1 Mwo mzi wa Samaliya kwandaga na wana kilume milongo mfungate wa Ahabu. Yehu awandikaga baluwa niyo azigala Samaliya kwa vilongozi wa Yezileeli na kwa wadala na wadya wakuwalela wana wa Ahabu. Baluwa yenye yagambaga ivi, 2 "Baluwa ino ikeza mpaka kwako du, kwaviya wana wa zumbe ywako we hamwenga na weye, weye una magali ya nk'hondo na falasi na mzi una gomela na vitowanilo, 3 msaguleni mta udahi mwa wana wa seuta ywako umuike kulanga ye difumbi dya seuta akajika mtowane kwa kuitowanila nyumba ya seuta ywako." 4 Mna vilongozi wa Samalia wogohesaga niyo wagamba, "Uneva maseuta waidi Yolamu na Ahazia hawadahile kumtowa Yehu, suwe nekidahe vivihi?" 5 Ivo mkimalizi ywe nyumba ye kiseuta, kilongozi wo mzi, wadala na walezi watumaga ulosi uno kwa Yehu wakagamba, "Suwe kiwandima wako naho chadamanya kila kint'hu icho ukulonga. Mna hekimsagule mnt'hu yoyose kunda seuta, weye damanya ivo ukuona ni vedi." 6 Yehu niyo awawandikila baluwa ya kaidi akagamba, "Uneva nyuwe mwatimila malagizo yangu, nigaileni mitwi ya welekwa wa seuta Ahabu luvi mwo lupisi enga ulu."

Welekwa milongo mfungate wa Ahabu wandaga wakekala hamwenga ne vilongozi wo mzi wa Samaliya awo wandaga wakawalela. 7 Ivo baluwa ize ibule kwawe wawaguhaga wana awo milongo mfungate wa seuta nakuwakoma wose. Waikaga mitwi yawe mwe zint'hangulu niyo wamwigaila Yehu uko Yezileeli. 8 Mwigala ulosi eze abule amgambaga Yehu, "Wegala mitwi ya wana wa seuta. Yehu niho awagamba, Viikeni mwe malundo maidi mwo mwingiilo lwo mnango wo mzi mpaka luvi mtondo." 9 Mtondo wakwe, Yehu niyo alawa kuse. Akimalaga ha want'hu wose na kugamba, " Nyuwe muwahuilwa, miye ni miye niikile mzungu wa kumkoma zumbe ywangu haheina masa mna niani awakomile awa wose? 10 Manyeni kugamba mbuli zose alongile Zumbe mwa welekwa wa Ahabu yakint'ha. Zumbe Mnungu kakint'hiza yadya alongile kwa sila ya mndima ywakwe Eliya." 11 Ivo Yehu amkomaga kila mnt'hu uyo asigale mwe nyumba ya Ahabu mwe Yezileeli ikanda ni hamwenga na wakulu wakwe na wambuyaze na walavant'hambiko wakwe, halekile mnt'hu yeyose.

12 Yehu ahalawaga Yezileeli niyo kuita Samaliya. Umwo akanda mwe sila hagihi ne nyumba kukant'hila mazoya ya ngoto nuko kugamba, "Nk'hambi ya Wadimi," 13 ivo Yehu abwilanaga na want'hu wo lukolo lwa Ahaziya seuta ywa Yuda niyo awauza, "Ni nyuwe wahi?" Niyo wamhitula,

"Suwe ki wandugu wa Ahaziya, naswe kiseela uku kize kiwasangalaza wana wa seuta na wana wa mkaza seuta." 14 Yehu niyo awalagiza, "Wagwileni wakanda wagima." Ivo wawagwilaga want'hu milongo mine na waidi wakanda wagima nakuwakoma hagihi ne disima dihagihi ne nk'hambi ya wadimi. Hahana hata yumwenga asigale. 15 Yehu afosaga naho, eze abule kwe sila abwilanaga na Yehonadabu mwana Lekabu, Yehu niyo amlamsa nakumgamba, "Weye una fanyanyi enga yangu? Togola neukelunge na miye nakunambiza? Yehonadabu niyo amhitula, heiye neninde hamwenga na weye. Yehu niyo agamba, kiketoze mikono." Waketozela mikono na Yehu niyo amkweza mwe digali dyakwe. 16 Amgambaga, "Nitimile vileke ukeonele ivo nili mhuhilwa kwa Zumbe Mnungu."Ivo watambaga hamwenga mwe digali dyakwe dikwigalwa ni falasi. 17 Weze wabule Samaliya, Yehu akomaga ndugu wose wa Ahabu haheina kumleka hata yumwenga ywawe. Viligane na ivo Zumbe Mnungu amgambilaga Eliya ivo nevinde.

