. Hata Mnungu hakudamanya vituhu mwa mnt'hu uyu na mnt'hu mtuhu, yehe azungula sila ya wadya walemelwe na kunyilika wadahe kuuya. 15 Naho haluse hiza kuyalonga aya na weye, zumbe ywangu seuta kwaviya want'hu wanitisa. Naivo miye mndima ywako nehifanyanya kugamba, wadaha kukint'hiza kiya hulombeza. 16 Kwaviya seuta naanitegeleze na kunikombola mwo udahi wa mnt'hu akudaha kunikoma miye na mwanangu kihalawe mwe isi kink'higwe ni Mnungu. 17 Mndima ywako name nehifanyanya mwenye kugamba, ulosi wa seuta ywangu nounink'he utondowazi mwo moyo wangu ni enga mtumigwa ywa Mnungu ywa kwe mbingu mwo kutalaula yaihile na ayedi. Zumbe Mnungu ywako ande hamwenga na weye!"

18 Seuta niyo amhitula yudya mvele akamgamba, "Usekunifisa mbuli yeyose nohuuze" Yudya mvele niyo agamba,

"Niuze du zumbe ywangu seuta."

19 Seuta niyo amuuza, "Togola Yoabu hamuli mwe mbuli ino?" Yudya mvele niyo agamba,

"Enga ivo ukugendeela kunda mgima seuta ywangu, mnt'hu hakudaha kukehonya kwa vovose mwe mbuli ino ulongile seuta ywangu. Yoabu yudya mndima ywako niye anitumile. Ni yehe anigambile mbuli izi zose hukugambila miye mndima ywako. 20 Yoabu alongaga ivo vileke mbuli zikale vedi. Mna weye mkulu ywangu, una mizungu enga mtumigwa ywa Mnungu ywa kwe mbingu, naho kumanya mbuli zose zili mwe isi."

21 Niyo, seuta amgamba Yoabu, "Ni vedi, nenitende ivo ukuunga vinde. Genda kamguhe mbwanga Abisalomu umvuze aha hakaya."

22 Yoabu afunamizaga kihanga chakwe kwa kumtunya seuta ywakwe akagamba, "Dyelo miye mndima ywako, seuta ywangu, himanya kugamba hizumilwa kwako, kwa kuzumila kulombeza kwangu." 23 Ivo Yoabu, ahalawaga, na kuita Geshuli akamvuze Abisalomu mwo mzi wa Yelusalemu. 24 Mna seuta niyo agamba, "Abisalomu ekale kwe kaya yakwe. Hikuunga kikakaulana." Ivo Abisalomu niyo ekala hale kwe kaya yakwe, naho hamuonaga seuta.

25 Mwe izilaeli yose hakwanda na yeyose atogolwagwa kwa utana enga Abisalomu. Kukongela kwe zinyayo zakwe mpaka mwe difofo dyakwe, Abisalomu handaga na lema dodyose. 26 Yeha mwenye azionaga fili zakwe kugamba zizama, naho andaga akapucha lumwenga mwo mwaka umwo zikanda zikulisa na kumzamila. Uzami akwe wajink'haga kilo mbili viligane ne vihimo ve kiseuta. 27 Abisalomu apataga wana watatu wa kilume hamwenga na ywa kike yumwenga etangwagwa Tamali, Tamali andaga mndele ahombweele vitendese.

28 Ivo, Abisalomu ekala mwo mzi wa Yelusalemu kwa lupisi lwa miyaka miidi haheina kumuwona seuta. 29 Niyo, Abisalomu amwigaila ulosi Yoabu, vileke amsigile kwa seuta, mna Yoabu alemelaga. Abisalomu niyo asigiila naho Yoabu naye niyo alemela naho. 30 Ivo, Abisalomu niyo awagamba wandima wakwe, "Kauleni, Yoabu ana mgunda wa Shaili hagihi no mgunda wangu, iteni mkauwoke." Ivo wandima wa Abisalomu niyo wagenda kuwoka mgunda wa Yoabu.

31 Yoabu niyo aita kaya kwa Abisalomu na kumuuza, "Nii wandima wako woka mgunda wangu?"

32 Abisalomu niyo amhitula Yoabu, "Kaula nehikwigaila ulosi wize uku hutume kwa seuta ukamuuze, ‘Nii nehi halawa Geshuli? Neinda ni vedi kwangu nasigale uuko.’ " "Haluse nambize nimuone seuta. Uneva nna masa mneke anikome."

33 Ivo Yoabu agendaga kumgambila seuta mbuli zose. Seuta naye niyo amwitanga Abisalomu aitaga kwa seuta na kufunamiza kihanga chakwe hasi kwa kumtunya seuta, naye seuta niyo amhokelaga na kumnonela Abisalomu.