1 Seuta Hezekia eze eve mbuli izo, alwebulaga mavalo yakwe niyo avala mavalo ya gunia niyo engila mwe Nyumba ya Zumbe Mnungu. 2 Awalagizaga Eliyakimu mkulu ywe nyumba ya kiseuta na Shebina na muwandisi na wadala wa walava nt'hambiko waite kwa mlotezi Isaya mwana Amozi wakanda wavala mavalo ya magunia. 3 Niyo wamgamba Isaya, Hezekia agamba ivi,"Dielo ni zuwa dya kinyulu, ni zuwa dya kukanywa na dya lubezo. Suwe kinda enga mvele akuunga engile nyumba mna ludole lumsiila. 4 Vadahika Zumbe Mnungu, Mnungu ywako keva ulosi wa wakulu uyo ywa watowani atumwagwa ni seuta ywa Asilia, zumbe ywakwe vileke amhomole Zumbe Mnungu mta udahi, naye Zumbe Mnungu, Mnungu ywako naakanye kwa ulosi uwo evile. Kwa ivo lombeza kwajili ya want'hu wasigale."

5 Ivo wadya wandima wa seuta Hezekia weze wabule kwa Isaya, 6 eze awategeleze niyo awagamba, "Mgambileni zumbe ywenyu kugamba Zumbe Mnungu agamba ivi, ‘Usekogoha kwa yadya wivile ayo wandima wa seuta wa Asilia walongaga kwa kunibela. 7 Kaula nenimtende seuta eve mbuli ikuunga imtende auye kwe isi yakwe, uko nako naakomwe kwa bamba.’"

8 Ivo yudya kulu ywa mtowani eze eve kugamba seuta ywa Asilia andaga kahalawa Lakishi, ahalawaga na kumbwiila akautowa mzi wa Libina. 9 Akajika seuta eze eve kugamba Tilihaka seuta ywa Kushi eza atowane naye, atumaga want'hu kwa Hezekia wakagamba, 10 "Mgambileni Hezekia seuta ywa Yuda, usekuzumila Mnungu ywako ukumdamanyila ndima akudant'hilize akakugamba, mzi wa Yelusalemu houtahigwe ni seuta ywa Ashulu. 11 Weye kwiva ivo watendaga maseuta wa Asilia mwe isi zose niyo wazibananga pele. Togola wagamba weye nouyokolwe? 12 Togola milungu ya mwe isi yayokolaga Gozani na Halani na Lesefu na Waedeni wekale Telasali na si izo wakale wangu wabanangaga pele? 13 We kuhi maseuta wa Hamati na Alipadi na Sefalifaimu na Hena na Iva?"

14 Seuta Hezekia ahokelaga baluwa kulawa kwa wegala ulosi niyo waisoma. Niyo aita na kwingila mwe Nyumba ya Mnungu, naye aikunjulaga ha Zumbe. 15 Niyo amlombeza Zumbe Mnungu akagamba, "Weye Zumbe Mnungu, Mnungu ywa Izilaeli, ukwikala mwe difumbi dyo useuta hagati ye viumbwa wata mawawa wakwitangwa makelubi, ni weye du wili Mnungu, ukulongoza useuta wose we isi zose. Weye niweye waumbaga mbingu ne isi. 16 Weye Zumbe Mnungu tegeleza wive, kaula uone. Tegeleza wive zimbuli izo Senakelibu atumile kumhomola Mnungu mta udahi. 17 Weye Zumbe Mnungu ni kindedi kugamba maseuta wa Asilia wabananga want'hu wa si na isi zawe. 18 Waduulaga milungu yawe mwo moto kwaviya yandaga hiyo ya kindedi, iyo yandaga ni mahili ye miti na maiwe du yasongolwagwa na mikono ya want'hu. 19 Haluse weye Zumbe Mnungu, Mnungu ywetu nakulombeza ukiyokole kulawa mwo udahi wa Senakelibu, useuta wose wa mwe isi umanye kugamba ni weye wikedu, Zumbe Mnungu."

