1 Ukutimila nuwo ulosi wa kubindiliza wa Daudi.

Mwana Yese,

ulosi wa mnt'hu uyo Mnungu amtendile ande mkulu.

Mnungu ywa Yakobo amsagule Daudi kunda seuta na ulosi wakwe mwe Izilaeli wayaungisaga kuyakema.

2 Muye ywa Mnungu alonga kombokela kwangu,

aikaga ulosi mwo mnomo wangu,

3 Mnungu ywa Izilaeli kagamba,

mwamizi ywa Izilaeli agamba,

"Seuta akuwalongoza want'hu kwa ivo vikuungwa,

alongoza kwa kumogaha Mnungu,

4 yehe ni enga ungazi wa mtondo,

zuwa dikant'hont'homoka hediina mavunde,

heye enga fula ikutenda mani yahote mwe isi."

5 Ivo nivo Mnungu avikile imp'huga yangu.

Kwaviya kadamanya Ndagano ya mazuwa yose na miye,

Ndagano yedi naho ikint'hile.

Yehe nae naakint'hize yose yadya huyaunga.

6 Mna wose hewemmanyize Mnungu ni enga miwa ikuduulwa du,

kwaviya heikudahika kuguhigwa kwa mkono,

7 kutoza vaungwa utoze na kilama hegu mhini wa mjungo.

Want'hu awo nawokigwe pele.

8 Ulu nulo ludongo lwa watowani wadahi andaga nawo Daudi.

Yosheb Bashebeti ywe dikabila dya Takimoni, andaga kilongozi mwa wadya watatu. yehe atoanaga kwa mjungo wakwe, na kuwakoma want'hu magana mnane mwo lupisi lumwenga.

9 Atimilaga mwa wadya watowani watatu andaga Eleazali mwana Dodo ywa lukolo lwa Wahohi. Zuwa dimwenga Eleazali andaga hamwenga na Daudi umwo wandaga wakawahomola Wafilisiti awo wandaga wakeduganya watowane nk'hondo. Waizilaeli wawanyilikaga Wafilisiti. 10 Mna Eleazali akimalaga atogile na kutowana na Wafilisiti vatendaga mkono wakwe walelaga, niyo wanda unamatila mwe sime yakwe. Mwe dizuwa idyo Zumbe Mnungu kakepatila uhumi mkulu. Nk'hondo ize ikimale Waizilaeli wauyaga kudya andaga Eliyazali na kutaha vitahigwa kulawa mwa Wafilisiti wakomigwe.

11 Mtowani mtuhu ywa katatu andaga Shama mwana ywa Agee, Mhalali. Wafilisiti waduganaga uko Lehi, hant'hu handaga na mgunda wa dengu zibindile ingi, Waizilaeli woho wawanyilikaga wafilisiti. 12 Mna uyo Shama akimalaga atogile mgatigati mwo mgunda uwo vileke aukindile, niyo awakoma Wafilisiti. Zumbe Mnungu niyo anda mhumi mkulu.

13 Niyo watowani watatu mwa wadya wakulu milongo mitatu, waseelega mwo msimo wo uvuni niyo wambwiila Daudi mwe mp'hanga uko Adulamu. Mwo lupisi ulwo watowani dya Wafilisiti dyandaga ditowa nk'hambi uko kwe dikolongo dya Lefaimu. 14 Daudi naye mwo lupisi ulwo andaga mwe digomela umwo mwandaga na wamizi mkulu, difyo dya watowani dya Wafilisiti nadyo dyandaga mwo mzi wa Betelehemu. 15 Daudi niyo alonga kwa nk'hwina akudaha kunink'ha mazi, "Hegu nevinda vedi mnt'hu yumwenga anigaile mazi ya kunywa kulawa mwe disima dya Betelehemu, idyo dyandaga hagihi ne nk'hili ya Yelusalemu!" 16 Wadya watowani wakwe watatu wafosaga, wakehenyezaga mgatigati mwe nk'hambi ya Wafilisiti niyo wagenda kuteka mazi mwe disima dya Betelehemu hagihi ne nk'hili yo mzi, na kumwigaila Daudi. Mna Daudi alemelaga kuyanywa amazi ayo, vituhu vakwe ayetilaga hasi enga nt'hambiko kwa Zumbe Mnungu, 17 akagamba, "Zumbe Mnungu, miye hina uwagilwa wowose wa kunywa mazi aya, togola mazi aya hi enga sakame ya wadya wazumilaga hata kubanika?" Ivo Daudi hayanywaga mazi ayo.

