1 Umwo Yehoyakimu andaga seuta, Nebukadineza seuta ywa Babeli aikump'hukilaga Yuda. Yehoyakimu niyo amdamanyila ndima seuta ywa Babeli kwa miyaka mitatu. Mna seuta Yehoyakimu niyo asaguka na kuleka kumdamanyila ndima seuta ywa Babeli. 2 Zumbe Mnungu niyo egala Wakalidayo, Wasilia na Wamoabu na Waamoni vileke wakaikump'hukile isi ya Yuda na kuibananga, viligane no ulosi wa Zumbe Mnungu uwo alongaga kwombokela kwa wandima wakwe walotezi. 3 Ikindedi mbuli zi zalailaga uko Yuda viligane ne sigilizi ya Zumbe vileke awause hakwe kwajili yo wavu adamanyaga Manase na yose ayo adamanyaga, 4 ikanda ni hamwenga kukoma want'hu heweina malema. Kwaviya Aijabazaga Yelusalemu sakame ya want'hu hewebanange dyodyose, naho Zumbe hakuzumila kuusila wavu uwo.

5 Ivo mbuli zose zisigale na izo adamanye Yehoiakimu, ziwandikwa mwe Kitabu cha nk'humbukila cha Maseuta wa Yuda. 6 Yehoyakimu eze abanike amoselwagwa msanga niyo mwanawe uyo Yekonia anda seuta hant'hu ha ise.

7 Seuta ywa Misili hahalawaga na watowani naho mwe isi yakwe kwaviya seuta ywa Babeli autahaga useuta wakwe wose kukongela kwa Kazuto ka Misili mpaka mto Eufulati.

8 Yehoyakini andaga na miaka mlongo na mnane umwo akongaga kwikaila. Yehe alongozaga kwa miaka mitatu. Nine etangwagwa Nehushita mwana Elinasani kulawa Yelusalemu. 9 Yehoyakini adamanyaga wavu ha Zumbe Mnungu enga ivo ise adamanyaga. 10 Yandaga ni mwo useuta wakwe umwo vilongozi wambizi wa Nebukadineza waikump'hukilaga Yelusalemu niyo wauzunguluka umzi. 11 Nebukadineza mwenye akwelaga kwo mzi uwo wa Yelusalemu umwo wakulu wa watowani wakwe wauzungulukaga. 12 Naho Yehoyakini seuta ywa Yuda akelekelaga mwenye mwo udahi wa seuta ywa Babeli, yehe mwenye na nine na wandima wakwe, na vilongozi wakulu na wakulu wa watowani wakwe. Mwo mwaka wa mnane wo useuta wakwe seuta ywa Babeli, niho amguhaga Yehoyakini kunda mtahigwa. 13 Naho Zumbe Mnungu agambaga, Nebukadineza seuta ywa Babeli aviguhaga vint'hu vose vandaga kwe Nyumba ya Zumbe Mnungu, na kwe nyumba ye kiseuta. Avibogozolaga vint'hu vose va zahabu vandaga ivo Selemani vadamanyagwa ni seuta Selemani ywa Izilaeli. Vint'hu ivo vandaga kwe Nyumba ya Zumbe Mnungu. 14 Awatahaga want'hu wose kulawa Yelusalemu kuita ko utumwa; Vilongozi wose na wose wandaga wadahi na mafundi wose na wasani kwa hamwenga wandaga want'hu alufu mlongo. Hakwandaga na yeyose asigalaga, wasigalaga ni wadya du wandilisaga wakiwa. 15 Nebukadineza amguhaga Yehoyakini mpaka Babeli kunda mtahigwa ikanda ni hamwenga na wakaziwe, nine dya Yehoyakini na wakulu wa watowani wakwe na vilongozi we isi ya Yuda. 16 Iviyaiviya, Seuta ywa Babeli awa samizilaga Babeli idifyo dyose dya watowani alufu mfungate, wata ludole naho wadahi wa nk'hondo na want'hu alufu wamanyi.

17 Nebukadineza seuta ywa Babeli amtendaga Matania ise dya Yehoyakini kunda seuta hant'hu hakwe, niyo amwink'ha zina tuhu kunda niye Sedekia.

18 Sedekia andaga na miaka milongo miidi na umwenga umwo akakonga kwikaila. Yehe naye alongozaga mwe Yelusalemu kwa miaka mlongo na umwenga. Nine etangagwa Humuti mwana Yelemia kulawa Libina. 19 Mna Sedekia naye atendaga maihi ha Zumbe Mnungu enga ivo atendaga Yohoyakimu. 20 Zumbe andilisaga na maya na want'hu wa Yelusalemu na Yuda vatendaga awause walawe hakwe.