20 Ivo Isaya, mwana Amozi atumaga ulosi kwa Hezekia akagamba, nivo alongaga Zumbe Mnungu, Mnungu ywa Izilaeli, Hiva kulombeza kwako mwa Senakelibu seuta ywa Asilia. 21 Uno nuwo ulosi uwo Zumbe alongile mwa Senakelibu, "Akubela weye mwali na mazanga ywa Sayuni, naho akung'ong'a kunyuma kwako weye mwali na mazanga ywa Yelusalemu. 22 Togola wafanyanya ni ani ukumhomola? Ni ani umwinuile izwi na kumwinuila meso yako ya kasidi? Ni yehe Akukile ywa Izilaeli. 23 Kwa kuwatuma wegala ulosi kumbela Zumbe, weye kugamba, kwa magali yangu mengi ya nk'hondo hikwela mwe vigulu mpaka mwo lugulu lwa Lebanoni. Hilemela mielezi yakwe mitali na misonobali yedi, hingila mpaka mndani mwakwe naho mndani mwe zimbago zakwe zink'hulu. 24 Hisimba masima mwe isi ya watakwiza na kunywa mazi yakwe, kwa nyayo za viga vangu nanyazaga nc'hoko zose za Misili.

25 "Togola hwivile kugamba napangaga mbuli ino kokongela aho nk'hongo? Iki hudamanya haluse napangaga kukongela aho kale. Nakuikaga uihitule mizi ya magomela kunda kiumbiko cha maiwe. 26 Want'hu wakwe wakanda hawana ludole wafa chevu naho wana kinyulu, Wanda enga vihandwa kwe nk'honde, enga masukiza mateke yadegede, enga mani yakuhota kulanga kwe nyumba, yanyaile yakanda yakei kukula. 27 Mna miye namanya kwikala kwako na kwinuka kwako na kwingila kwako na ivo wili na maya kwajili yangu. 28 Kwaviya kunifiila maya naho hiva kukeduvya kwako, naika nduwano yangu mwe mp'hula yako na lijamu mwo mnomo wako. Nehuvuze mwe sila iidya wizile nayo."

29 Niho Isaya amgambaga seuta Hezekia, "Ino neinde kilagiso kwako Hezekia. Mwaka uno na momdye chehotele, mwaka wa kaidi nomdye mabotela. Mna mwo mwaka wa katatu nomhande na kuvuna ulozo, nomhande mizabibu na kudya matunda yakwe. 30 Wadya wasigale mwo lukolo lwa Yuda nawagenyele na kunda wengi enga ivo mti ukulava maizi mwo ulongo na kweleka matunda kwa matambi. 31 Kwaviya nokunde na want'hu wakusigala uko Yelusalemu na uko kwo mnima wa Sayuni nakunde na want'hu wasigale. Wivu wa Zumbe nuwo noukint'hize mbuli ino.

32 "Ivi ivo akulonga Zumbe, mwa seuta ywa Asilia, ‘Heengile mwo mzi uno hegu kulasa msale aha. Heeze ho mzi akanda na nk'hindo, naho haaike watowani wakwe wazenge mdando. 33 Naauye kwa sila iidya ezile nayo, naho heengile mwo mzi uno. Ivi nivo akulonga Zumbe Mnungu . 34 Ivo kwaajili ya nt'hunyo yangu miye, naho kwaajili ya ivo namlagene mndima ywangu Daudi neni wamile mzi uno.’"

35 Ivo kilo ikia mtumigwa ywa kwe mbingu ywa Zumbe engilaga mwe nk'hambi ya Wasilia na kuwakoma want'hu laki imwenga na milongo mnane na shano. Watowani wasigale weze wenuke nomtondo waonaga vimba du kila hant'hu. 36 Ivo Sena kelibu seuta ywa Asilia ahalawaga niyo akeitila na kugenda kwikala Ninawi. 37 Zuwa dimwenga umwo Sena kelibu andaga akavika mwe nyumba ya Nisiloki mnungu ywakwe, wanawe waidi Adilameki na Shalezeli wamkomaga kwa bamba, niyo wagulukila mwe isi ya Alalata. Niyo Esar-Hadoni mwanawe eguha hant'hu ha ise kunda Seuta.