Izo nizo zimbuli wadamanye watowani awo watatu.

18 Abishai nduguye Yoabu, mwana Seluya, andaga mkulu ywa watowani milongo mitatu. Yehe atowanaga na mjungo wakwe mwa want'hu magana matatu na kuwakoma, niyo anda katogoleswa mwa wadya watowani watatu. 19 Andaga kamanyikisa mwa wadya watowani milongo mitatu, ivo niyo anda mkulu ywawe, mna hamanyikisaga kujink'ha wadya watatu.

20 Benaya mwana Yehoyada naye kulawa Kabizeli andaga mtowani mdahi, naho adamanyaga mbuli nyingi za vihungi. Awakomaga watowani waidi kulawa Moabu, naho zuwa dimwenga mwo lupisi lwe mp'heho itendese, aseelaga mwe dibome niyo akuikoma isimba. 21 Iviyaiviya adikomaga zint'hu dya Misili. Mmisili uyo andaga na mjungo, mna Benaya amwitilaga akanda na lungu du, amhokaga mjungo uwo na kumkoma Mmisili uyo kwa mjungo wakwe mwenye. 22 Beneya mwana ywa Yehoyada adamanyaga mbuli izi, na kuketunya mwa wadya watowani watatu. 23 Ivo andaga mtowani mdahi mwa wadya watowani milongo mitatu, ikanda handile enga wadya watowani watatu. Na Daudi amwink'haga ukulu wo wamizi wakwe mwenye.

24 Asaheli nduguye Yoabu andaga yumwenga ywa watowani milongo mitatu. Watowani watuhu wa Daudi wandaga, Elihanani mwana ywa Dodo ywa Betelehemu, 25 Shama na Elika kulawa mwo lukolo lwa Mhalodi, 26 Helesi na Mpaliti na Ila na mwana wa Ikeshi kulawa mwo lukolo lwa Mtekoa 27 Abiezeli na Mwanathothi na Mebunai kulawa mwo lukolo lwa Mhushathi 28 Salmoni na Mwahohi na Mahalai kulawa mwo lukolo lwa Mnetofathi 29 Helebu mwana ywa Baana kulawa mwo lukolo lwa Mnetofathi; Itai mwana ywa Libai, kulawa Gibea mwa Benjamini, 30 Benaya na Mpilathoni na Hidai wa vizito vya Gaashi, 31 Abialiboni na Mwalibathi na Azimawethi, kulawa mw lukolo kwa Mbahulimu, 32 Eliyaba na Mshaalboni na wana ywa Yasheni; Yonasani, 33 Shama na Mhalali na Ahimu mwana ywa Shalali kulawa mwo lukolo lwa Mhalali, 34 Elifeleti mwana ywa Ahasbai kulawa Mmaaka; Eliyamu mwana ywa Ahithofeli kulawa Mgiloni, 35 Hezilawi ywe dikabila dya Wakalimeli; Paalai, Mwalibi, 36 Igali mwana ywa Nasani kulawa Soba; Bani kulawa Gadiadi, 37 Seleki na Mwamoni na Nahalai na Mbeelothi wandaga wenula vitowanilo wa Yoabu mwana Seluya,

38 Ila na Galebu, kulawa mwe dikabika dya Waithli,

39 na Ulia uyo Mhiti. Wose hamwenga wandaga watowani wadahi milongo mitatu na mfungate.