1 Mwo mwaka wa mlongo na mtandatu, wo kwikaila kwakwe Peka mwana Lemalia seuta ywa Izilaeli, Ahazi mwana Yonatamu seuta ywa Yuda akongaga kwikaila. 2 Andaga na miyaka milongo miidi aho akongaga kwikaila. Alongozaga kwa miyaka mlongo na mtandatu uko Yelusalemu . Yehe hatendaga yedi kwa Zumbe Mnungu enga Daudi uyo babakwe ivo atendaga. 3 Yehe atimilaga zinyendo za maseuta wa Izilaeli. Naho amlavaga mwanawe kunda nt'hambiko yo kokwa kwe milungu akatimila vihendo va want'hu wa si nt'huhu awo wagulusagwa ni Zumbe Mnungu umwo Waizilaeli wandaga wakengila mwe isi. 4 Ahazi alavaga malavo na kufunk'hiza ubani hant'hu henuke na mwe vigulu na mwe kila hana maziti yavamilize.

5 Seuta Lezini ywa Asilia na seuta Pekahi mwana ywa Lemalia kulawa Izilaeli waitowaga Izilaeli na kuitowa Yelusalemu na kuukindila, hawadahaga kumhuma Ahazi. 6 Mwo lupisi uulo seuta ywa Waalamu autahaga mzi wa Elati na kuwagulusa want'hu wa Yuda wandaga wakekala hadya. Waalamu wengilaga Elati niyo woho wekala aaho. 7 Ivo Ahazi atumaga want'hu kwa seuta Tigilati pileseli ywa Asilia wegale ulosi ukugamba, "Ni miye mndima ywako mhuwilwa. Wize unihonye na maseuta wa Izilaeli awo wakunitowa." 8 Ahazi aguhaga masawa ne zahabu kulawa kwe nyumba yo mviko ne kindolo che kiseuta, niyo aigala kunda geleko kwa seuta ywa Asilia. 9 Seuta ywa Asilia etikilaga lwitango lwa Ahazi kwa kugenda kuitowa Damesiki na kuwegala mwo mzi ukwitangwa Kili niyo amkoma Lezini na kuwaguha want'hu niyo aita nawo kunda watahigwa.

10 Seuta Ahazi eze aite uko Damesiki kugenda kumtalamkila seuta Tiligalati Pileseli, kudya aonaga kilingo cha kulavila nt'hambiko. Ivo niyo amwigaila Ulia mlavant'hambiko mliganyizo mgima ivo kilingo icho ivo kikuungwa kunda. 11 Ivo Ulia azengaga kilingo icho viligane no mliganyizo uwo. Abindaga kukizenga umwo Ahazi andaga akei kwiza. 12 Umwo seuta auyaga kulawa Damesiki, abwiilaga kilingo cho mviko kiheza ukuzengwa, 13 ivo alavaga malavo yakwe yo kokwa pele na malavo ya nk'hande na ya kunywa, niyo amyagila sakame kunda malavo yo utondowazi. 14 Niyo seuta Ahazi ausa kilingo cha kale che shaba chakimalaga halongole kwe nyumba ink'hulu yo mviko na hagati ye kilingo ikihya ne nyumba yo mviko, na kukiika mkoma mahanya ye kilingo ikihya. 15 Seuta Ahazi amsigiila mlavant'hambiko Ulia akagamba, "Mnanga mwe kilingo icho kikulu ikihya numo noulavile malavo ya mtondo yo kokwa pele, na malavo ya kisingi ye nk'hande na malavo ya seuta yo kokwa pele na malavo yakwe ye nk'hande, na malavo ya kokwa pele ya want'hu wose we isi, hamwenga na malavo yawe ya vo kunywa. Umyagile mnanga mwe kilingo icho, isakame na nt'hambiko yo kokwa pele na malavo. Mna miye nenitambikile mwe kilingo icho cha kale che shaba kwa kuzungula useuta." 16 Ulia mlavant'hambiko adamanyaga viligane na ivo seuta Ahazi asigiilaga.

17 Seuta Ahazi aziusaga zimp'hapi zakimalisagwa kudya, niyo ausa disima dyetangwagwa bahali idyo dyandaga mnanga mwe majeku mlongo na maidi ye shaba na kudiika mnanga mwe nk'hongelo ya maiwe. 18 Kwa kumwelela seuta ywa Asilia ausaga kabalaza mwe dizuwa dyo kuhumula, kabalaza kaikwagwa he Nyumba yo mviko niyo atimila sila ye kiseuta mwo kwingila kwe Nyumba yo mviko ya Zumbe. 19 Kila kiya damanye seuta Ahazi kiwandikwa mwe Kitabu che nk'humbukila cha maseuta wa Yuda. 20 Ahazi abanikaga niyo amoselwa msanga kwe vikuta ve kiseuta uko kwo mzi wa Daudi. Hezekia mwanawe niye andaga niye mkipe wo useuta wakwe.