18 Yehu awaduganyaga want'hu wa Samaliya na kuwagamba, "Seuta Ahabu aivikaga milungu hadodo du mna miye nenimtendele kujink'ha ivo. 19 Kwa ivo nitangileni walotezi wose wa mnungu Baali na want'hu wakwe wose wakumvika na walavant'hambiko wakwe wose. Vaungwa kila yumwenga abule, kwaviya naunga kumlavila Baali nt'hambiko nk'hulu, naho yeyose hanabule naakomwe." Iyo yandaga ni mzungu wa Yehu vileke awakome wandima wose wa mnungu Baali. 20 Yehu niyo agamba, "Lalikeni mdugano mkulu wa mviko kwa kumtunya mnungu Baali!" Ivo walalikaga mbuli iyo. 21 Yehu atumaga ulosi mwe isi yose ya Izilaeli vileke want'hu wose wa mnungu Baali wabule wose. Wezaga wose niyo wamema mwe Nyumba ya Baali kulawa nt'hendelo imwenga mpaka int'huhu. 22 Niho Yehu amlagizaga yudya akimaile mavalo ya hant'hu hakukile agambaga, "Yalave mavalo ayo vileke uwenk'he awo wakimaile mviko." Mkimalizi alavaga mavalo ayo niyo awenk'ha. 23 Yehu engilaga mwe Nyumba ya mnungu Baali akatimilana na Yehonadabu mwana Lekabu na kuwagamba wadya wandile mwe nyumba ya mnungu Baali, "Kauliseni kugamba ni wadya du wakumvika mnungu Baali wande umu, naho kugamba kusekunda na mnt'hu yeyose akumvika Zumbe Mnungu." 24 Ivo engilaga hamwenga na Yehonadabu wamlavile mnungu Baali nt'hambiko na malavo yo kokwa pele. Yehu andaga kawaika want'hu milongo mnane kuse ye nyumba ya kumvika Baali niyo awagamba, "Wakomeni want'hu awa wose. Yeyose naamlekele hata yumwenga ywawe anyilike, yehe mwenye naakomwe!"

25 Umwo Yehu eze abinde kulava nt'hambiko yo kokwa, awagambaga wamizi na wakulu, "Ingileni mkawakome wose. Msikumleka hata yumwenga ahalawe!" Wengilaga na mabamba yawe kwaajili ya kuwakoma wose, niyo wavilava vimba vawe kuse. Ivo wengilaga kwe chumba mwe nyumba ya kumvika mnungu Baali, 26 niyo wailava mikola yandaga mwe nyumba ya mnungu Baali na kuyoka pele. 27 Waumolaga mkola hamwenga ne nyumba ya kumvika Baali, niyo waitenda nyumba iyo kunda choyo hant'hu aho hata ivi dielo. 28 Ivo nivo Yehu ausaga mviko wa mnungu Baali mwe Izilaeli. 29 Mna halekaga kutenda wavu wa Yeloboamu mwana Nebati, awawazaganyaga Waizilaeli wagendeele kudamanya wavu wa kuvika milungu. Aikaga mahili ya ndama wa zahabu uko Beteli na Dani. 30 Zumbe Mnungu amgambaga Yehu, "Kuwatendela welekwa wa Ahabu yadya yose huunga uwatendele. Kwaivo nakugambila kugamba welekwa wako mpaka cheleko cha kane nawawalongoze Izilaeli." 31 Mna Yehu hatimile sigilizi za Zumbe Mnungu, Mnungu ywa Izilaeli kwa moyo wakwe wose halekaga wavu wa Yeloboamu uyo awazaganye Waizilaeli watende wavu.

32 Mwo lupisi ulo Zumbe Mnungu akongaga kuhungula ukulu we isi ya Izilaeli. Seuta Hazaeli ywa Asilia, awahumaga Waizilaeli nt'hendelo ze isi yawe, 33 kulawa nt'hendelo ya ulailo wa zuwa yo mto Yolodani ne isi za Gileadi na Gadi na Lubeni na Manase na kulawa Aloeli mwe dikolongo dya Alinoni mwe isi za Gileadi na Bashani.

34 Mbuli zose adamanye Yehu na udahi wakwe ziwandikwa kwe kitabu che Nk'humbukila cha maseuta wa Izilaeli. 35 Abanikaga niyo amoselwa msanga uko Samaliya. Mwanawe Yehoahazi alongozaga hant'hu hakwe. 36 Yehu alongozaga Izilaeli akanda mwo mzi wa Samalia kwa miyaka milongo miidi na mnane.