1 Seuta awetanga vilongozi wose wa Yuda na Yelusalemu. 2 Aitaga kwe Nyumba ya Zumbe Mnungu akanda hamwenga na want'hu wose wa Yuda na Yelusalemu na walavant'hambiko na walotezi na want'hu wose wadodo na wakulu. Awasomelaga wose zimbuli ze Kitabu che Ndagano icho chandaga mwe Nyumba ya Zumbe Mnungu. 3 Seuta akimaalaga hagihi no mkola, niyo aika Ndagano na Zumbe Mnungu kwa uhya kugamba naatimile zisigilizi zakwe ne miko yakwe na yose akuunga alonge, kwa miyoyo yawe yose

4 Seuta amgambaga Hilikia uyo mlavant'hambiko mkulu, hamwenga na walava nt'hambiko watuhu na wamizi we nk'hili wause mwe Nyumba ya Zumbe Mnungu vint'hu vose vadamanywagwa kwajili ya Baali na Ashela hamwenga ne zint'hondo. Azokelaga kuse ya Yelusalemu kwe zink'honde za kwe dikolongo dya Kidiloni, maivu yakwe niyo ayegala uko Beseli. 5 Naho seuta awausaga walavant'hambiko wadya waikagwa ni maseuta wande walavant'hambiko mwe vilingo va want'hu hewe kumvika Mnungu ywe kindedi, mwe mizi ya Yuda na mgihi ya Yelusalemu, walavant'hambiko wose wafunk'hizaga ubani kwa Baali na kwe dizua no mwezi na kwe zint'hondo. 6 Ausaga mnala wa Ashela kulawa mwe Nyumba ya Zumbe Mnungu, niyo awigala kwe dikolongo dya Kidiloni na kuwoka tiki. Ayasigint'haga maivu yakwe niyo yanda enga luvumbi, naho agendaga kuyamwaganisila mwe vikuta va want'hu wamanyikise. 7 Naho amolaga zinyumba zo mviko zandaga zikekalwa ni wahabwsi. Naho kwandaga na wavele wandaga wakafuma suke wavalaga umwo wakamvika Ashela. 8 Yosia awaduganyaga uko Yelusalemu walavant'hambiko wose kulawa mwe mizi yose ya Yuda na kuhatenda hant'hu ha kulanga ho kuvikila hasekunda hedi naho kwa kuvikila kukongela Geba mpaka Beelsheba. Hant'hu hose awo walava nt'hambiko we milungu wandaga wakafunk'hiza ubani hant'hu hakuikila vint'hu va milungu ivo vandaga mwe zink'hili, ho mwingilo we nk'hili ya Yoshua, mkulu ywo mzi ukumoso ye nk'hili yo mzi. 9 Hamwenga na kugamba walavant'hambiko we vilingo vo kuvika milungu hawaungagwa kudamanya ndima he kilingo cha Zumbe Mnungu aho Yelusalemu, mna woho wadyaga idya mikate heigeligwe ugwadu wenk'hagwa ni wadya walavant'hambiko we kilingo cha Zumbe Mnungu.

10 Naho seuta Yosia ahatendaga Tofeni kwe nt'hindiga za Beni-Hinomu kugamba kusekunda na yeyose akudaha kumlava mwanawe ywa kilume hegu ywa kike kunda nt'hambiko ya kokwa kwa mnungu Moleki. 11 Naho ausaga zifalasi izo maseuta wa Yuda waziikaga kwa ndima ya kugenda kudivika dizua. Falasi izo zandaga ziikwa hagihi na aho naakekala mkulu yumwenga etangwagwa Natani meleki. Naho Yosia oyokaga magali yakugendezwa ni falasi yaikagwa kwajili ya kumvika mnungu zuwa. 12 Naho avimolaga vilingo vazengwagwa ni maseuta wa Yuda kulanga kwe golofa hagihi ne chumba chandaga kulanga cha Ahazi, ne vilingo vazengwagwa ni Manase he zisebule zimbili ze Nyumba ya Zumbe Mnungu. Avisindikaga hasi, kulawa aho niyo avibwagazulaga vibesubesu na kuviduula mwe dikolongo dya Kidiloni. 13 Naho Seuta Yosia avibanangaga vilingo vazengwagwa ni Seuta Selemani uko ulailo wa zuwa wa Yelusalemu, kusini mwo mnima wa ubanangi, ivo vazengagwa kwajili yo kuivika Ashitoleti milungu ya Sidoni na Kemoshi mnungu ywa Moabu na Moleki mnungu ywa Amoni. 14 Seuta Yosia naye aibogozolaga mikola ya maiwe, niyo ayakant'hila hasi mahili ya Ashela niyo ahagela usavu kwa kuhamemeza mavuha ya want'hu aho yandaga mahili ayo.

15 Iviyaiviya abogozolaga ne kilingo kudya Beseli, kilingo icho chazengwagwa ni Yeloboamu mwana Nebati uyo awatendaga Waizilaeli watende wavu. Seuta Yosia akimolaga ikilingo na kutulatula maiwe yakwe niyo ayasigint'ha na kunda nt'hifu, naho adyokaga dihili dikwitangwa Ashela. 16 Yosia eze akaule, aonaga vikuta kudya kwe vigulu. Atumaga want'hu niyo wagenda kuguha mavuha yandaga mwe vikuta viya niyo ayokela mnanga mwe kilingo icho na kukitenda kisekunda chedi kwa mviko viligane ne Mbuli ya Mnungu alongaga yudya mnt'hu ywa Mnungu. 17 Seuta auzaga, "Iki kikuta kizengelwe cha maiwe chaani?"

