1 Ivo mwo mwaka wa kenda wa useuta Sedekia na mwe dizuwa dya mlongo mwo mwezi wa mlongo, seuta Nebukadineza ywa Babeli akanda ne difyo dyakwe dyose dya watowani, aubasaga mzi wa Yelusalemu. Mafyo ya watowani wakwe yauzungulukaga umzi uwo. 2 Umzi uwo nouzungulukwa mpaka mwo mwaka wa mlongo na umwenga wo useuta wa Sedekia. 3 Mwe dizuwa dya kenda mwo mwezi wa kane, kwandaga na gumbo kulu mwo mzi, hakwandaga na kint'hu chochose cha kudya mwo mzi uwo. 4 Hamwenga na kugamba watowani wa Babeli wauzungulukaga umzi, zink'handula zamolwagwa niyo watowani wa seuta Sedekia wanyilika nekilo. Wahalawaga kwombokela kwe kiunga cha seuta, niyo wombokela hagati ye zink'handula zimbili niyo wanyilika kuhinga kwe dikolongo dya Yolodani. 5 Mna idifyo dya watowani wa Babeli dyamgulusaga seuta Sedekia niyo dya kumgwiila kwe zint'hindiga za Yeliko. Fyo dya watowani wakwe wose wamnyilikaga niyo dyasambala uko na uko. 6 Seuta Sedekia agwilwagwa niyo egalwa kwa seuta ywa Babeli uko Libila, niyo seuta ywa Babeli amsengela. 7 Wana seuta Sedekia wakomwagwa iivi mwenye akakaula. Naho Sedekia mwenye atulwagwa ameso niyo wamkaka mp'hingu na kumwigala Babeli.

8 Mwe dizua dya mfungate na mwezi wa shano, mwo mwaka wa mlongo na kenda wa seuta Nebukadineza ywa Babeli, Nebuzalidani mlangilizi ywa watowani wamizi na mndima ywa seuta ywa Babeli wezaga Yelusalemu. 9 Aitimp'haga moto Nyumba ya Zumbe Mnungu, nyumba yo useuta na nyumba zose za Yelusalemu na kila nyumba zimanyikise. 10 Idifyo dyose dya watowani dikalongozwa ni mkulu ywawe azimolaga zink'handula zo mzi wa Yelusalemu. 11 Naho Nebuzaladani mkulu ywa watowani wamizi wawatahaga want'hu wasigalaga mwo mzi uwo hamwenga na wose wasagukaga kwa seuta ywa Babeli. 12 Mna mkulu uyo ywa watowani wamizi awalekaga want'hu wakiwa vileke wande wandima mwe zink'honde ze mizabibu.

13 Naho want'hu wa Babeli wamolaga mikola ye shaba, hamwenga ne visimiko ne idya ibahali ye shaba vandaga mwe Nyumba ya Zumbe Mnungu. 14 Hamwenga na ayo watahaga zinyungu, machepe na mikasi na mabeseni ne vint'hu vose va shaba va ndima za mwe Nyumba ya Zumbe Mnungu. 15 Mkulu ywa watowani wamizi atahaga vyetezo ne zinyiga zo kumyagila na vint'hu vose vidamanywe kwa zahabu yedi. 16 Ishaba yandaga mwe mikola ne bahali ne visimiko ivo vadamanywagwa ni Selemani kwajili ye Nyumba ya Zumbe, vazamisaga hevadahikaga kuvihima. 17 Utali wa kila mkola wandaga mita mnane vina vilungu va shaba va utali wa mita imwenga na lobo. Vilungu vose vatulumwagwa kwa vint'hu vikale enga makomamanga vidamanywe kwa shaba.

18 Naho mkulu ywa watowani wamizi awaguhaga kunda wavugailwa awo Selaya mlavant'hambiko mkulu, na Sefania mlavant'hambiko ywa kaidi mwo ukulu na watuhu watatu wakulu mwe Nyumba ya Mnungu. 19 Umwo mwo mzi aguhaga mkulu yumwenga ywa watowani na watuhu washano wandaga walangilizi wa seuta. Naho amguhaga muwandisi uyo andaga niye mkulu mwa wose we isi na watuhu hewekuungwa kusweswa. 20 Akajika Nebuzaladani mkulu ywa watowani wa seuta awaguhaga wose na kuwegala kwa Nebukadineza seuta ywa Babeli uko Libila. 21 Uko Libila mwe isi ya Hamati seuta awatowaga niyo awakoma want'hu awo.

Ivo want'hu wa Yuda watahagwa niyo waguhigwa kunda watumwa kulawa mwe isi yawe.

22 Nebukadineza seuta ywa Yuda amwiikaga Gadalia mwana Ahikamu mwezukuluwe ywa Shafani, mkulu ywa Yuda, kunda mkulu mwa wose wasigalaga hewatahagwa kuita Babeli. 23 Umwo wakulu wose wa watowani na want'hu wose weze weve kugamba seuta ywa Babeli kamsagula Gedalia kunda mkulu, wambasaga Gedalia uyo mkulu uko Mizipa. Wakulu awo wambasaga Gedalia ni Ishumaeli mwana Natania, Yohana mwana Kalea, Selaya mwana Tanihumeti Mmetofa na Yezania mwana mnt'hu kulawa Maaka, hamwenga na want'hu wawe. 24 Gedalia niyo awagamba awo want'hu, "Nawagambilani kindedi kugamba msekuwogoha wakulu wa Babeli. Humuleni mwe isi mdamanyileni ndima seuta ywa Babeli, kila kint'hu nekinde chedi kwenyu."

25 Mna mwo mwezi wa mfungate Ishumaeli mwana Elishama yumwenga mwa lukolo we kiseuta, akanda hamwenga na want'hu mlongo, wamkump'hukilaga Gedalia niyo wamkoma. Iviyaiviya wawakomaga Waizilaeli na Wababeli awo andaga hamwenga nawo uko Mizipa. 26 Niyo Waizilaeli wose, wakiwa na wagoli hamwenga na wakulu wa mafyo ya watowani wahalawaga niyo waita Misili kwaviya wandaga wakawogoha Wababeli.

27 Mwo mwaka udya Evili melodaki andaga seuta ywa Babeli, kwa uwedi wakwe amlavaga seuta Yekonia ywa Yuda uko kwe divugailo. Ino yalailaga mwe dizua dya milongo miidi na mfungate dyo mwezi wa mlongo na miidi wo mwaka wa milongo mitatu na mfungate, aho Yekonia eze atahigwe kunda mvugailwa. 28 Evili melodaki alongaga naye kwa wedi, naho niyo amwink'ha nt'hunyo ikulise kujink'ha maseuta weyawe wose wandanyaga uko Babeli. 29 Naho amsakanyaga zisuke zia avalaga kwe divugailo niyo anda akadya hamwenga na seuta Evil melodaki ywa Babeli, mwa mazua yakwe yose. 30 Andaga akenk'higwa viya naakaunga va kila zuwa mwo wikazi wakwe wose.