1 Mwo mwaka wa mlongo na mbili wo useuta wa seuta Ahazi ywa Yuda, Hoshea mwana Ela akongaga kwikaila Izilaeli, alongozaga Samalia kwa miyaka kenda. 2 Adamanyaga wavu ha Zumbe Mnungu hamwenga na kugamba hiyo enga maseuta wa Izilaeli wamlongoelaga. 3 Seuta Shalimanesa ywa Asilia amtowaga, Hoshea naye niyo anda mndima ywakwe na kumliha kodi kila mwaka. 4 Mna mwo lupisi lutuhu Hoshea seuta ywa Asilia asigilaga wegala ulosi kwa seuta ywa Misili akalombeza wambizi, niho alekaga kumliha kodi seuta Shalimanesa ywa Asilia enga ivo azoele kutenda kila mwaka. Shalimanesa eze aone ivo amnyinyaga Hoshea kwa minyololo na kumwiika kwe divugailo.

5 Niyo seuta ywa Asilia aikump'hukila isi na kuubwiila mzi wa Samalia na kuuzunguluka kwa miyaka mitatu. 6 Mwo mwaka wakenda wo useuta wa Hoshea, seuta ywa Asilia aitahaga Samalia na kuwataha want'hu wa Izilaeli niyo awegala Asilia, wamwenga wawe waikagwa mwo mzi wa Hala, watuhu nawo waikagwa hagihi no mto Haboli, na mto Gazani, watuhu mwe mizi ya Media.

7 Aya yose nayadamanyika kwa viya want'hu wa Izilaeli wamlekaga Zumbe Mnungu ywawe, uyo awalavaga mwo udahi wa seuta ywa Misili, naho wavikaga milungu mituhu, 8 na kutimila sila ze isi nt'huhu izo Zumbe Mnungu azigulusaga ha Waizilaeli, na kwigala vihendo vigalwe mwe isi ni maseuta wa Izilaeli. 9 Want'hu wa Izilaeli wadamanyaga kwa kinyele mbuli ziihile ha Zumbe Mnungu ywawe. Wazengaga hant'hu ha kuvikila milungu yo udant'hi mwa kila mzi uko kwe milima, kukongela mwo mnala wa wamizi, mwo mgunda mpaka kwo mzi una gomela. 10 Niyo wazengaga mikola ya maiwe ya kuvikila na mahili ya Maashela mwe kila mnima mtali na hasi ha kila mti uvamilize, 11 na kufunk'hizila ubani mwe vilingo vose ve milungu yawe yo udant'hi kutimila vihendo ve ziisi izo zagulusagwa ni Zumbe Mnungu kwa udamanyi wawe wiihile, 12 nawadamanyila ndima mahili, ayo Zumbe Mnungu awalemezaga akawagamba, "Msekutenda ivo."

13 Zumbe Mnungu asigiilaga walotezi kuikanya Izilaeli na Yuda akagamba, "Lekeni sila zenyu ziihile na kuzumila miko yangu na malagizo yangu viligane ne miko niwenk'hile watati zenyu, na iyo niwenk'hileni kombokela kwa wandima wangu walotezi." 14 Mna woho hawazumilaga, wandaga wank'hani enga watati zawe awo wamlemelaga Zumbe Mnungu, Mnungu ywawe. 15 Walemelaga kuzumila malagizo yakwe, hawatozaga Ndagano aikaga na watati zawe, naho hawazumilaga makanyo yakwe. Wavikaga mahili kwaviya hata woho wenye nawo niyo wanda hiyo kint'hu naho, watimilaga vihendo ve isi ziwazunguluke. Wailekaga miko ya Zumbe Mnungu, naho hawaitimilaga. 16 Wabanangaga miko yose ya Zumbe Mnungu, na kudamanya mahili ya ndama mbili za kulungulumla, iviya iviya wadamanyaga mahili ya mnungu ywe kivele Ashela, niyo wavika na vint'hu vose va ung'azi vimwo ulanga na kumdamanyila ndima Baali. 17 Wawalavaga wana wawe we kilume na wa kike kunda nt'hambiko kwe milungu yo yo udant'hi, waungaga ulangilizi kwa walotezi na wasai. Wakambilaga kudamanya wavu ha Zumbe Mnungu, na kumuihia vitendese. 18 Ivo, Zumbe Mnungu awaihiaga want'hu wa Izilaeli na kuwagulusila hale, naho hakwandaga na mnt'hu asigalaga mna ni dikabila dya Yuda dikedu du.

19 Mna hata want'hu wa Yuda hawazumilaga miko ya Zumbe Mnungu, Mnungu ywawe, mna watimilaga vihendo valetagwa ni want'hu wa Izilaeli. 20 Zumbe Mnungu awalemelaga Waizilaeli wose, awasengelaga na kuwaleka mwa wank'hondo wawe, naho niyo awagulusa hakwe.

