1 Naamani andaga kilongozi mkulu ywa watowani wa seuta ywa Asilia, naho andaga ywa kutunywa kwa seuta ywa Asilia kwaviya kwombokela yehe Zumbe awenk'haga uhumi watowani wa Wasilia. Andaga mtowani mdahi, mna andaga na unyonge wa matana. 2 Zuwa dimwenga watowani wa Asilia wagendaga kuwatowa Izilaeli niyo wamtaha mwanakike ywa Izilaeli, wamtendaga mtumwa ywa mkaza Naamani. 3 Zuwa dimwenga amgambaga lumbudye, "Nevinde vedi uneva zumbe ywangu anaita kwa mlotezi yudya ywa Samalia, hegu nakamhonya matana ayo zumbe ywangu." 4 Ivo Naamani agendaga kumgambila seuta ywakwe ayo alongile yudya mwanakike alawile mwe isi ya Izilaeli. 5 Seuta ywa Asilia niyo amgamba, "Weye wiite. Neniwandike baluwa kwa seuta ywa Izilaeli."

Ivo Naamani aitaga akanda kaguha vibesu alufu milongo mitatu va masawa na vibesu va zahabu alufu, hamwenga na mavalo yedi mlongo.

6 Ibaluwa iyo agalaga kwa seuta ywa Izilaeli yawandikagwa ivi "Namtuma mndima ywangu Namaani hamwenga ne baluwa ino, vileke umhonye mwe unyonge uwo wa matana."

7 Umwo seuta ywa Izilaeli eze asome ibaluwa idya atatulaga zisuke zakwe akagamba, "Kwani miye ni Mnungu? Kwani miye nadaha kukoma na kuuyula? Nii mnt'hu uyu akanigaila mnt'hu mta matana vileke nimhonye matana yakwe? Mnt'hu uyu azungula nk'humbizi na miye!"

8 Umwo Elisha mlotezi eze eve kugamba seuta ywa Wayahudi kalwebula isuke yakwe, amwigailaga ulosi akamgamba, "Weye kulwebuilai isuke yako? Nigaile umnt'hu uyo, vileke wamanye kugamba Izilaeli eyuko mlotezi!"

9 Ivo Naamani aitaga ne digali dyakwe dikugendezwa ni zifalasi niyo akimala he nk'hili ye nyumba ya Elisha. 10 Elisha amtumaga mndima ywakwe amgambe, aite akahake nk'hanana mfungate mwo mto Yolodani naye naande kahona pele unyonge wakwe. 11 Mna Naamani ahalawaga aihiwe akagamba, "Nehagamba mafani neeze anilombezele kwa Mnungu ywakwe akanigelekela mikono yakwe mwo unyonge wangu na kunihonya! 12 Togola, mito ya Abana na Falipali ya uko Damesiki hi yedi vitendese kujink'ha mito yose ya Izilaeli? Togola hyagendile kuhaka uuko niyo nahona unyonge wangu?"

13 Wandima wakwe Naamani wambasaga niyo wamgamba, "zumbe uneva uyo mlotezi akugambile udamanye mbuli yoyose ndala hegu hwadamanye? Haluse ayo akugambile kahake du vileke uhone?" 14 Ivo Naamani aseelaga kwo mto niyo adubwila nk'hanana mfungate enga ivo asigiilwe ni Elisha mnt'hu ywa Mnungu, Naamani niyo ahona pele. Nk'handa yo mwili wakwe niyo yauiya uwedi wakwe niyo yanda enga ya katiti. 15 Naamani na wandima wakwe wose wauyaga kwa mnt'hu ywa Mnungu niyo yehe amgamba, "Haluse himanya kugamba hehali Mnungu mtuhu mna ni mwa Izilaeli du.Haluse nakulombeza uhokele geleko idi akukwink'ha mndima ywako."

16 Elisha amhitulaga akamgamba, "Nakelisa kwa zina dya Zumbe Mnungu mta udahi, uyo humdamanyila ndima, henihokele geleko idi."

Hamwenga na kugamba Naamani agendeelaga kumlombeza ahokele digeleko idyo, mna Elisha alemelaga. 17 Naamani niyo agamba, "Uneva houhokele, nakulombeza kugamba mndima ywako enk'higwe kilundo cha msanga kikudaha kwinulwa ni mp'hunda mbili, kwaviya mndima ywako haalave naho malavo yo kokwa pele nt'hambiko kwa milungu mituhu yeyose, mna ni kwa Zumbe Mnungu du. 18 Mna Zumbe aniusile wavu mwe kint'hu iki kimwenga umwo haita na zumbe ywangu mwe nyumba ya mungu ywa Limoni, mnungu ywa Asilia na kumvika, Zumbe Mnungu amuusile wavu mndima ywako kwe mbuli ino."

19 Elisha niyo amgamba Naamani, Keitile kwa utondowazi. Naamani niyo ahalawa.

Naamani akanda akei kuita hale, 20 Gehazi mndima ywa Elisha niyo akelongela kimoyomoyo akagamba, "Mkulu hegu hamlekele Naamani Msilia aite haheina kuhokela chochose kulawa kwakwe. Nakelisa kwa zina dya Zumbe Mnungu, miye nenimgulukile haguhe kint'hu kwakwe." 21 Ivo Gehazi akongaga kumgulukila. Naamani eze aone kugamba eyuko mnt'hu akumgulukila aseelaga mwe digali dyakwe niyo amsingila na kumuuza "Togola, kwedi?"

22 Gehazi niyo ahitula, "Ni kwedi." "Mna zumbe ywangu kanituma nize hugambile, want'hu waidi we difyo dya walotezi we isi ye vigulu va Efulaimu weza haluse ivi, ivo aunga uwenk'he vibesu va masawa alufu nt'hatu na mavalo maidi ya suke zedi za kinyemi."

23 Naamani niyo amhitula, "Nakulombeza uguhe vibesu alufu mtandatu va masawa." Atigizaga kint'hu icho, niyo agelaga vibesu ivo va masawa mwe mikwiji miidi niyo awenk'ha waidi mwa wandima wakwe, woho nawo wamwigailaga wakanda wamsindikiza Gehazi. 24 Umwo Gehazi eze abule kwe kagulu uko Elisha andaga akekala, aguhaga idya mikwiji miidi niyo aigala kwe nyumba yakwe, niyo awagamba wandima wa Naamani wauye. 25 Yehe naye auyaga kwe nyumba ya Elisha niyo akonga kumdamanyila ndima, "Nokunda hii?"

Yehe niyo ahitula, "Aaah, hyaitile kokose zumbe ywangu,"

26 Mna Elisha niyo amgamba, "Togola moyo wangu hawiitile na weye mwa yudya mnt'hu akaseela mwe digali akakusingila? Togola ulu ni lupisi lwa kuhokela masawa na suke, na nk'honde za zeituni na za zabibu, mafyo ya ngoto na ng'ombe hegu wandima! 27 Haluse elo maine ya Naamani nayakwiiziile weye, naho weye na welekwa wako nawande na maine ayo mazuwa yose!"

Gehazi ahalawaga ha Elisha, naho andaga na matana, nk'handa yakwe yang'alaka chwee enga balafu.