1 Mwo mwaka wa mfungate wo kwikaila kwakwe seuta Yehu ywa Izilaeli, Yoashi niho andaga seuta ywa Yuda, naho alongozaga kwa miaka milongo mine uko Yelusalemu. Nine etangwagwa niye Sibia ywa Beel-sheba. 2 Mwo wikazi wakwe wose amwelelaga Zumbe kwaviya mlavant'hambiko Yehoyada andaga akamlangiliza. 3 Hata ivo hant'hu ha miviko ha want'hu hewamvikaga Zumbe Mnungu hahamolwagwa, kwaivo want'hu wandaga wakagendeela kulava nt'hambiko zawe na koka ubani aaho.

4 Yoashi awetangaga walavant'hambiko niyo awagamba waduganye matundu yalavagwa kunda yakukile kwe Nyumba ya Zumbe. Ni yadya yaduganywagwa enga maliho, na yadya yegalwe kunda malavo ya vilapi va want'hu, na yadya yalavigwe kwa mnt'hu kuunga mwenye, 5 kila mlavant'hambiko ahokele matundu ayo kulawa kwa kila mnt'hu ammanyize naho wadamanye kila hant'hu hakuoneka habanika.

6 Mna yabulaga miaka milongo miidi na mitatu ya seuta Yoashi, walava nt'hambiko wandaga wakei kudamanya hant'hu hohose habanike mwe Nyumba ya Mnungu. 7 Ivo seuta Yoashi amwitangaga mlavant'hambiko Yehoyada na walavant'hambiko watuhu niyo awauza, "Nii hamdamanye hant'hu ha mogoke mwe Nyumba ya Mnungu? Haluse kukongela ivi haluse na kugendeela mleke kuhokela matundu kwa awo muwamanyize, mwaungwa kuyenk'hiza vileke yadamanyile ndima yo kuzenga hant'hu hamogoke mwe Nyumba ya Zumbe." 8 Wadya walavant'hambiko wazumilaga kugamba hawaduganye matundu naho kwa want'hu, naho hawazenge wenye mdya mmogoke mwe Nyumba ya Mnungu.

9 Niyo mlavant'hambiko Yehoyada adamanya sanduku na kudiponk'hola langa mwe ngubiko yakwe. Adiikaga he Kilingo cho kulavila nt'hambiko kulume kwa want'hu umwo wakengila mwe Nyumba ya Zumbe. Walavant'hambiko wo luzo wa ho mwingiilo waikaga matundu yose yalavagwa ni want'hu wezaga kwo kuvika. 10 Kila ho waonaga kugamba matundu yanda mengi mwe Disanduku, mwandishi ywe nyumba ye kiseuta no mlavant'hambiko mkulu, wezaga niyo wayalava na kuwaza matundu ayo yalavigwe na kuyegala kwe Nyumba ya Mnungu na kuyagela mwe mifuko. 11 Matundu ayo yana manyika uwingi wakwe, nawawenk'ha wadya wasagulwe kukimaila zindima mwe Nyumba ya Mnungu. Matundu ayo nayawaliha wandima mwe Nyumba ya Mnungu awo wasongoli na wazesi, 12 na wakutula maiwe. Wagulaga mabao na maiwe yo yatuligwe kwajili yo uzezi wa hant'hu hamokile mwe Nyumba ya Mnungu na kuliha kila kint'hu kidamanywe. 13 Mna matundu yegalwe kwe Nyumba ya Mnungu hayandaga ya kulihila ndima za kudamanya masinia ya masawa hegu mikasi ya kuliganyila nt'hambi, hegu nyiga za kugidila, hegu magunda, hegu vint'hu va zahabu hegu masawa, vint'hu vovose va mwe Nyumba ya Mnungu. 14 Zose zandaga ni maliho kwa wandima wandaga wakazenga mdya mmokile mwe Ntumba ya Mnungu. 15 Wadya want'hu wandaga wakakimaila indima, wakimailaga kwa uhuwilwa, ivo hawaungwagwa kuuza uwazilo wa matundu ye ndima ivo yatendeke. 16 Mna matundu yalavagwe malavo ya masa na malavo ya kuusila wavu haya kwigalwa kwe Nyumba ya Mnungu, ayo yandaga ni ya walavant'hambiko wenye.

17 Mwo lupisi ulo seuta Hazaeli ywa Asilia autowaga mzi wa Gati niyo autaha, naho ahingaga Yelusalemu vileke autowe. 18 Yoashi seuta ywa Yuda aguhaga malavo yose yaikagwa ni wakale wakwe wandaga maseuta wa Yuda, awo wakina Yehoshafati, Yelohamu na Ahazia, malavo ayo yehe mwenye ayaikaga kwajili ya Zumbe yakanda ni hamwenga nae zahabu yose yandaga mwe kindolo che Nyumba ya Zumbe na mwe nyumba ye kiseuta, niyo avigala kwa Hazaeli seuta ywa Asilia kunda mageleko, uyo kulongole ezaga kuhalawa Yelusalemu yehe na watowani wakwe.

19 Ivo mbuli zose zisigale na ziya adamanyaga seuta ziwandikwa mwe Kitabu cha nk'humbukila che misimo ya maseuta wa Yuda.

20 Wakulu wa watowani wakwe seuta Yoashi niyo waika mizungu iihile ya kumkoma. Wamkomelaga uko Beti Milo kwe sila ikuseela kuhinga Sila. 21 Wakulu awo wa watowani wakwe wamkomaga, wandaga ni Yezabadi mwana Shimeati na Yehozabali mwana Shomeli. Seuta Yoashi eze abanike amoselwagwa msanga uko kwe vikuta va wakale wakwe kwo mzi wa Daudi. Niyo mwanawe Amazia anda seuta hant'hu ha ise.