1 Mkaziwe dya mnt'hu yumwenga andaga yumwenga mwa kafyo ka walotezi amwiitilaga Elisha niyo amgamba, "Mnumangu kabanika, enga uvo umanyize, nakanda mnt'hu ywa Zumbe, naho haluse keza mnt'hu naakamtigiza matundu, aunga awaguhe wanangu akawatende watumwa kwakwe kwaviya ya ayo matundu ya mnumaangu."

2 Elisha niyo amuuza, "Hutendelei? Uko kaya una kint'hu chani?"

Yudya mvele niyo agamba, "Hina chochose, ila wavuta wageke du mwa kasupa."

3 Elisha niyo amgamba, "Ita kwa want'hu mkwikalanya hagihi niyo wawalombeza nyungu nyingi heziina kint'hu kwa ivo nouvipate, 4 akajika weye na wanawo, mwiite kwe nyumba na kuvugala ulwivi. Kongeni kugida mavuta mwe zinyungu izo. Kila nyungu neimeme iikileni hank'handa."

5 Mvele uyo ahalawaga ha Elisha niyo akukevugaila kwe nyumba yehe na wananwe, na kukonga kugida mavuta ayo mwe zinyungu izo. 6 Nyungu izo zize zimeme, mvele yudya amgambaga mwana yumwenga amwigaile nyungu nt'huhu. Umwana niyo amgamba, "nyungu zisila, zose zimema." Ayo mavuta nayo niyo yaleka kukegida mwe nyungu iyo. 7 Yudya mvele amuuiyaga naho Elisha mlotezi ywa Mnungu. Elisha naye amgambaga, "Kachuuze mavuta ayo ulihe mtigizo uwo, ayo nayasigale yande yenyu na wanawo mwe nyumba."

8 Zuwa dimwenga Elisha aitaga Shenemu uko ekalaga kwa mvele yumwenga mgoli, mvele uyo amlalikaga Elisha kwo ludyo. Naho kukongela aho na kugendeela kila aho ezaga Shenemu, Elisha andaga akenk'higwa nk'hande aaho ho uyo mvele. 9 Uyo mvele niyo amgamba mgosiwe, "Miye naona kindedi kugamba, uyo mnt'hu akwiza aha luholuho, uyu ni mnt'hu akukile ywa Mnungu. 10 Kimzengele chumba uko kwe golofa niyo chamwiikila lusazi na meza na fumbi na lumuli. Vileke kila mwenye akakitalamkila naahumulage umwo."

11 Zuwa dimwenga Elisha eze eze, akwelaga kwe chumba icho kwe golofa niyo akehumuza umo. 12 Amgambaga Gehazi mndima ywakwe akamwitange Yudya mvele, yudya mvele Mshunami ezega na kukimala halongole ha Gehazi. 13 Elisha niyo amgamba Gehazi, longa naye ivi, "Kaula weye kukitendela uwedi utendese, ivo utendelwei?." Togola ulombezelwe ulosi kwa seuta hegu mkulu ywe difyo dya watowani, yudya mvele niyo ahitula,

"Miye nekala mwa want'hu wangu mwenye."

14 Elisha niyo amuuza Gehazi , "Haluse atendelwei elo?"

Gehazi niyo amgamba, "Uyu mvele hana mwana, naho mgosiwe kadalahala."

15 Elisha niyo amgamba, "Hake mgambe eze." Yudya mvele ezaga niyo akimala ho lwivi, 16 Elisha niyo amgamba uyo mvele, "Lupisi enga ulu mwo mwaka ukwiza nouwinule mwana kilume mwe mikono yako."

Yudya mvele etukaga niyo agamba, "Ha!" "Mkulu nakulombeza use kunidant'hiliza miye mndima ywako, weye ywi mnt'hu ywa Mnungu!"

17 Yudya mvele enulaga ubovu niyo engila nyumba mwana kilume mwo lupisi uludya agambilwagwa ni Elisha.

18 Yudya mwana eze akule, zuwa dimwenga aitaga kwe nk'honde akamwambize ise uko andaga hamwenga na wavuni. 19 Aaho yudya mwana akongaga kuila akamgamba ise, "Hoo mtwi wangu waluma! Hoo mtwi wangu waluma!"

Ise niyo amgamba yumwenga mwa wavuni wakwe, "Mwinule umwigale kwa nine."

20 Yudya mvuni amwigalaga yudya mwana kwa nine, nine niyo amtambalika mwa mavindi yakwe mpaka nomsi mwana uyo niyo abanika. 21 Yudya mvele amwinulaga umwana niyo akumtambalika kwo lusazi lwa yudya mnt'hu ywa Mnungu, niyo avugala ulwivi na kufosa kuse. 22 Amwitangaga mgosiwe akamgamba, "Nitumile mndima yumwenga ne mp'hunda. Naunga nisunguze kuita kwa mlotezi Elisha naho nenisunguze kuuya."

