1 Mwo mwaka wa mlongo na mnane wa kwikaila kwakwe seuta Yohoshafati ywa Yuda, Yolamu mwana Ahabu andaga seuta ywa Izilaeli uko Samalia, naye alongozaga kwa miyaka mlongo na miidi. 2 Atendaga wiihi ha Zumbe, mna hiyo enga udya wadamanyaga ise na nine, kwaviya yehe abogozolaga udya mnala wa Baali, azengaga ise. 3 Hata ivo adamanyaga wavu enga uudya adamanyaga Yeloboamu mwana Nebati. Kwo wavu uwo awazaganyaga Waizilaeli niyo nawo watenda wavu naho hawalekaga.

4 Naho Mesha seuta ywa Moabu andaga mdimi wa ngoto, naivo andaga kamliha seuta ywa Izilaeli ngoto laki imwenga, na sufi yalawaga mwe ngoto laki imwenga mwa kila mwaka. 5 Mna Ahabu seuta ywa Izilaeli eze abanike, seuta ywa Moabu asagukaga kwa seuta wa Izilaeli. 6 Mwo lupisi uulo, seuta Yolamu ahalawaga Samalia niyo awaduganya watowani wakwe wose. 7 Naho egalaga ulosi kwa seuta Yehoshafati seuta ywa Yuda, akagamba, "Seuta ywa Moabu kanisaguka, togola nekindanye kokutowana nk'hondo naye?"

Seuta Yehoshafati niyo amgamba, "Nekindanye." Miye ni enga weye, want'hu wangu nawo ni want'hu wako, zifalasi zangu nazo ni falasi zako. 8 Mna niyo amuuza, Nechombokele hii kikaita kwo kuwatowa?

Yolamu niyo amgamba, "Nechombokele kwe dijangwa dya Edomu."

9 Ivo seuta ywa Izilaeli na seuta ywa Yuda na ywa Edomu, wagendaga lugendo lwa mazuwa mfungate, naho hakwandaga na mazi kwajili ya watowani wawe na kwajili ye mifugwa yawe. 10 Seuta Yolamu niyo ahaza, "Haa kidihagala! Zumbe kakiduganya suwe maseuta watatu vileke akigele mwe mikono ya seuta ywa Wamoabu!"

11 Seuta Yehoshafati niyo auza, "Hana mlotezi yeyose aha vileke akiuzile kwa Zumbe Mnungu?"

Mkulu ywa watowani wa seuta Yehoshafati niyo agamba, "Eyaha Elisha mwana Shafati, uyo andaga mwambizi ywa Eliya." 12 Yehoshafati niyo agamba, "Heiye, Uyo ni mlotezi ywe kindedi ywa Mnungu." Ivo maseuta wose, seuta ywa Izilaeli, na ywa Yuda na ywa Edomu, waseelaga wakambasa.

13 Elisha amgambaga seuta ywa Izilaeli, "Waungai kwangu? Ita kwa walotezi wa iso na wa nyokwe."

Yolamu niyo agamba, "Bule! Ni Zumbe akiduganye suwe maseuta watatu vileke akiike mwe mikono ya seuta wa Wamoabu."

14 Elisha niyo agamba, " Nakelisa kwa zina dya Zumbe Mnungu mta udahi uyo miye humvika. Yandile hi kwa nt'hunyo du ya Yehoshafati seuta ywa Yuda, hegu hehakutegeleza hata ludodo. 15 Haluse nigaile mnt'hu akudaha kutowa kinanda."

Yudya mtowa kinanda eze atowe, udahi wa Zumbe wamwiziilaga Elisha, 16 "Zumbe niyo agamba, ‘Simbeni mina mingi mwe dikolongo idi. 17 Hataivo homuone heho hegu fula, mna hamwenga na ayo kolongo nedimeme mazi, naho nomnywe nyuwe hamwenga ne zing'ombe zenyu ne zifalasi zenyu.’" 18 "Mna kwa Zumbe Mnungu, mbuli ino haina udala. Hata ivo Zumbe Mnungu naawenk'heni udahi wa kuwahuma Wamoabu. 19 Nyuwe nomwitowe mizi yose izengelwe magomela, ne mizi yose yedi. Nomyasenge maziti yose ayedi, nomzisite n'choko zose za mazi, naho kila mgunda wedi nomuubanange kwa kuumemeza maiwe."

20 Zuwa ditimile, mtondo, mwo lupisi lwa kulava malavo, aaho mazi niyo yakonga kubwiluka kulawa Edomu! Isi yose yamema mazi.

21 Ivo Wamoabu wose wevaga kugamba, maseuta watatu weza watowane nawo. Ivo kila mnt'hu wabwanga na wadala wose wadahaga kutoza vitiwanilo wetangwagwa na kuikwa kwo mhaka. 22 Wamoabu wenukaga mtondotondo, zuwa nadyo dyandaga dikapulika mnanga ye mazi. Wayaonaga mazi yakwe nt'hendelo yawe kugamba yenk'hundu enga sakame. 23 Wamoabu niyo weheelwa wakagamba, "Ino sakame! Vadahika maseuta awa watatu watowana woho wenye na kukekoma, kiteni kikatahe vimwe nk'hambi!"

24 Mna Wamoabu weze wabule he nk'hambi, Waizilaeli wawatowaga niyo wawagulusa mwe isi ya Wamoabu na kuwakoma. 25 Waimolaga imizi yawe kila mnt'hu avigitaga iwe kila hant'hu ahedi mpaka hagubikwa. Wazisitaga zinc'hoko zose na kusenga miti yose yandaga yedi. Wasigalaga mzi mkulu, Kili Haleseti ukedu, mna wakutowa nk'humbaiwe wauzungulukaga na kuutaha.

26 Seuta ywa Moabu eze aone kugamba nk'hondo yamhuma, aguhaga watowani magana mfungate wakekakile mabamba niyo wakenyelekeza na mpaka kwa seuta ywa Edomu, mna wadundugaga. 27 Seuta ywa Moabu amguhaga mwanawe ywa nk'hongo uyo andaga aguhe useuta hant'hu ha ise. Amlavaga kunda nt'hambiko ya kokwa mwo lukandula lwo mzi. Waizilaeli wandilisaga na maya niyo wahalawa mwo mzi na kukeitila kwe zikaya zawe.