1 Mwo mwaka wa milongo miidi na mfungate mwo kwikaila kwakwe seuta Yeloboamu seuta ywa Izilaeli, Uzia mwana Amazia seuta ywa Yuda, akongaga kwikaila, 2 akanda na miyaka mlongo na mtandatu. Ekailaga uko Yelusalemu kwa miyaka milongo mishano na miidi. Zina dya nine etangwagwa Yekolia kulawa Yelusalemu. 3 Atimilaga mliganyizo wa ise Amazia kwa kudamanya mbuli zamwelelaga Zumbe Mnungu. 4 Mna hant'hu ha hakuvika milungu ye kipagani kwe milima hahamolwagwa, naivo want'hu wagendeelaga kulava nt'hambiko uuko na koka ubani. 5 Zumbe Mnungu amgelaga matana seuta Uzia, ayo andaga nayo mazuwa yose yo wikazi wakwe mpaka mwe dizuwa abanikilaga. Ekalaga ekedu mwe nyumba. Yotamu mwana seuta andaga niye mwamizi we nyumba ye kiseuta, naye niyo alongoza want'hu we isi.

6 Kila kint'hu yasigale na ayo adamanyaga seuta Uzia yawandikwagwa mwe Kitabu che misimo ya maseuta wa Yuda. 7 Uzia abanikaga niyo amoselwa msanga uko kwe vikuta va wakale wakwe mwo mzi wa Daudi, niyo Yonatani umwanawe anda seuta hant'hu ha ise.

8 Mwo mwaka wa milongo mitatu na mnane mwo kwikaila kwakwe Uzia seuta ywa Yuda, Zakalia mwana Yeloboamu andaga seuta ywa Izilaeli akanda ekala uko Samalia, yehe alongozaga miezi mtandatu du. 9 Zakalia adamanyaga wavu ha Zumbe, enga ivo wakale wakwe watendaga. Alemelaga kuleka wavu uudya adamanyaga Yeloboamu mwana Nebati awazaganyaga Waizilaeli wadamanye wavu. 10 Kwa kinyele, Shalumu mwana Yabeshi aikaga mzungu wiihile mwa seuta Zakalia, amtowaga mwe kiyeti cha want'hu niyo amkoma yehe niyo anda seuta hant'hu hakwe.

11 Kila kint'hu kituhu adamanye Zakalia nekiwandikwa mwe Kitabu cha Nk'humbukila cha Misimo ya Maseuta wa Yelusalemu.

12 Ivo Ndagano neikint'ha, idya yaikwagwa ni Zumbe Mnungu kwa seuta Yehu akagamba, "Welekwa wako nawande maseuta wa Izilaeli mpaka cheleko cha kane."

13 Mwo mwaka wa milongo mitatu na kenda yo kwikaila kwakwe seuta Uzia ywa Yuda, Shalumu mwana Yabeshi andaga seuta ywa Izilaeli. Yehe alongozaga uko Samalia kwa mwezi umwenga.

14 Akajika Manehamu mwana Gadi aitaga kulawa Tiliza mpaka Samalia. Agendaga kumtowa Shalumu mwana Yabeshi uko Samalia niyo amkoma, yehe niyo anda seuta hant'hu hakwe. 15 Kila kint'hu adamanyaga Shalumu ne mizungu iihile vakwe vose, neviwandikwa mwe Kitabu cha Nk'humbukila che Misimo cha Maseuta wa Izilaeli. 16 Manahemu umwo andaga akalawa Tiliza aubanangaga pele mzi wa Tapua na want'hu wakwe na kila hant'hu hauzungulukaga mzi uwo kwaviya hawazumilaga kukeika mwo udahi wakwe. Naho iviyaiviya awatumbujulaga izinda wavele wose wandaga wabovu.

17 Mwo mwaka wa milongo mitatu na kenda wa kwikaila kwakwe seuta Uzia ywa Yuda, Manahemu mwana Gadi andaga seuta ywa Izilaeli. Alongozaga uko Samalia kwa miyaka mlongo. 18 Adamanyaga wavu ha Zumbe Mnungu mwa mazuwa yakwe yose yo useuta, naho halekile wavu wa seuta Yeloboamu mwana Nebati awazaganyaga Wazilaeli watende wavu. 19 Ivo Puli seuta ywa Asilia aikump'hukilaga Izilaeli, Menahemu naye niyo amwink'ha kilo milongo mitatu na kane za masawa vileke amwambize kuugela ludole useuta wakwe mwe isi ya Izilaeli. 20 Manahemu aguhaga matundu kwa kutigiza kulawa kwa want'hu wagoli wa Izilaeli. Kila yumwenga aungwagwa kulava vibesu milongo mishano va masawa. Ivo Tiligilati Pilesa ywa Asilia alavaga niyo auya kwe isi yakwe.

