1 Aho Ahabu seuta ywa Izilaeli eze abanike, Wamoabu wasagukaga mwa Izilaeli.

2 Seuta Ahazia apalanyukaga kulawa kwe golofa mwe nyumba ye kiseuta uko Samalia, niyo alumilisa. Ivo awatumga want'hu waite kwa Belizebuli mnungu ywa Wafilisiti kwo mzi wa Ekiloni, wakamuuze uneva seuta naahone. 3 Mna mtumigwa ywa kwe mbingu ywa Zumbe Mnungu amgambaga Eliya mlotezi ywa Tishibe, aite kwa wadya want'hu watumigwe ni seuta Ahazia ywa Samalia na kumuuza kugamba, "Nii mwagenda kuuza kwa Beelizebuli mnungu ywa Ekiloni? Togoleni hahali Mnungu mwe isi ya izilaeli? 4 Kamgambileni seuta kugamba Zumbe Mnungu agamba, ‘Houhone zink'wenge zako, kindedi noubanike!’"

Ivo Eliya atendag viligane na ivo Zumbe Mnungu asigiile.

5 Wadya want'hu watumagwa ni seuta weze wauye kwa seuta, seuta awauzaga kugamba, "Nii muuya?" 6 Wamhitulaga wakagamba, "Nekidugana na mnt'hu akigambile kiuye naho kikugambile ivo Zumbe Mnungu alongile, kagamba, ‘Nii kutuma want'hu kwa Beelizebuli mnungu ywa Ekiloni? Togole hehali Mnungu mwe Izilaeli? kwaivo houhone zink'wenge zako, ikindedi noubanike!’"

7 Seuta niyo awauza, "Mnt'hu mdugane niyo awagambila zimbuli izo evivihi?"

8 Niyo wamhitula, "Nakavala valo dya mazoya naho andaga na msipi wa nk'hingo mwe kigudi."

Seuta niyo agamba, "Uyo ni Eliya Mtishibe!"

9 Akajika,seuta atumaga mnt'hu yumwenga mkulu ywa watowani hamwenga na want'hu milongo mishano vileke wamwigale Eliya kwa seuta. Mkulu uyo ambwiilaga Eliya kekala kwo lugulu kulanga, niyo amgamba, "Weye mnt'hu ywa Mnungu seuta akugamba useele uku hasi."

10 Eliya ahitulaga akamgamba yudya mkulu ywe difyo dya watowani milongo mishano, "Kwaviya miye ni mnt'hu ywa Mnungu." "Moto useele kulawa kwe mbingu, ukoke weye na watowani wako milongo mishano!" Aaho moto waseelaga niyo wawakoma wadya watowani hamwenga no mkulu ywawe.

11 Seuta egalaga mkulu mtuhu ywa watowani na want'hu milongo mishano awo wagendaga kumgamba Eliya, "Weye mnt'hu ywa Mnungu, seuta kagamba usunguze kuseela aha!"

12 Eliya niyo agamba, "Kwaviya miye ni mnt'hu ywa Mnungu," "Moto useele kulawa kulanga ukukome weye na watowani wako!" Aaho moto wa Mnungu niyo weza kulawa kulanga na kumkoma yudya mkulu hamwenga na watowani wakwe milongo mishano.

13 Nk'hanana ya katatu, seuta atumaga mkulu mtuhu akanda na watowani milongo mishano. Mkulu uyo akwelaga kwo lugulu niyo akufika madi ha mlotezi Eliya na kumlombeza akagamba, "Weye mnt'hu ywa Mnungu, nionele mbazi miye na awa want'hu wangu awa milongo mishano. Use kukikoma! 14 Wakulu awo waidi wakanda hamwenga na want'hu wawe nawakomwa nu moto ulawile kwe mbingu, mna nionele mbazi miye no ugima wangu!"

15 Mtumigwa ywa kwe mbingu ywa Zumbe niyo amgamba Eliya, "Seela nae naho usekogoha." Ivo Eliya aseelaga na yudya mkulu ywa watowani niyo waitanya kwa seuta. 16 Niyo amgamba seuta, "Zumbe Mnungu agamba ivi. ‘Togola nikwaviya hahana Mnungu mwe isi ya Izilaeli uyo noukadaha kumuuza vikuleka ukawatuma want'hu wakakuuzile kwa Baali zebubu, mnungu ya Ekiloni? Kwaaya udamanye, ikindedi houhone noubanike!’"

17 Ahazia abanikaga enga ivo Zumbe Mnungu alongaga kwombokela Eliya. Kwaviya Ahazia handaga na mwana kilume, Yolamu uyo nduguye niye andaga seuta hant'hu ha Ahazia nduguye. Ino yalailaga mwo mwaka wa kaidi wo kwikaila kwakwe Yelohamu mwana Yehoshafati seuta ywa Yuda.

18 Vint'hu vituhu vose adamanyaga seuta Ahazia vawandikagwa mwe kitabu cha usimi wa maseuta wa Izilaeli.