23 Mgosiwe niyo amuuza, "Nii uite dyelo?" "Dyelo hiyo zuwa dya kuhumula hegu dya kulawa mnenge."

Mna niyo amgamba mkaziwe, "Ni vedi." 24 Ekalaga mwe mp'hunda niyo amgamba yudya mndima, "Itende imp'hunda igulukise, usekuhungula lugendo mpaka aho nohugambile." 25 Ivo ahalawaga na kuita kwo mnima wa Kalimeli uko andaga mnt'hu ywa Mnungu.

Elisha amuonaga yudya mvele umwo andaga akei hale, niyo amgamba Gehazi mndima ywakwe, "Kaula yudya mvele kulawa Shunami eza. 26 Sunguza umgulukile ukamuuze ugima wakwe na ugima wa mnumewe hamwenga na wa mwanawe."

Yudya mvele amgambaga Gehazi kugamba kaya kwandaga ni kwedi du, 27 mna eze abule kwa mnt'hu ywa Mnungu kudya kwo mnima, amtozaga iviga. Gehazi aungaga amuuse, mna yudya mnt'hu ywa Mnungu niyo amgamba, "Mneke, mvele uyu ana usungu mwo moyo. Zumbe naye hanigambile mbuli ino."

28 Mvele yudya niyo amgamba Elisha, "Togola zumbe ywangu, miye nehi kulombeza mwana? Miye hyakugambile use kunink'ha makawiilo?"

29 Elisha amhitukilaga Gehazi niyo amgamba, "Sunguza! Guha ingoda yangu hugendela wiite. Use kukimaala hegu kulamsa mnt'hu yeyose nombwiile mwe sila, naho use kumhitula yeyose akukulamsa. Weye wiite ulo ni ulo kwe nyumba, niyo wakuitambalika ingoda mnanga mwo mwana uyo."

30 Yudya mvele niyo agamba, "Nakelisa kwa zina dya Zumbe mta udahi na kwa weye mwenye ivo wili hikuhalawa aha hakwasa weye!" Ivo Elisha auyaga hamwenga na yudya mvele. 31 Gehazi alongolaga niyo ailambalika idya ingoda mnanga mwo mwana mna hakwandaga na kilagiso chochose cha ugima, auyaga na kubwilana na Elisha akamgamba, "Mbwanga hauyuke."

32 Umwo Elisha eze abule, amuonaga yudya mwana atambale mwo lusazi kabanika. 33 Avugalaga ulwivi niyo amlombeza Zumbe Mnungu, 34 akelambalikaga mnanga mwo yudya mwana. Aikaga mnomo wakwe mnanga mwo mnomo wo mwana, meso yakwe mwa meso yo mwana, mikono yakwe mnanga mwe mikono yo mwana. Eze akechuluile mwo mwana, umwili wo mwana niyo wakonga kubwikana. 35 Elisha enukaga niyo agenda akazunguluka mwe chumba, niyo agenda kukelambalika naho mnanga mwa yudya mwana abanike. Yudya mwana atowaga myasi nk'hanana mfungate niyo afinyula meso yakwe. 36 Elisha amgambaga Gehazi amwitange nine dyo mwana. Eze eze, Elisha niyo amgamba, "Mguhe mwanao uyo." 37 Yudya mvele engilaga kwe nyumba niyo afunamiza mtwi wakwe hasi he viga va Elisha kwa kumtunya, niyo amguha mwanawe na kukeitila.

38 Elisha auyaga Giligali, mna mwe isi iyo kwandaga na gumbo. Zuwa dimwenga umwo andaga akawahiniza wanamp'hina wa walotezi, amgambaga mndima ywakwe ateleke nyungu nk'hulu mwe diziko vileke awafizile uji walotezi wavate. 39 Yumwenga ywaywe agendaga kwaha mboga kwe nk'honde niyo aona mabungubungu. Ayahaga niyo amemeza mwe suke yakwe aibilinge. Ezaga nayo niyo ayadangila dangila mwe nyungu yo uji haheina yeyose amanyaga. 40 Ivo want'hu nawapangilwa uji uwo, weze walume niyo waguta lukunga kwa Elisha wakamgamba, "Elisha mnt'hu ywa Mnungu, nk'hande ino neikikome!" naho hawadahaga kuidya ink'hande iyo. 41 Elisha asigiilaga egailwe unga, eze egailwe augelaga mwe nyungu niyo agamba, "Haluse womoele ink'hande wadye." Weze wadye hakulaile dyodyose diihile mwe nk'hande iyo.

42 Mnt'hu yumwenga ezaga kulawa Baali Shalisha, mnt'hu uyo amwigailaga Elisha mnt'hu ywa Mnungu, mikate milongo miidi ya shaili ya limbulwe, ne zifundo ze shaili mp'ya. Elisha amgambaga mndima ywakwe apangile idifyo diya dya walotezi vileke wadye. 43 Mndima ywakwe niyo amuuza, "Neniipange vivihi ink'hande ino kwa want'hu gana? Elisha niyo agamba, wenk'he wadye, kwaviya Zumbe Mnungu kagamba nawadye na kwiguta naho kituhu nekisigale"

44 Ivo mndima ywakwe awatengelaga nk'hande, wose niyo wadya na kwiguta naho niyo wasigaza viligane na ivo Zumbe alongile.