1 Yosia andaga na miaka mnane umwo akakoga kwikaila uko Yelusalemu. Alongozaga kwa miaka milongo mitatu na umwenga, zina dya nine andaga niye Yedida mwana Adaya ywa uko Bosikati. 2 Yosia adamanyaga ayedi na kumwelela Zumbe Mnungu. Atimilaga mliganyizo wa seuta Daudi uyo amlongoelaga na kutimila sigilizi za Zumbe Mnungu kwa wengele.

3 Mwo mwaka wa mlongo na mnane wo kwikaila kwakwe, seuta amtumaga muwandisi Shafani mwana Uzia naho mwezukuluwe dya Meshulamu uko kwe Nyumba ya Zumbe Mnungu akamgamba, 4 "Ita kwa malavant'hambiko mkulu uyo Hilikia umgambe awaze matundu yadya yalavigwe kwe Nyumba ya Zumbe Mnungu, izo zaduganywe ni wamizi kulawa kwa want'hu, 5 wagambe wayenk'hize matundu ayo kwa wakimalizi we ndima yo kuzenga mdya mmokile mwe Nyumba ya Zumbe Mnungu. Wawalihe 6 wasongoli, wazesi, na wambizi watuhu. Matundu matuhu yaguile zimbao na maiwe yasongolwe kwajili yo kuzenga mdya mmokile mwe Nyumba ya Zumbe Mnungu. 7 Mna hawakuungwa kulava uwazilo wa matundu ayo yenk'hizwe kwawe kwaviya wadamanya ndima kwa uhuwilwa."

8 Akajika Hilikia mlavant'hambiko mkulu niyo amgamba Shafani kugamba kakipata ikitabu che Miko mwe Nyumba ya Zumbe Mnungu. Hilikia amwink'haga ikitabu icho niyo Shefani akisoma. 9 Ivo auyaga kwa seuta niyo amwink'ha ulosi akagamba, "Wandima wako waguha matundu yandile kwe Nyumba ya Zumbe Mnungu niyo wazink'hiza kwa wakimalizi we ndima yokuzenga mdya mmokile mwe Nyumba Ya Zumbe Mnungu." 10 Naho Shafni amgambaga seuta, "Mlavant'hambiko Hilikia kanink'ha ikitabu iki." Shafani naye niyo akisoma kitabu icho ha Zumbe.

11 Umwo seuta eze ave zimbuli ziwandikwe mwe kitabu che miko alwebulaga divalo dyakwe, 12 niyo amgamba mlavant'hamiko Hilikia na kwa Ahakamu mwana Shafani na Asaya mndima ywa seuta akagamba, 13 "Iteni mkaunge ulangilizi kulawa kwa zumbe Mnungu kwajili yangu na want'hu wose wa Yuda, kwe zimbuli ze kitabu iki kipatikane. Kwaviya, Zumbe Mnungu ana maya mwa suwe na viya wakale wetu hawatimile yawandikwe mwe kitabu iki na kudamanya yose ivo ikuungwa kunda."

14 Ivo Hilikia, Ahikamu, Akiboli, Shafani na Asaya waitaga wose kwa mvele yumwenga zina dyagwe niye Huluda andaga mkaza Shalumu mwana Tikiva naho mwezukulwe dya Halihasi uyo ndaga akaika zisuke ze Nyumba ya Mnugu. Mwo lupisi ulo Huluda andaga akekala nt'hendlo ya kaidi ya Yelusalemu. Ivo wamgambilaga yose yalailaga. 15 Yudya mvele niyo awagamba wauye kwa seuta vileke wakamwink'he 16 Zumbe Mnungu gamba ivi, "Neniwigaile makunt'ho mzi wa Izilaeli na want'hu wakwe wose enga ivo viwandikwe mwe kitabu icho asomile. 17 Ino ni kwaviya wasaguka kwangu niyo waifunk'hizila ubani milunngu mituhu, ivo wanigela maya kwa milungu yawe wakedamanyile, maya yangu niyo yaimukila Yelusalemu naho haya seele. 18 Mgambileni seuta ywa Yuda uyo awatumileni mwize mmuuze Zumbe Mnungu. Aya nayo akulonga Zumbe Mnungu ywa Izilaeli mwe zimbuli zia wivile. 19 Kwaviya moyo wako nouniva na kukeseleza ha Zumbe wize wive icho nilongile mwa aha hant'hu na want'hu wakwe, kugamba nawakaunga waligitwe na kwasigwa wakiwa. Haluse Zumbe agamba, kwaviya nokutatula zisuke zako na kuila hangu, miye name hikwiva, 20 ivo elo, makunt'huo huunga niyegale Yelusalemu, heniyegale mpaka aho weye noubanikile. Nohuleke ubanike kwa utondowazi."

Wadya want'hu wauyaga kwa seuta Yosia no ulosi uwo.