1 Mwo mwaka wa kaidi wo useuta wa Yehoashi mwana Yehoahazi uko Izilaeli, Amaziya mwana ywa Yoashi seuta ywa Yuda akongaga kwikaila. 2 Umwo eze akonge kwikaila andaga na miyaka milongo miidi na mishano, yehe naye alongozaga Yelusalemu kwa miyaka milongo miidi na kenda. Nine etangwagwa Yehoadani kulawa Yelusalemu. 3 Adamanyaga yedi ha Zumbe Mnungu, mna handaga enga mkale ywakwe Daudi. Yehe adamanyaga mbuli zose enga ivo ise Yoashi adamanyaga. 4 Hata ivo hant'hu ho kuivika milungu uko kwe milima hakubanangagwa, want'hu nawo wagendeelaga kulava nt'hambiko na kufunk'hiza ubani hant'hu aho.

5 Aaho Amaziya eze aketogeze mwo useuta, awakomaga wandima wakwe wamkomaga seuta uyo ise. 6 Mna hawa wakomaga wana wa wakomi, enga ivo iwandikwe mwe kitabu che miko ya Musa, Zumbe Mnungu akalava sigilizi akagamba, "Welesi hawakomwe kwo wavu wo wana wawe, hegu wana hawakomwe kwo wavu wa welesi wawe, mna kila mnt'hu naakomwe kwa wavu wakwe mwenye."

7 Amaziya awakomaga watowani wa Edomu alufu mlongo mwe dikolongo dyo munyu, auguhaga kwa ludole mzi wa Sela na kuwiitanga Yokiteeli, na ivi nivo ukwitangwa mpaka dyelo.

8 Niyo Amaziya asigiila wegala ulosi kwa Yehoashi mwana Yehoahazi, mwana Yehu seuta ywa Izilaeli akagamba, "So kitowane." 9 Mna Yehoashi seuta ywa Izilaeli amwigailaga ulosi Amazia seuta ywa Izilaeli akagamba, "Zuwa dimwenga muwambangoma wa Lebanoni wamgambaga Mwelezi wa uko Lebanoni, Mloze mwana kike ywangu kwa Mwanangu. Mna kala dya kwe mbago dyombokaga aaho na kuujatajata muwambangoma. 10 Haluse weye Amazia kuwahuma vitendese watowani wa Waedomu moyo wako nawo wakutenda ukeduvye. Zumilana no uwagilwa wako, ukekale kaya, nii wakezunguila makunt'ho yakuunga yakubanange weye hamwenga na want'hu wako wa Yuda?"

11 Mna Amazia hazumilaga. Kwaivo Yehoashi seuta ywa Izilaeli afosaga na kuzumilana nt'humba na nt'humba na Amazia uko kwe nk'hondo Ben Shemeshi, mwe isi ya Yuda. 12 Watowani wa Yuda wahumagwa ni want'hu wa Izilaeli naho kila yumwenga anyilikilaga kwe kaya yakwe. 13 Yehoashi seuta ywa Izilaeli amtahaga Amazia seuta ywa Yuda, mwana Yehoashi, mwana Ahazia uko Beti Shemesi, niyo aita Yelusalemu na kumogola lukandula lwakwe kulawa mwo nk'hili lwa Efulaimu mpaka mwo nk'hili lwa mp'hembe una uhale wa mita magana maidi. 14 Aiguhaga zahabu yose na matundu hata vyombo vose vandile mwe Nyumba Nk'hulu ya Mnungu na mwe kindolo che nyumba ya seuta, akajika awatahaga na kuuya Samalia.

15 Udamanyi mtuhu wose wa Yehoashi udahi wakwe na nk'hondo atoanaga na seuta Amazia ywa Yuda yawandikagwa mwe Kitabu cha nk'humbukila che misimo cha maseuta Waizilaeli. 16 Yehoashi abanikaga na kumoselwa msanga kwe vikuta va kiseuta uko Samalia. Mwanawe Yelobohamu ekailaga hant'hu hakwe.

17 Amazia mwana ywa Yoashi seuta ywa Yuda ekalaga miaka mlongo na mishano aho seuta Yehoashi ywa Izilaeli eze abanike. 18 Udamanyi mtuhu wose wa Amazia wawandikagwa mwe Kitabu che Nk'humbukila cha Misimo cha Maseuta wa Yuda.

19 Mizungu iihile ya kumkoma Amazia yadamanyagwa Yelusalemu, ivo anyilikilaga Lakishi, mna wank'hondo wawasigilaga want'hu wakamkome, niyo wamkomela uuko. 20 Eze abanike niyo egalagwa mnanga mwe falasi na kumoselwa msanga mwe vikuta va kiseuta mwe isi ya Yelusalemu mwo mzi wa Daudi. 21 Akajika want'hu wose wa Yuda wamguhaga Uzia akanda na miyaka mlongo na mtandatu, na kumwiika hant'hu ha ise. 22 Uzia, mwo kwajika file ya ise, auzengaga uhya umzi wa Elati na kuuvuza kwa Yuda.

23 Mwo mwaka wa mlongo na shano wo useuta wa Amazia mwana Yoashi seuta ywa Yuda, Yeloboamu mwana Yehoashi seuta ywa Izilaeli akongaga kwikaila uko Samalia kwa lupisi lwa miyaka milongo mine na umwenga. 24 Amlekaga Zumbe Mnungu na kutimila mliganyizo wa uyo amlongoele uwazaganye want'hu wa Izilaeli niyo wadamanya wavu. 25 Aikombolaga isi yose yandaga ugoli wa Izilaeli, kulawa Pito dya Hamati mpaka Bahali ya Alaba. Ivo nivo alagane na Zumbe Mnungu kwa sila ya mndima ywakwe Yona mwana Mitai mlotezi kulawa Gati Hefeli.

26 Zumbe Mnungu aonaga makunt'ho makulu wayapatile Waizilaeli kwaviya hakwandaga na mnt'hu yeyose wakuwambiza. 27 Mna Zumbe Mnungu halongaga kugamba naawabanange Izilaeli pele, ivo awayokolaga kwa sila ya seuta Yeloboamu mwana Yehoashi.

28 Udamanyi mtuhu wose wa Yeloboamu, nk'hondo aitoaga kwa udahi, na ivo aikombolaga Damesiki na Hamati na kuitenda ugoli wa Waizilaeli, yose ayo yawandikagwa mwe Kitabu cha nk'humbukila che Misimo ya Maseuta wa Izilaeli. 29 Yeloboamu abanikaga na kumoselwa msanga mwe vikuta va kiseuta niyo mwanawe Zekalia ekaila hant'hu hakwe.