1 Elisha niyo amhitula, "Tegeleza ulosi wa Zumbe, Luvi lupisi enga ulu, na uumu Samalia kilo nt'hatu za unga wedi wa ngano nezigulwe kwa yombe dya shekeli imwenga ya masawa, na kilo mtandatu za shayili zina yombe dya shekeli imwenga ya masawa."

2 Mndima mhuwilwa ywa seuta amgambaga Elisha, "Hata uneva Zumbe Mnungu atendile madilisha ya kwe mbingu, togola mbuli ino hegu neilaila!" Elisha niyo amhitula, "Nouone weye mwenye, mna weye houdye."

3 Kwandaga na want'hu wane wana unyonge wa matana wandaga mwe nk'hili yo mzi wa Samalia wakakegamba woho kwa woho, "Nii chekala aha mpaka kibanike? 4 Uko hokukudahika kwingila mwo mzi kwaviya nekibanike. Ivo kiite kwe nk'hambi ya Wasilia vadahika nawakikome hegu wasekukikoma." 5 Ivo ziza dize dikonge kwingila, waitaga mwe nk'hambi ya Wasilia, mna weze wabule uko, kumbe! Hakwandaga na mnt'hu, 6 kwaviya Zumbe Mnungu aditendaga watowani wa Wasilia dive sindo ya magali na falasi kunda enga sindo ya watowani wakulu. Wasilia wafanyanyaga kugamba seuta ywa Izilaeli kawaguha maseuta wa Wahiti na Wamisili weze watowane na woho. 7 Ivo, mwe kilo icho Wasilia wagulukaga kukanda kukei kuna ziza wose nakuyaleka mahema yawe na falasi na mp'hunda zawe ne nk'hambi yawe ivo yandaga na kukehonya ugima wawe.

8 Wata matana wane weze wabule mnk'handa ye nk'hambi wengilaga mndani ye dihema dimwenga, wadyaga na kunywa viya wapataga uumo, waguhaga masawa na zahabu na suke na kuita kuzifisa. Naho wengilaga mwe dihema dituhu na kudamanya iivo. 9 Mna niyo wakelongela, "Icho kikudamanya hicho chedi! Ino ni mbuli yedi kinanayo dyelo, naho ikanda kinagojela mpaka mtondo, vituhu nekisengelwe. Kisunguze kuita kikawagambile want'hu we nyumba ya seuta!" 10 Ivo niyo wahalawa mwe nk'hambi ya Wasilia na kuwetanga wamizi we zink'hili zo mzi na kuwagamba, "Nekiita kwe nk'hambi ya Wasilia naho hachaonaga hegu kumtegeleza mnt'hu yeyose. Falasi na mp'hunda hawanati kufungigwa, na mahema yeaho enga ivo wayasile."

11 Wamizi we nk'hili wabwelekezaga mbuli iyo zabula kwa seuta. 12 Kwandaga kukei nekilo, mna seuta eze eve enukaga mwo lusazi na kuwagamba awo wambizi wakulu wakwe, "Miye himanya mzungu wa Waashulu! Wamanya naho kina sala mwo mzi, haluse waleka nk'hambi yawe kuita kukefisa vileke umwo kikahalawa mwo mzi na kugenda kuzungula nk'hande. Ikindedi nekiwatahe niyo chengila mwo mzi."

13 Yumwenga mwa wakulu wakwe agambaga, "Want'hu wengi aha ho mzi wana sala vitendese enga viya wadya wabanike. Ivo wasigalaga want'hu wageke na falasi shano za wadya wasigalaga wakaule walailahi" 14 Wasagulaga want'hu na kuwenk'ha magali yakugendezwa ni falasi maidi. Seuta niyo awasigiila kuwatimila Waashulu, akawagamba,waitei mwe nk'hambi ya Waashulu muone ayo yaile. 15 Want'hu awo wawatimilaga mpaka Yolodani, umwo mwe sila waonaga suke na vint'hu vituhu valekagwa ni Wasilia umwo wandaga wakanyilika. Wauyaga na kumgabila seuta. 16 Want'hu wa Samalia wafosaga na kutaha nk'hambi ya Wasilia. Enga ivo Zumbe Mnungu alongile. Kilo shano za unga wedi wa ngano hegu kilo mlongo za shaili zatagagwa kwa kabesu kamwenga ka masawa.

17 Na seuta andaga kamwiika yumwenga mwa wakulu wakwe kunda mwamizi we nk'hili yo mzi. Mkulu uyo ajatagwa ahadya he nk'hili na kukomwa ni want'hu, enga viya mnt'hu ywa Mnungu aonaga umwo seuta agendaga kumkaula. 18 Elisha andaga kamgambila seuta kugamba mwo lupisi enga ulu mwe dizuwa ditimile, kilo shano za unga wedi wa ngano hegu kilo mlongo za shaili nezitagwe kwa kabesu kamwenga ka masawa. 19 Mkulu yumwenga andaga akamhiga Elisha akagamba, "Uneva Zumbe Mnungu mwenye kadamanya malanga ya kwe mbingu, Togola mbuli ino neidahike? Elisha naye amhitulaga, Nouwone yakadamanyika, mna nk'hande yenye houdye." 20 Na ivo nivo vilekile want'hu wamjataga mkulu uyo ywa watowani mwe nk'hili yo mzi.