1 Mwo mwaka wa katatu wo kwikaila kwakwe Hoshea mwana wa Ela seuta ywa Izilaeli, Hezekia mwana Ahazi seuta ywa Yuda akongaga kwikaila. 2 Hezekia akongaga kwikaila akanda na miyaka milongo miidi na kenda uko Yelusalemu. Nine andaga niye Abiya mwana Zakalia. 3 Seuta Hezekia adamanyaga yakumwelela Zumbe enga ivo atendaga umkale ywakwe Daudi. 4 Amolaga hant'hu ha kuivika milungu ha want'hu hewekumvika Zumbe Mnungu, niyo abogozola mikola ya maiwe, naho ayatulagatulaga mahili ye milungu ya Ashela, hamwenga ne inyoka ye shaba yadamanywagwa ni Musa iyo neiketangwa Nehushitani. Kubula mwo lupisi ulo Waizilaeli wandaga wagendeela kuyokela ubani kwa kuitunya. 5 Hezekia amkawiilaga Zumbe Mnungu ywa Izilaeli. Hakwandaga na yumwenga enga yehe mwa maseuta wa Yuda wamolaga hata aho useuta wakwe wize womboke. 6 Yehe hasaguke kulawa kwa Zumbe Mnungu hegu kuleka kumhuwila. Yehe atimilaga imiko ya Mnungu iyo amsigiile Musa kwajili ya want'hu wa Izilaeli. 7 Ivo Zumbe Mnungu andaga hamwenga naye, adahaga kudamanya na kupata mwe kila icho naakaunga. Hezekia asagukaga kulawa kwa seuta ywa Asilia naho hamdamanyile ndima. 8 Awatowaga Wafilisiti mpaka mzi wa Gaza na isi iwazunguluke, kukongela kwo mnala mpaka kwo mzi una gomela. 9 Mwo mwaka wa kane wo useuta wakwe Hezekia, uwo wandaga mwaka wa mfungate wa Hoshea mwana Ela seuta ywa Izilaeli, Shalimanesa ywa Asilia agendaga kuutowa mzi wa Samalia na kuuzungulukila na watowani. 10 Miaka mitatu ize yomboke, Wasilia wautahaga umzi. Ivo Samalia noutahigwa mwo mwaka wa mtandatu wo useuta wa Hezekia, uwo wandaga mwaka wa kenda wo kwikaila kwakwe Hoshea seuta ywa Izilaeli. 11 Seuta ywa Asilia awasamizilaga Waizilaeli uko Asilia niyo awaika wamwenga wawe uko Hala, na Gozani hagihi no mto Haboli, watuhu mwe mizi ya Wamedi.

12 Aya yalailaga kwaviya Waizilaeli hawatimilaga yadya alongaga Zumbe Mnungu ywawe, mna wabanangaga Ndagano na yose yadya Musa mndima ywa Zumbe Mnungu asigiilaga. Woho hawamwivaga na kuyatimila.

13 Mwo mwaka mlongo na kane mwo kwikaila seuta Hezekia seuta Senakelibu ywa Asilia aitahaga mizi yose ya Yuda ina magomela. 14 Ivo Hezekia seuta ywa Yuda amwigailaga ulosi seuta ywa Asilia uko Lakishi akagamba, "Hidamanya lema. Halawe he isi yangu, miye nohulihe chochoe icho nouunge kwangu." seuta ywa Asilia atozaga Hezekia seuta ywa Yda talanta magana matatu ya masawa,na talanta milongo mitatu ya zahabu. 15 Hezekia niyo amwink'ha masawa yose yandaga mwe Nyumba ya Zumbe Mnungu na kwe kindolo cha seuta. 16 Mwo lupisi ulo Hezekea abandulaga zahabu yose yandaga ikizigwa mwe zinyivi na mwe mikimailo ye zinyivi ze Nyumba ya Zumbe niyo amwink'ha zahabu yose seuta Senakelubi ywa Asilia. 17 Seuta ywa Asilia atumaga mkulu wa watowani na mkulu wa want'hu wafunt'higwe na mwambizi ywakwe hamwenga na fyo kulu, nawo wakwelaga kuita Yelusalemu, Weze abule Yelusalemu, wakimalaga hagihi na nk'honde we dikawa uwo ukwe nt'hendelo ya kukenya mwe diwambwasi ikuita hant'hu ha want'hu wakufuwila suke. 18 Wamwitanga seuta Hezekia mna seut awatumaga wambiz vilongozi wakwe wakadugane na awo wamwitange seuta. Vilongozi awo ni, Eliakimu mwana Hilikia uyo andaga mkimalizi ywe nyumba ye kiseuta, Sebuna uyo mwandisi, na mwana Asafu uyo mwandisi we zink'humbukila za seuta 19 Yumwenga ywa watowani wa Ashulu niyo awagamba, nivo seuta mkulu ywa Ashulu akulonga, wakeduvilai? 20 "Togola, wafanyanya kugamba ulosi howiina kint'hu nuwo umanyi na ludole kwe nk'hondo? Ni ani ukumhuwila vikuleka wasaguka kwangu? 21 Kaula haluse wahuwila Misili wakwambize, mna iyo neinde enga kuhuwila dete dinde ngoda yako ya kugendela dikuunga dimtunge mkono yeyose akudihuwila. Ivo nivo eli Falao seuta ywa Misili kwa wose wakumhuwila."

