1 Mazuwa ayo Hezekia alumisagwa niyo anda hagihi na kubanika, mlotezi Isaya mwana Amozi aitaga niyo amgamba, "Ivi nivo akulonga Zumbe Mnungu, ‘Damanya mbuli zako mwe nyumba yako kwaviya noubanike, houhone.’"

2 Hezekia ahitukilaga kwo lukandula na kumlombeza Zumbe Mnungu, 3 Hezekia ailaga kwa usungu akagamba "Weye Zumbe Mnungu, nakulombeza kumbukila ivo nandaga mkindedi nahoa mhuwilwa kwa moyo wangu wose na kudamanya ayedi ho undiilo wako hako." 4 Mna Isaya umwo akei kwomboka mwo uwa wa hagati, Zumbe Mnungu amgambaga, 5 "Uya ukamgambe Hezekia, mkulu ywa want'hu wa Zumbe Mnungu, Miye Zumbe Mnungu, Mnungu ywa mkale ywako Daudi, hiva kulombeza kwako naho hiyaona masozi yako. Ivo oeni kuhonye, naho mwe dizuwa dya katatu nowiite mwe Nyumba ya Zumbe Mnungu. 6 Nenikongezele miyaka mlongo na shano ya kwikala. Nenikuyokole weye hamwenga no mzi uno kulawa mwo udahi wa seuta ywa Asilia. Neniwamile mzi uno kwaajili ya nt'hunyo yangu miye na kwaajili ya ivo wamgambilaga mndima ywangu Daudi." 7 Ivo Isaya niyo agamba, "Damanyeni mti wa tunda dya tini niyo mwamkanda mwe diihu vileke ahone." 8 Hezekia niyo amuuza Isaya, "Ni kilagiso chani icho nekilagise kugamba kindedi Zumbe Mnungu naanihonye naho dizuwa dya katatu yakajika nenidahe kuita kwe Nyumba ya Zumbe Mnungu?" 9 Isaya niyo amhitula, Iki neinde kilagiso kwako kulawa kwa Zumbe Mnungu, "kugamba Zumbe Mnungu naadamanye enga ivo alongaga. Togola kizuli cha zuwa mwe vibo kigende lugendo lwa nk'hacho mlongo kulongole hegu kiuye nk'hacho kunyuma?" 10 Hezekia niyo amhitula, "Ni mbuli ikudahika kwa kizuli kuita kulongole nk'hacho mlongo kujink'ha kuuya nyuma nk'hacho mlongo." 11 Isaya amlombezaga Zumbe Mnungu, naye Zumbe Mnungu niyo adamanya kizuli kuuya nk'hacho mlongo mwo vibo vizengigwe ni Ahazi.

12 Mwo lupisi ulo, seuta Melodaki Baladani mwana Baladani seuta ywa Babeli evaga kugamba Hezekia kalumiswa naho haluse kahona, amtumilaga ulosi hamwenga na geleko. 13 Ivo Hezekia awahokelaga wadya wegala ulosi niyo awalagisa ugoli wakwe. Nyumba ya kuikila vint'hu na masawa na zahabu na mavut ya mhemp'he na vilungo va kwambikila nk'hande na mavuta ya yombe na nyumba ya kuikila vint'hu vakwe vose va kitowanilo na vint'hu vose ivo vendile mwe nyumba ya kuikila vint'hu. Hakwandaga chochose mwe nyumba yakwe ya kiseta hegu isi yakwe iyo hawalagisaga. 14 Ivo mlotezi Isaya aitaga kwa seuta Hezekia niyo amuuza, "Want'hu awa wagaaze naho walawahi?" Naye Hezekia niyo amhitula, "Waniziilaga kulawa isi ya hale uko Babeli.?"

15 Niyo amuuza, "Waonai mwe nyumba yako ya kiseuta?" Hezekia niyo amhitula, "Kiwalagisa yose ye mwe Nyumba yangu ya kiseuta. Hahana chochose mwe nyumba yangu ya kuikila vint'hu icho hiwalagise." 16 Niyo Isaya amgamba Hezekia, "Tegeleza ulosi wa Zumbe Mnungu. 17 Kaula, mazuwa yeza vint'hu vose vimwe nyumba yako na vint'hu vose ivo aduganye iso mpaka mwo lupisi ulu nevigalwe mpaka Babeli. Hahana kint'hu chochose nekisigale. Ivi nivo akulonga Zumbe Mnungu. 18 Naho wana wako we kilume nawatahigwe, nawo nawatendigwe matowashi vileke wadamanye ndima mwe nyumba ya kiseuta uko Babeli." 19 Hezekia amgambaga Isaya,"Ulosi uno unigambile kulawa kwa Zumbe ni wedi." Mna seuta alongaga ivo kwaviya afanyanyaga kugamba, "Nii isekunda iivo uneva nokunde na utondowazi na wamizi mwo lupisi lwo useuta wangu."

20 Udamanyi mtuhu wa Hezekia, ukutoga kwakwe, na malagizo mwa ivo azengile bwawa na kusimba mkologombe wa kuselezela mazi mwo mzi, yawandikagwa mwe kitabu cha nk'humbukila cha Maseuta wa Yuda. 21 Hezekia abanikaga, Mwanawe Manase naye ekailaga hant'hu ha ise.