21 Kila kint'hu adamanyaga Manahemu kiwandikwa mwe Kitabu cha nk'humbukila cha misimo ya maseuta wa Izilaeli. 22 Manahemu abanikaga niyo amoselwa msanga. Pekahia mwanawe andaga seuta hant'hu ha ise.

23 Mwo mwaka wa milongo mishano wo useuta wakwe Uzia seuta ywa Yuda, Pekahia mwana Manahemu andaga seuta ywa Izilaeli uko Samalia, niyo alongoza kwa miyaka miidi. 24 Pekahia adamanyaga uwihi ha Zumbe. Halekaga wavu uudya wa Yeloboamu mwana Nebati uyo awazaganyaga Waizilaeli wadamanye wavu. 25 Mkulu yumwenga ywa watowani wakwe uyo Peka mwana Lemalia, aikaga mzungu wiihile akanda na want'hu milongo mishano kulawa Gileadi, niyo wamkoma Pekehia hamwenga na Agobu na Alia mwe digomela dye nyumba ye kiseuta uko Samalia. Peka eze amkome Pekahia, yehe niyo anda seuta.

26 Kila kint'hu kituhu adamanyaga Pekahia chawandikwagwa mwe Kitabu cha nk'humbukila che misimo ya maseuta wa Izilaeli.

27 Mwo mwaka wa milongo mishano na miidi yo useuta wa seuta Uzia ywa Yuda, Peka mwana Lemalia akongaga kwikaila uko Samalia, alongozaga kwa lupisi lwa miyaka milongo miidi. 28 Atendaga wiihi ha Zumbe Mnungu kwa kutimila mliganyizo wiihile wa seuta Yeloboamu mwana Nebati, awazaganyaga Waizilaeli wadamanye wavu. 29 Mwo lupisi lwa Peka seuta ywa Izilaeli, Tigilati Pileseli seuta ywa Asilia, waitahaga mizi ya, Iyoni na Abeli Beti Maaka na Yanoa na Kadeshi na Hazoli hamwenga ne isi ya Gileadi, Galilaya na Nafutali na kuwasamizila want'hu uko Asilia.

30 Mwo mwaka wa milongo miidi ya useuta wa Yotamu mwana Uzia seuta Ywa Yuda, Hoshea mwa na Ela aikaga mzungu mwa Peka, mwana Lamalia naho amkomaga, niyo alongoza hant'hu hakwe. 31 Udamanyi mtuhu wa Peka na yose ayadamanyaga yawandikagwa mwe Kitabu Che Misimo ya Maseuta wa Izilaeli.

32 Mwo mwaka wa kaidi wo useuta wa Peka mwana Lemalia uko Izilaeli, Yotamu mwana wa Uzia seuta wa Yuda akongaga kwikaila Yuda. 33 Andaga na miyaka milongo miidi na mishano aho akongaga kwikaila, alongozaga uko Yelusalemu kwa lupisi lwa miyaka mlongo na mtandatu. Nine etangwagwa Yelusha, mwana Sadoki. 34 Adamanyaga mbuli zimwelela Zumbe Mnungu, enga ivo adamanyaga ise Uzia. 35 Hata ivo hant'hu ho kuvikila milungu yo udant'hi hahabanangwagwa, naho want'hu wagendeelaga kulava malavo na kufunk'hiza ubani kwe milima. Yonasani azengaga nk'hili ya mkoma mahanya ye nyumba ya Zumbe Mnungu.

36 Udamanyi mtuhu wa Yonasani na yose adamanyaga yawandikagwa mwe kitabu che nk'humbukila cha misimo ya maseuta wa Yuda. 37 Mwo lupisi lwa Yonatamu, Zumbe Mnungu amtumaga seuta Lesini ywa Asilia na seuta Peka ywa Izilaeli vileke wakaikup'hukile Yuda. 38 Yonasani abanikaga na kumoselwa msanga kwe vikuta ve kiseuta mwo mzi wa Daudi niyo Mwanawe Ahazi alongozaga hant'hu hakwe.