Want'hu wa Beteli niyo wamgamba, "Icho ni kukuta cha mnt'hu ywa Mnungu alawaga Yuda niyo alotela mwe mbuli ye kilingo cha Beseli, na ivo ukitendile kilingo icho."

18 Yosia niyo agamba, "Yalekeni mavuha ayo aaho, mnt'hu yeyose ase kuyagele nk'huswank'huswa." Ivo wayalekaga mavuha yakwe hamwenga na yadya ya mlotezi yudya ezaga kulawa Samalia.

19 Seuta Yosia amolaga hant'hu ha kuvikila hazengagwa kwa maiwe ni maseuta wa mzi wa Samalia awo watendaga maya ya Zumbe Mnungu yemukwe. Vilingo ivo vose avitendaga enga ivo atendaga uko Beseli. 20 Naho Seuta Yosia awakomaga mnanga mwe vilingo walavant'hambiko wa mavikilo makulu na kuyoka mavuha ya want'hu uumwo mnanga. Akajika yehe auya Yelusalemu.

21 Naho seuta awagambaga want'hu wose watende zuwa dya kinyemi dya Pasaka kwa kumtunya Zumbe Mnungu, enga ivo iwandikwe mwe kitabu icho chaonekaga mwe nyumba ya Mnungu.

22 Hainati dilaile zuwa dya kinyemi dye Pasaka enga idyo mwe Izilaeli kukongela kwo lupisi lwa walamuzi hegu maseuta awo wailongozaga Izilaeli na Yuda. 23 Ivo mwo mwaka wa mlongo na mnane mwo kwikaila kwake seuta Yosia, want'hu watendaga wila we dizuwa dya Pasaka kwa kumtunya Zumbe Mnungu uko Yelusalemu.

24 Akajika Seuta Yosia awausaga wasai na wata mp'hepo za milamulo na milungu yose na mahili na vint'hu vituhu vose hevikumwelela Zumbe Mnungu vandaga Yelusalemu na Yuda. Atendaga ivo kukint'hiza kiya chawandikwagwa ni mlotezi Hilikia mwe kitabu che miko icho chaonekaga mwe nyumba ya Mnungu. 25 Hahali seuta yeyose amlongole Yosia kukongela uko nk'hongo na hata aho useuta wakwe wize womboke, adahaga kumdamanyila Zumbe Mnungu ndima kwa moyo wakwe wose na kwa ludole lwakwe lwose na kwa ugima wakwe wose.

26 Hamwenga na ayo Zumbe Mnungu havuzile kunyuma luhahila lwakwe mwa Yuda kwajili ye zimbuli atendaga seuta Manase, zimbuli zemulaga luhahila lwa Zumbe. 27 Ivo Zumbe Mnungu niyo agamba, "Yuda nayo neni iuse ho undiilo wangu enga ivo naiusile Izilaeli, naho Yelusalemu neni ilemele, udya umzi nau sagule ne Nyumba ino, hant'hu nagambaga niho neni vikwe."

28 Kila kint'hu atendaga seuta Yosia chawandikwagwa mwe kitabu cha nk'humbukila cha Maseuta wa Yuda. 29 Umwo Yosia andaga seuta , Falao Neko ywa Misili agendaga kutowana na seuta ywa Asilia uko kwo mto wa Fulati. Seuta Yosia naye ambasaga akatowane na seuta uyo ywa Asilia, mna seuta Neko aduganaga naye niyo amkomela uko Megido. 30 Wandima wa seuta Yosia wenulaga ikimba chakwe mwe digali dye kink'hondo kulawa Megido mpaka Yelusalemu, niyo wakummosela msanga kwe kikuta chakwe.

Want'hu wa Yuda wamsagulaga Yehoahazi mwana Yosia, niyo wamkumba mavuta kunda seuta.

31 Yehoahazi andaga na miaka milongo miidi na nt'hatu umwo akanda seuta ywa Yuda. Yehe andaga seuta uko Yelusalemu kwa miezi mitatu. Hamutali mwana Yelemia ywa Libina andaga niye nine. 32 Amtenelaga wavu Zumbe Mnungu enga ivo atendaga ise. 33 Seuta Neko ywa Misili naye niyo amkaka mp'hingu uko Libula mwe isi ya Hamasi vileke asekunda seuta uko Yelusalemu. Aitozaga kodi, kilo alufu nt'hatu na magana mane na masawa kilo milongo mitatu na kane za zahabu. 34 Seuta Neko ywa Misili amtendaga Eliakimu mwana Yosia kunda seuta hant'hu ha ise Yosia. Amhitulaga dizina dyakwe niyo amwitanga Yehoyakimu, mna amuusaga Yehoyahazi na kuita naye uko Misili, niyo Yehoyahazi abanikila uuko.

35 Seuta Yehoyakimu aduganyaga kodi mwa want'hu viligane no upati wawe vileke adahe kuliha kodi enga ivo seuta viungigwe kuliha ni seuta ywa Misili.

36 Yohoyakimu andaga na miyaka milongo miidi na mishano umwo akanda seuta, naho andaga seuta ywa Yelusalemu kwa miyaka mlongo na umwenga. Nine andaga ni Zebida mwana Pedaya kulawa uko Luma. 37 Yehoyakimu naye adamanyaga wavu ha Zumbe Mnungu enga ivo watendaga wakale wakwe.