1 Manase andaga na miaka mlongo na umwenga umwo andaga seuta ywa Yuda. Aikailaga Yelusalemu kwa miaka milongo mishano na mishano. Zina dya ine atengwagwa Hefiziba 2 Manase adamanyaga maihi enga ayadya yadamanyagwa ni want'hu wa si zagulusagwa ni Zumbe Mnungu ha Waizilaeli. 3 Azengaga hant'hu ha kuvikila ha want'hu hewemmanyize Mnungu ywe kindedi aho hamwolagwa ni ise Hezekia. Azengaga kilingo cha kumvikila Baali naho adamanyaga hili dya mnala wa Ashela enga ivo adamanyaga seuta Ahabu ywa Izilaeli. Niho Manase avikaga nt'hondo. 4 Azengaga ivo vilingo va milungu mwe Nyumba ya Zumbe Mnungu umwo Zumbe Mnungu naavikilwe. 5 Mwe zisebule zose zimbili ze Nyumba ya Zumbe Mnungu, Mnase azengaga vilingo va want'hu wakuvika vint'hu vimwo ulanga, enga viya zuwa, nt'hondo no umwezi. 6 Awalavaga wanawe we kilume kunda malavo ya kokwa. Atoaga msia na mbuli za kigangana, naho auzaga mbuli kwa awo wata malungu na wasai. Adamanyaga wiihi mkulu ha Zumbe Mnungu, wiihi wamtendaga Zumbe Mnungu afilise maya. 7 Aguhaga mkola idihili dya Ashela idyo adidamanyaga niyo adiika mwe Nyumba ya kumvika zumbe Mnungu, hant'hu Zumbe Mnungu awagambaga Daudi na mwanawe Sulemeni, "Mwe Nyumba ino mwe Yelusalemu, ni hant'hu nihasagule kulawa mwa mkabila yose ya Izilaeli kunda hant'hu nenivikwe mazuwa yose. 8 Uneva Waizilaeli wanadamanya kwa wengele yadya nilongile na kutimila Zisigilizi zangu zose wagambilwe ni mndima ywangu Musa, heniwatende wangadike naho mwe isi nawenk'haga wakale wawe." 9 Mna want'hu wa Izilaeli hawevaga. Manase awazaganyaga niyo wadamanya wiihi utendese kujink'ha wiihi we zisi izo Zumbe Mnungu azigulusaga umwo Waizilaeli wandaga wakomboka.

10 Zumbe Mnungu alongaga kwombokela wandima wakwe walotezo akagamba, 11 "Seuta Manase ywa Yuda adamanya mbuli zikuihiza, kujink'ha ziya wadanayaga Waamoli. Yehe na mahili yakwe kawazaganya want'hu wa Yuda niyo wadamanya wavu. 12 Kwaviya Manase kadamanya ayo, Miye Zumbe Mnungu, Mnunu ywa Izilaeli nenigale nk'huswank'huswa mwe Yelusalemu na Yuda ayo kila akuunga ayeve neetuke. 13 Neni itowe Yelusalemu enga ivo natendile kwa Samalia na enga ivo natendile kwa seuta Ahabu ywa Izilaeli hamwenga na welekwa wakwe. Henisigaze chochose mwe Yelusalemu, neinde enga kahungu kasumnt'higwe niyo kagidulwa kigubigubi. 14 Neni waleke want'hu wangu nawasigale wagima naho neni wenk'hize kwa wank'hondo wawe vileke wawatowe na kuiguha isi yawe, 15 neni wadamanyile ayo yose kwaviya wanileka na kunigela maya kukongela aho wakale wawe walawaga Misili mpaka ivi dielo."

16 Hamwenga na ayo, ukaleka wavu wakwe, Manase awazaganyaga want'hu wa Yuda niyo watenda wavu kwa zumbe Mnungu, naho Manase awakomaga wengi heweina masa, skame niyo yamema mwe zint'hendelo zose za Yelualemu.

17 Kila kint'hu kituhu atendaga Manase hamwenga no wavu adamanye viwandikwa mwe kitabu cha nk'humbukila cha maseuta wa Yuda. 18 Manase abanikaga niyo akumoselwa msanga kwe kiunga che kiseuta cha Uza, niyo mwanawe uyo Amoni anda seuta hant'hu ha ise.

19 Amani andaga na miyaka milongo miidi na miidi umwo akanda seuta ywa Yuda. Andaga seuta kwae miyaka miidi uko Yelusamemu. Nine etangwagwa niye Mashulemeti mwana Haluzi ywa Yotiba. 20 Amoni naye amtendelaga Zumbe Mnungu wavu enga ivo ise Manase atendaga. 21 Atendaga ayadya atendaga ise, ayavikaga mahili yadya ise ayavikaga na kukefunamiza hasi ya mahili ayo. 22 Alemelaga kutimila sila za Zumbe Mnungu ywa wakale wakwe, naho hatimilaga ivo aungaga Zumbe Mnungu.

23 Wambizi wo useuta wakwe waikaga mzungu wiihile mwa yehe niyo wamkomela kwe nyumba yakwe ye kiseuta. 24 Niyo want'hu wa Yuda wawakomaga wose waikaga mzungu wiihile mwa seuta Amoni, ivo niyo wamwiika wanawe uyo Yosia kunda seuta hant'hu ha ise.

25 Mbuli nt'huhu zose za mwo useuta wa Amoni, yawandikwagwa mwe kitabu cha nk'humbukila cha maseuta wa Yuda. 26 Amoni amoselwagwa msanga kwe vikuta ukwo kwe kiunga cha Uza, mwanawe uyo Yosia niyo anda seuta hant'hu ha ise.