1 Umwo Zumbe andaga hagihi na kumguha Eliya amwigale kwe mbingu mwe mp'heho ya kazimu, Eliya na Elisha wandaga wakaita Giligali. 2 Eliya niyo amgamba, "Elisha wikale aaha kwaviya Zumbe Mnungu akanituma niite Beseli."

Mna Elisha niyo amhitula akamgamba, "Nakelisa kwa zina dya Zumbe na kwa zina dyako kugamba hikukuleka." Ivo niyo waitanya mpaka Beseli.

3 Fyo dya walotezi dyandaga dikekekala hadya wamgambaga Elisha, "Ivi kuvimanya kugamba Zumbe naamsamize kwako mkuluwo Elisha ivi dielo?"

Elisha ahitulaga, "Heiye himanya." "Mna nyamaleni."

4 Naho Eliya niyo amgamba, "Elisha wikale aaha kwaviya Zumbe Mnungu kanituma niite Yeliko."

Mna Elisha niyo amhitula, "Nakelisa kwa zina dya Zumbe mta udahi na weye mwenye ivo wili, hehuleke." Ivo niyo waitanya mpaka Yeliko.

5 Fyo dya walotezi wandaga wakekala hadya wambasaga Elisha niyo wamgamba, "Togola kuvimanya kugamba Zumbe naamuse kwako Elisha mkuluwo ivi diyelo?"

Elisha niyo awahitula. "Heiye himanya." "Mna nyamaleni."

6 Eliya niyo amgamba Elisha, "Weye wikale aaha kwaviya Zumbe Mnungu akanituma niite kwo mto Yolodani."

Mna Elisha niyo amhitula akamgamba, "Nakelisa kwa zina dya Zumbe mta udahi na kwa weye mwenye ivo wili, hehuleke." Ivo wagendeelaga wose waidi, 7 want'hu milongo mishano wana wa walotezi, wawatimilaga niyo wakimaala kwa luhale wakakaula aho Eliya na Elisha wandaga hagihi no mto Yolodani. 8 Eliya ahambulaga valo dyakwe niyo ayatowa amazi yo mto ne divalo. Mazi yakepanga kulume na kumoso woho niyo kudendeluka wakomboka hant'hu haheina mazi mwo mto uwo. 9 Weze womboke, Eliya niyo amgamba, "Nigambile kiya ukuunga hutendele iivi haluse nikei kuuswa kwako."

Elisha niyo amhitula, "Miye nink'hwe hant'hu haidi yo udahi we kilotezi vileke ninde mkipe ywako."

10 "Kulombeza kint'hu kidala." "Hamwenga na ayo noupate uneva unaniona umwo hauswa kwako, huna nione houpate."

11 Naho umwo wandaga wakagenda uku wakasimwiila, aaho kwezaga gali dya moto dikugendezwa ni falasi za moto niyo zawapanga wadya waidi, Eliya naye aguhigwa ni mp'heho ya kazimu kuita kulanga kwe mbingu. 12 Elisha avionaga ivo niyo amwiila Eliya akagamba, "Ho tatee!, Ho tatee! Mwamizi mdahi ywa Izilaeli kuhalawa!" Elisha hamuonaga Eliya naho. Elisha niyo atoza zisuke zakwe na kuzilwebula vilebetu viidi. 13 Akajika alogotaga divalo dya Eliya dyahambukaga. Auyaga na kugenda kukimaala mwo lwega lwo mto Yolodani. 14 Ayatowaga amazi ne divalo dya Eliya niyo agamba, " Ekuhi Zumbe Mnungu ywa Eliya?" Naho eze ayatowe mazi ne divalo dya Eliya, mazi niyo yakepanga haidi, naye ombokelaga haheina mazi. 15 Kwandaga na kafyo ka walotezi wa Mnungu walawaga Yeliko, weze wamuone kwa luhale, wamgambaga, "Udahi we kilotezi wa Eliya umwa Elisha!" Wamwiitilaga niyo wakefunamiza ha Elisha. 16 Niyo wagamba, "Suwe wandima wako kinanawo want'hu milongo mishano wata ludole, aha. Goja kiwatume wakamzungule zumbe ywako, mafani Muye ywa Mnungu amwinulaga niyo agenda kumwiika he diwandamo dyo mnina umwenga hagu mwe dikolongo dyodyose."

Elisha niyo awahitula akawagamba, "Bule msekuwatuma,"

17 Mna woho wamtigizaga niyo aona soni, ivo awagambaga wadya want'hu milongi mishano wakamzungule mna hawamuonaga. 18 Wauyaga Yeliko, Elisha naye andaga akei uuko, niyo awagamba, "Togoleni hyawagambileni msekugenda kumzungula?"

19 Want'hu wo mzi wa Yeliko wambasaga Elisha niyo wamgamba, "Enga ivo ukuona, mzi uno hiyo wedi, mna mazi yakwe yaiha naho yaitenda sanga isekunda na ulozo."

20 Elisha niyo awagamba, "Geleni wazunyu mwo lwiga niyo mwanigaila." Ivo wamwigailaga uwo umunyu, 21 yehe aitaga nawo umunyu uwo kwe n'choko niyo aumyaga uwo umunyu umwo mwa mazi akagamba, "Zumbe agamba ivi, ‘Hiyahonya mazi aya, hayatende ukomi hegu sanga nayo heiswese ulozo.’" 22 Kukongela aho, mazi yadya yandaga yahonywa viligane no ulosi udya alongile Elisha.

23 Akalawa aho, Elisha aitaga mpaka Beseli, umwo mwe sila Elisha abwiilanaga na wabwanga wamtendelaga lubezo wakamgamba kwa kuvuzagiza, "Weye mta kihala."

24 Elisha awahitukilaga wadya wabwanga niyo awaligita kwa zina dya Zumbe Mnungu. Niyo yalaila masangalugembe maidi kwe mbago. Yawatatulaga tatulaga wabwanga milongo mine na mbili mwa awo.

25 Akalawa hadya Elisha Aitaga kwo mnima wa Kameli, naho niyo auya uko Samalia.