21 Umwo Zumbe Mnungu awapagulaga want'hu wa Izilaeli kulawa mwo lukolo lwa Daudi, wamwiikaga Yeloboamu mwana Nebati kunda seuta. Yeloboamu naye awatendaga want'hu wa Izilaeli wamleke Zumbe na kudamanya wavu mkulu. 22 Waizilaeli wadamanyaga wavu adamanyaga Yeloboamu, hawadahaga kuuleka, 23 mpaka Zumbe Mnungu awagulusaga kulawa hakwe, enga ivo alongaga kombokela wandima wakwe wose na walotezi. Kwaivo want'hu wa Izilaeli watahagwa kulawa mwe isi yawe wenye niyo wegalwa Asilia uko wakwikala hata ivi haluse.

24 Niyo seuta ywa Asilia aguha want'hu kulawa Babeli, Kuta, Ava na Hamati na Sefalvaimu na kuwaika mwe mizi ya Samalia hant'hu ha Izilaeli awo wegalagwa kwo utumwa. Waikailaga mizi iyo na kwikala uumo. 25 Ivo weze wakonge kwikala umo, hawamvikaga Zumbe Mnungu, kwaivo Zumbe Mnungu atumaga simba kwawe, niyo wamwenga wakomwa. 26 Want'hu wamgambilaga seuta ywa Asilia, "Si uziguhile na kuziika mwe mizi ya Samalia hawamanyize usengelo wa Mnungu ywe isi iyo, kwaivo Mnungu katuma simba izo zikuwakoma." 27 Niyo seuta ywa Asilia agamba, "Mvuzeni mlavant'hambiko yumwenga mwa wadya watahigwe, mvuzeni akekale uuko vileke awahinize want'hu miko ya Mnungu we isi iyo." 28 Kwaivo yumwenga mwa walavant'hambiko watahigwe kulawa Samalia aitaga niyo ekala Beteli, uko nuko awahinizaga want'hu ivo vikuungwa mwo kumvika Zumbe Mnungu.

29 Mna want'hu we isi zose mwe mizi iyo wandaga wakakedamanyila milungu yawe na kuiika hant'hu henuke aho want'hu wa Samalia wahadamanyaga. 30 Want'hu wa Babeli wadamanyaga mahili ya Sukot Benoti. Want'hu wa Kuti wadamanyaga mahili ya Negali. Wahamati wadamanyaga mahili ya Ashima. 31 Want'hu wa Avi wadamanyaga mahili ya Nibihazi na Tataki. na Wasefalivaimu wawalavaga wana wawe kunda malavo ya kokwa kwe milungu yawe ya Adulameleki na Anameleki. 32 Want'hu awa iviyaiviya wamvikaga Zumbe Mnungu. Wawasagulaga want'hu kwa kila kabila kuwatenda walavant'hambiko kudamanyila ndima hant'hu henuke na kulava malavo uko kwaajili yawe. 33 Ivo wamvikaga Zumbe Mnungu, mna mwo lupisi uulo waivikaga milungu yawe waiguhaga kulawa mwe isi zawe.

34 Hata ivi haluse wadamanya enga ivo wandaga wakadamanya aho nk'hongo. Hawakumvika ivo vikuungwa Zumbe Mnungu hegu kutimila malagizo na miko iyo Zumbe Mnungu awasigiile wana Yakobo, uyo amwink'haga zina dya Izilaeli. 35 Zumbe Mnungu aikaga Ndagano nawo na kuwasigiila akawagamba, "Mse kuivika milungu mituhu, naho mse kuidamanyila ndima hegu kuilavila nt'hambiko. 36 Nomnivike miye Zumbe Mnungu, niwalaveni mwe isi ya Misili kwa udahi mkulu. Nomnivike miye na kunilavila nt'hambiko. 37 Mwo lupisi lwose nomzumile sigilizi zangu, ne miko muwandikilwe nyuwe, mazuwa yose nomnde na wengele na kudamanya. Mse kuivika milungu mituhu mbwitu, 38 hegu msekujala Ndagano yangu niikile na nyuwe, naho mse kuvika milungu mituhu, mna 39 nomnivike miye Zumbe Mnungu, miye name neniwayokoleni kulawa mwa wank'hondo wenyu." 40 Mna want'hu awo hawazumilaga, vituhu vakwe wagendeelaga kudamanya enga ivo wadamanyaga aho nk'hongo. 41 Ivo want'hu awo wamvikaga Zumbe Mnungu, mna naho wayavikaga mahili yawe. Naho mpaka ivi haluse, welekwa wawe wadamanya enga ivo wadamanyaga wakale wawe.