1 Aho Atalia uyo nine dya seuta Ahazia eze aone kugamba mwanawe kakomigwa, alavaga sigilizi ya kukomwa pele imp'huga yose ye kiseuta. 2 Mna Yehosheba lumbudye dya mwana kike ywa seuta Yeholamu, amguhaga kwa kinyele uyo Yoashi mwana Ahazia mwa wana seuta awo wandaga hagihi na kukomwa. Amfisaga yehe hamwenga no mlezi ywakwe uko kwe chumba cho kugona vileke Atalia asekumuona na kumkoma. 3 Yehosheba amfisaga Yoashi kwa miaka mtandatu mwo lupisi ulo akanda kamfisa kundani kwe Nyumba ya Mnungu, umwo Atalia andaga akalongoza isi.

4 Mna mwo mwaka wa mfungate, mlavant'hambiko Yohoyada atumaga ulosi na kuwaduganya wakulu wa watowani wo useuta na wamizi we nyumba ye kiseuta, niyo awatuma wambase uko kwe Nyumba ya Mnungu, niyo wazumilana na kuika kilapi mwa kiya naakaunga adamanye. Niho awalagisaga aho andaga Yoashi mwana kilume ywa seuta Ahazia, 5 naho niyo awagamba, "Umwo mkeza kwiza mwo luzo lwo wamizi mwe dizuwa dyo kuhumula, imwenga ya nt'hatu ya nyuwe nomwize mwamile nyumba ye kiseuta, 6 imwenga kwa nt'hatu neyamile kwe nk'hili ya Suli, imwenga nayo neyamile kwe nk'hili ya kunyuma ya wamizi watuhu. Ivo nivo nomwamile nyumba ye kiseuta ise kumoligwa. 7 Yadya amafyo maidi yakubinda uluzo lwawo mwe dizuwa dyo kuhumula, nayakamile naho kwe Nyumba ya Mnungu yamwamile seuta. 8 Nommwamile seuta Yoashi mkanda na mabamba yenyu, naho yeyose naageze kuwasogeela, vaungwa akomwe." Mwikale na seuta hohose naaite.

9 Wakulu awo wa watowani magana watendaga viligane na ivo alongile mlavant'hambiko Yehoyada. Kila yumwenga aguhaga want'hu wakwe wadya wandaga wakaita kwo wamizi mwe dizua dyo kuhumula, na wadya wandaga wakaita kwo kuhumula, iviaivia wezaga kwa mlavant'hambiko Yehoyada. 10 Yudya mlavant'hambiko naye awenk'haga wakulu wa watowani awo, mijungo ne zink'hindo zandaga za seuta Daudi, izo zaikwagwa kwe Nyumba ya Mnungu, 11 kila mwamizi akanda ne dibamba dyakwe, waizungulukaga Nyumba ya Mnungu kulawa nt'hendelo ya kusini mpaka nt'hendelo ya kasikazini, wakamwamila seuta. 12 Akajika, Yehoyanda amlavaga kuse uyo mwana seuta niyo avala nk'hofia ye kiseuta niyo amwink'ha ibaluwa ye miko yo useuta na kumtambula kugamba yehe niye seuta. Want'hu watowaga magasa na kwanga wakagamba, "Seuta unde na wikazi matali!"

13 Atalia mkaza suta eze eve maizwi ya wamizi na want'hu watuhu, agulukaga kuhinga kwe Nyumba ya Mnungu uko want'hu wakeduganyaga. 14 Malikia eze asungiile amuonaga seuta mhya akimaala hagihi no mkola ho mwingiilo we Nyumba ya Mnungu enga ivo wazoelaga. Azungulukagwa ni wamizi na watowa magunda, naho want'hu wose wandaga wakanga kwa kinyemi na kutowa magunda yawe. Aho malikia Atalia alwebulaga divalo dyakwe kwa kinyulu akagamba, "Kusaguka uku, kusaguka uku!"

15 Niyo mlavant'hambiko Yehoyada awagamba wadya wakulu wa watowani, "Mlaveni kuse mmwiike mgati mwa watowani naho mkomeni yeyose akuunga amtimile." Alongaga ivo kwaviya mlava nt'hambiko aonaga hiyo vedi akomelwe mwe Nyumba ya Mnungu. 16 Wamgwilaga na kumwombosela kwe nk'hili ye falasi niyo wamkomela uuko.

17 Niyo Yehoyada aikaga Ndagano kwa Zumbe na seuta na want'hu, vileke wande want'hu wa Zumbe. 18 Ivo niyo want'hu wose waita kwe nyumba ya mnungu Baali niyo waimola na kumola kilingo chakwe cho mviko hamwenga na mahili yakwe, naho niyo wamkoma Matani mlava nt'hambiko ywa mnungu Baali aaho he kilingo cho kulavila nt'hambiko.

Mlavant'hambiko Yehoyada niyo aika wamizi wamile Nyumba ya Zumbe Mnungu. 19 Niho awaguhaga wakulu wa watowani, na wamizi na want'hu wose we isi. Wamselezaga seuta kulawa kwe Nyumba ya Zumbe Mnungu niyo wamwigala kwe nyumba ye kiseuta, niyo ekala kwe difumbi dyakwe dyo useuta. 20 Want'hu wose wandaga na kinyemi mzi niyo watondowala, kwaviya Atalia achinjwagwa kwe nyumba ye kiseuta.

21 Yoashi andaga na miaka mfungate umwo akakonga kunda seuta.