1 Elisha andaga kamgambila mvele ekalaga Shunemu uyo andaga kamuuyula mwanawe, "Halawe na wanduguzo, usamile mwe isi ya wata kwiza kwaviya Zumbe Mnungu kegala gumbo mwe isi kwa mazuwa ya miyaka mfungate." Amgambaga aite hant'hu hatuhu. 2 Uyo mvele ahalawaga enga ivo mnt'hu ywa Mnungu alongile, aitaga hamwenga na wanduguze na kwikala mwe isi ya watakwiza mwe isi ya Filisiti kwa mwaka mfungate.

3 Miyaka mfungate ize isile, ahalawaga Filisiti na kuuya Izilaeli na kuita kwa seuta akalombeze avuzilwe inyumba yakwe no mgunda wakwe. 4 Ambwilaga seuta akalonga na Gehazi mnt'hu ywa Mnungu akagamba, "Nakulombeza unigambile vihungi vose akudamanya Elisha." 5 Gehazi umwo akamgambila seuta Elisha ivo amuyulaga mnt'hu abanikaga, mvele uyo alavaga malombezo yakwe kwa seuta. Gehazi agambaga, "Weye zumbe uyu ni yudya mvele uyo Elisha amuuyulaga mwanawe!" 6 Seuta eze amuuze yudya mvele, yehe amgambilaga. Seuta amwitangaga mndima ywakwe amvuzile yudya mvele ugoli wakwe wose, hamwenga na upati wose we migunda iyo yose mwo lupisi ulwo lwa mwaka mfungate.

7 Zuwa dimwenga Elisha aitaga Damesiki. Mwo lupisi ulo seuta Ben Hadadi andaga mnyonge naho eze agambilwe Elisha andaga Damesiki, 8 amgambaga mndima ywakwe Hazaeli, "Mwigaile mnt'hu ywa Mnungu mageleko umgambe aniuzile kwa Zumbe uneva nenihone hegu bule." 9 Hazaeli aitaga kwa Elisha akanda kafungaya mageleko mengi ya ulozo wihengi kulawa Damesiki. Azinulizaga mwe ngamia milongo mine. Eze abule kwa Elisha niyo agamba, "Mndima ywako Ben Hadadi seuta ywa Asilia kanisigiila kwako, nimuuzile, uneva naahone unyonge uno."

10 Ivo Elisha niyo amhitula, "Ita ukamgambe, ‘Ikindedi nouhone’ mna Zumbe kanigubuila kugamba naabanike." 11 Elisha amkaulisaga Hazaeli vamtendaga Hazaleli aone soni. Akajika yudya mnt'hu ywa Mnungu naye niyo akonga kuila. 12 Hazaeli amuuzaga, "Mkulu wailai?" Elisha niyo amhitula,

"Ni kwaviya himanya maihi yakuunga yaweziile want'hu wa Izilaeli," "Nowoke mizi ya magomela yawe kwa moto, nouwachinje wabwanga wawe kwa mabamba, nouwahondehonde wana wawe na kuwatumbula wavele wenule ubovu."

13 Hazaeli niyo agamba, "Nevidahike vivihi mndima ywako ekale enga kuli du adamanye kint'hu cha kweheela enga icho? Elisha niyo amhitula."

"Zumbe Mnungu kanilagisa kugamba nounde seuta ywa Asilia."

14 Akjika Hazaeli ahalawaga kwa Elisha niyo auya kwa zumbe ywakwe. Seuta Ben Hadadi amuuzaga, "Elisha kagaaze? Hazaeli niyo amhitula, kugamba kindedi nouhone." 15 Mna mwe dizuwa ditimile Hazaeli aguhaga mgolole uzamile na kuuugela mwa mazi, niyo amgubika nadyo mwe kihanga niyo abanika.

Hazaeli alongozaga hant'hu hakwe.

16 Mwo mwaka wa shano wo useuta wa Yeholamu mwana Ahabu, seuta ywa Izilaeli, Yeholamu mwana Yehoshafati niyo anda seuta ywa Yuda. 17 Akongaga kwikaila akanda na miyaka milongo mitatu na mbili. naho alongozaga uko Yelusalemu kwa miyaka mnane. 18 Azitimilaga sila za maseuta watuhu wa Izilaeli, enga wanduguze dya Ahabu ivo watendaga, kwaviya mkaziwe andaga mwana kike ywa Ahabu. Adamanyaga wihi ha Zumbe Mnungu, 19 mna Zumbe Mnungu haungaga kuibananga want'hu wa Yuda, kwaviya ya Daudi mndima ywakwe, kwaviya alaganaga kugamba welekwa wakwe nawalongoze mazuwa yose.

20 Mwo lupisi lwa Yeholamu, want'hu wa Edomu wasagukaga mwo useuta wa Yuda, wamwiikaga seuta ywawe. 21 Kwaivo Yeholamu ahalawaga na magali yakugendezwa ni falasi kuita Zaili. Mwo lupisi lwa nekilo watowani wa Edomu niyo wamzunguluka mna Yeholamu na watowani wakulu wawatowaga awo wawazunguluke, ivo wadahaga kunyilika na kugulukilaga kwe zikwawe. 22 Ivo want'hu wa Edomu wasagukaga mwo useuta wa Yuda mpaka ivi haluse. Mwo lupisi uulo wakaya wa Libina nawo niyo wasaguka.

23 Udamanyi wose wa seuta Yeholamu yawandikagwa mwe Kitabu cha Nk'humbukila cha Maseuta wa Yuda. 24 Yeholamu abanikaga na kumoselwa msanga mwe vikuta va kiseuta mwo mzi wa Daudi, naye Ahazia mwanawe Yeholamu alongozaga hant'hu hakwe.

25 Mwo mwaka wa mlongo na mbili mwo useuta wa Yeholamu mwana Ahabu seuta ywa Izilaeli, Ahazia mwana ywa Yeholamu seuta ywa Yuda, akongaga kwikaila. 26 Ahazia akongaga kwikaila akanda na miyaka milongo miidi na mbili, naho alongozaga kulawa Yelusalemu kwa lupisi lwa mwaka umwenga. Nine andaga etangwagwa Atali, mwezukuluwe dya seuta Omli seuta ywa Izilaeli. 27 Kwaviya Ahazia alombaga mwe mp'huga ya Ahabu, naye atimilaga lugendo lwa wanduguze dya Ahabu, adamanyaga wiihi ha Zumbe enga viya wadamanyaga wanduguze dya Ahabu.

28 Seuta Ahazia aitaga na Yeholamu mwana wa Ahabu kutowana nk'hondo na Hazaeli seuta ywa Asilia uko Lamoti Gileadi hant'hu Wasilia wandaga wamnumiza Yeholamu. 29 Niyo seuta Yeholamu auyaga mwo mzi wa Yezileeli vileke apate kulagulwa umwo alumizagwa uko akatowana na Hazaeli seuta ywa Asilia. Na yehe Ahazia mwana ywa Ahabu uko Yezeeli, kwaviya andaga mnyonge.