1 Zuwa dimwenga kafyo ka walotezi wandaga waka mkalaliza Elisha wakamgamba, "Kaula hant'hu aha kikwikala na weye hatedesa udodo 2 Haluse kilekele kiite Yolodani kikasenge maziti vileke kizenge hant'hu hakuunga hakint'he mwo kwikala."

Elisha niyo awagamba, "Ni vedi, tendeni ivo."

3 Yumwenga ywawe amlombezaga Elisha kugamba aitanye nawo, naye niyo azumila, 4 ivo aitaga nawo. Weze wabule Yolodani, wakongaga kusenga maziti. 5 Yumwenga ywawe umwo andaga akasenga maziti, ihoya yasomokaga niyo yengila mwa mazi. Yudya mnt'hu niyo akonga kuila akamgamba Elisha, "Mkulu, nataavivihi? Hoya ino hita kulombeza!"

6 Elisha niyo amuuza, "Itomokelahi?"

Yudya mnt'hu niyo amlagisa Elisha aho itomokele. Elisha niyo asenga kaziti na kukaduula mwa mazi hadya itomokele, aaho idya ihoya niyo yayeya mwa mazi. 7 Elisha niyo amgamba yudya mnt'hu, "Ivulule." Yudya mnt'hu afunamaga niyo aivulula.

8 Mwo lupisi ulo seuta ywa Asilia, andaga na nk'hondo na Wazilaeli. Eze waivane na wakulu wa mafyo ya watowani wakwe agambaga, Neniike nk'hambi hasiku na hant'hu hasiku. 9 Mna Elisha atumaga ulosi kwa seuta ywa Izilaeli akamkanya, "Msekujata hagihi na aho hant'hu kwaviya Waalamu nawakeika lumwe wahakump'hukile." 10 Ivo seuta ywa Izilaeli awegalaga want'hu hadya agambilwe na mndima ywa Mnungu, Elisha agendeelaga kumkanya seuta naye seuta akeikaga lumwe. Mbuli ino neinda ikalaila nk'hanana nyingi.

11 Seuta ywa Asilia engilaga kinyulu kwa ayo. Awetangaga wambizi vilongozi wakwe niyo awauza, "Niani yumwenga ywetu akumgwa mgongo seuta ywa Izilaeli?"

12 Yumwenga ywawe niyo ahitula seuta, "Hahali yeyose umu mwetu akukisezenga. Mlotezi Elisha niye akumgambila seuta ywa Izilaeli kila icho noulonge, hata unalonga kwa kinyele kwe chumba chako."

13 Ivo agambaga, "Iteni mkakaule uko eli vileke nigale want'hu wakamgwiile niyo agambigwa kugamba eyuko Dosani." 14 Seuta atumaga fyo kulu dya watowani wakanda na magali yakugendezwa ni falasi. Wabulaga ho mzi uwo nekilo niyo wauzungulukila. 15 Mtootondo utimile, mndima ywa Elisha afosaga kuse niyo aona mafyo ya watowani wakanda ne zifalasi zawe na magali yawe wauzunguluka umzi. Auyaga kwa Elisha niyo amgamba, "Hangi suwe wenye zumbe dyangu! Nekitende vivihi?"

16 Elisha niyo amhitula akagamba, "Usekogoha kwaviya we hamwenga na suwe wabindaingi kuwajink'ha woho." 17 Niyo Elisha alombeza, "Weye Zumbe umgubule meso vileke aone!" Ivo Zumbe niyo amgubula ameso uyo mbwanga, aonaga falasi na magali ya moto yakanda kila hant'hu mwo mnima wose kumzunguluka Elisha.

18 Wasilia weze wawakup'hukile, Elisha amlombezaga Zumbe Mnungu akagamba, "Nakulombeza uwatende want'hu awa wande mant'hunt'hu, Zumbe Mnungu azumilaga malombezo yakwe na kuwatenda wande mant'hunt'hu." 19 Niho Elisha awaitila na kuwagamba, "Mwaga sila, uno hiyo mzi mkuuzungula. Nitimileni miye niwegale kwa yudya mkuuzungula." Naye niyo awalongoza mpaka Samalia.

20 Aho weze wengile mwo mzi, Elisha alombeza, "Wee Zumbe wagubule meso vileke waone." Zumbe niyo awagubula meso yawe. Nawo niyo wakebuila we mwo mzi wa Samalia.

21 Seuta ywa Izilaeli eze awaone Wasilia amuuzaga Elisha, "Togola tate niwakome? Niwakome?"

22 Elisha niyo ahitula, "Bule usekuwakoma, kwaviya awa ukuunga uwakome wawatahaga kwa sime yako na uta wako. Wenk'he nk'hande na mazi vileke uwaleke wauye kaya kwa zumbe ywawe." 23 Seuta ywa Izilaeli awadamanyilaga wila mkulu, weze wabinde ukudya na kunywa awavuzaga kwa zumbe ywawe. Kukongela mwo lupisi ulwo, Wasilia hawagezaga naho kuikup'hukila kwa lupisi lutali isi ya Izilaeli.

24 Akajika aho, seuta Ben Hadadi wa Asilia aduganyaga fyo dyakwe dyose dya watowani afosaga na kuuzunguluka mzi wa Samalia, 25 ivo kwandilisaga na gumbo mwo mzi wa Samalia, Mtwi we mp'hunda nounda na yombe dya vibesu milongo mnane va masawa na gilamu gana ya mavi ya suwa nevinda na yombe dya vibesu vishano va masawa.

26 Zuwa dimwenga seuta ywa Izilaeli akanda akagenda mwo lukandula lwo mzi, evaga mvele yumwenga akamwitanga, "Nambize zumbe ywangu seuta!"

27 Seuta niyo agamba, "Zumbe hanakwambize miye nohwambize vivihi? Kwaviya miye hina ngano hegu divai. 28 Mna niyo seuta auza, kwani kuna mbwai?"

Yudya mvele niyo amhitula, "Mvele uyu kaniluvya zuwa dimwenga kimdye mwanangu, zuwa dikutimila nekimdye mwanawe. 29 Nekimwambika mwanangu na kumdya, zuwa ditimile niyo namgamba kimdye mwanawo, mna yehe nakanda kamfisa!"

30 Aho seuta eze eve mbuli za uyo mvele atatulaga zisuke zakwe kwa kinyulu, want'hu nawo wandaga mwo lukandula wamuonaga kavala valo dya gunia hasi ye zisuke zakwe. 31 Naye niyo agamba, "Mnungu nanikome, Elisha hanakant'higwe mtwi wakwe dyeloi!" 32 Naho asigilaga mwigala ulosi akamlete Elisha. Mwo lupisi ulwo Elisha andaga kaya hamwenga na wadala wezile kumsinya. Umwo andaga hanati mpaka mwigala ulosi ywa seuta, Elisha awagambaga, "Yudya mkomi kamsigila mnt'hu eze kunikant'ha umtwi! Akanda kabula aha vugaleni ulwivi, naho msekumlekela engile. Naho zumbe ywakwe amtimila kunyuma." 33 Umwo andaga akei kubinda ukulonga, seuta niyo abula akagamba, "Makunt'ho aya yalawa kwa Zumbe! Nii naho nigendeele kumgojela Zumbe?"