22 "Mna hata uneva mkanigamba, mwamhuwila Zumbe Mnungu, Mnungu ywenu, manyeni kugamba ni Mnungu uuyo, uyo Hezekia abanangaga hant'hu hakwe ha kulanga ne vilingo vakwe niyo awagamba want'hu wa Yuda na Yelusalemu wavike du kwe kilingo ki yuko Yelusalemu. 23 Ivo kizumilane na mkulu, seuta ywa Asilia, name nohwink'he falasi alufu mbili uneva nounde na want'hu wakuzigendeza zifasi izo. 24 Weye na watowani wako wageke noudahe vivihi kumkindila hata mkulu yumwenga we fyo dodo dya watowani naho hediina ludole dya zumbe ywangu hata uneva waihuila Misili wakwink'he magali ya nk'hondo na wagendeza zifalasi? 25 Hegu wagamba hiikump'hukila isi yako na kuibananga haheina wambizi wa Zumbe Mnungu? Zumbe Mnungu mwenye niye anigambile nii kump'hukile na kuibananga pele."

26 Niyo Eliyakimu mwana Hilikia na Shebina na Yoa wamgamba yudya mkulu ywa watowani, "Longa na suwe wandima wako kwa ulosi wa Kialami kwaviya chakikombaganya vedi. Use kulonga Kiibulania kwaviya want'hu we mwo lukazi weva."

27 Yudya mkulu niyo ahitula, "Weye wagamba zumbe ywangu kanituma nigale ulosi uno kwa zumbe ywenyu na kwenyu du? Kanituma iviaivia nigale ulosi uno kwa want'hu we mwo lukazi awo wekale enga nyuwe. Neniwatendele vihile hamwenga na nyuwe."

28 Niyo yudya mkulu ywa watowani akimaalaga na kulonga kwa izwi kulu akagamba kwa Kiebulania, "Tegelezeni kiya akulonga seuta mkulu ywa Asilia! 29 Seuta niyo awakanya mse kudant'hilizwa ni Hezekia. Hezekia hakudaha kuwayokolani mwo udahi wa seuta. 30 Msekuzumila Hezekia awaluvyeni hamwe mumhuwile Zumbe. Msekugamba Zumbe Mnungu naawayokoleni naho kugamba naakimalise difyo dya watowani wa Asilia wase kuutaha mzi wenyu. 31 Mse kumtegeleza Hezekia. Seuta ywa Asilia agamba, mdamanye mwiivano na miye mwize kwangu. Niho kila yumwenga naadye ywenyu naadye vikulawa mwe mizabibu yakwe mwenye, na kwe mitini yakwe. Naho naanywe mazi yakulawa mwe disima dyakwe mwenye, 32 mpaka aho nenize niwegale kwe isi enga ino ya kwenyu. Isi ina nk'hande na divai mph'ya, isi ina nk'hande za unga na migunda ya mizabibu, isi ya mizeituni na uki. Saguleni ugima, mse kusagula file. ‘Msekumtegeleza Hezekia uyo akuwadant'hilizani akagamba Zumbe Mnungu naakiyokole.’ 33 Ivo mwagamba eyuko milungu ywa isi yeyose akudaha kuwayokolani kulawa mwo udahi wa seuta ywa Asilia? 34 Ikuhi milungu ya Hamati na Aalapadi? Ikuhi milungu ya Sefalivaimu, milungu ya Hena na Iva? Togoleni yadaha kuiyokola Samalia kulawa mwo udahi wangu? 35 Togola, ni milungu ihi ywe zi isi izi adahile kuiyokola isi yakwe kulawa mwo udahi wangu? Haluse neidahike vivihi Zumbe Mnungu aiyokole Yelusalemu kulawa mwo udahi wangu?"

36 Mna wadya want'hu wanyamalaga du hawahitulaga mbuli yoyose enga ivo seuta Hezekia awagambaga wase kuhitula mbuli yoyose. 37 Niyo Eliyakimu mwana Hilikia na Shebina katibu, na Yoa mwana Asafu mwandisi, waitaga kwa Hezekia mavalo yawe yakanda wayalwebula, wamgambilaga yadya wagambilwe ni yudya mkulu ywa watowani.