1 Mwo mwaka wa milongo miidi na nt'hatu wo useuta wa seuta Yoashi ywa Yuda, Yehoahazi mwana ywa Yehu akongaga kwikaila Izilaeli kulawa Samalia. Naye alongozaga kwa lupisi lwa miyaka mlongo na mfungate. 2 Adamanyaga wavu ha Zumbe Mnungu kwa kutimila wavu wa Yeloboamu mwana Nebati, awazaganyaga Waizilaeli wadamanye wavu, naho halekile udamanyi wakwe wiihile. 3 Zumbe Mnungu aihiyagwa na kuwatenda want'hu wa Izilaeli wahumwe mwe nk'hondo mwa seuta Hazaeli ywa Asilia na mwanawe Ben Hadadi. 4 Yehoahazi amlombezaga Zumbe Mnungu, Zumbe naye niyo amtegelezaga kwaviya aonga ivo seuta ywa Asilia ivo andaga akawasulumizisa Waizilaeli. 5 Zumbe Mnungu niyo awenk'ha want'hu wa Izilaeli kilongozi uyo awakombole kulawa kwa Wasilia, naho wekalaga kwa utondowazi enga ivo wekalaga aho nk'hongo. 6 Hata ivo hawalekaga kudamanya wavu wa seuta Yeloboamu uyo awazaganyaga want'hu wa Izilaeli watende wavu. Hamwenga na ayo wagendeelaga na wavu wawe ne dihili dya mnungu ywe kivele Ashela dyandaga dikei kukimala uko Samalia.

7 Yehoahazi handaga na watowani, mna andaga na wagendeza falasi milongo mishano na magali mlongo na watowani alufu mlongo. Ino ni kwaviya seuta ywa Asilia andaga kawakoma watowani wa Izilaeli na kuwajatangiza hasi enga luvumbi.

8 Mbuli zose ne zint'huhu adamanyaga Yehoahazi na udahi wakwe wawandikagwa mwe Kitabu cha Nk'humbukila che misimo ya maseuta wa Izilaeli. 9 Yehoahazi abanikaga na kumoselwa msanga uko Samalia, na Yehoashi mwanawe niyo anda seuta hant'hu ha ise.

10 Mwo mwaka wa milongo mitatu na mfungate wo useuta wa seuta Yoashi ywa Yuda, Yehoashi mwanawe Yehoahazi, akongaga kwikaila izilaeli uko Samalia, naho useuta wakwe wagendeelaga kwa lupisi lwa miyaka mlongo na mtandatu. 11 Yehoashi naho adamanyaga wavu ha Zumbe Mnungu na kutimila mliganyizo wa seuta Yeloboamu mwana Nebati uyo awazaganye want'hu wa Izilaeli. 12 Mbuli zose ne zint'huhu adamanyaga Yehoashi, no udahi wakwe wa nk'hondo ivo atoane na seuta Amazia ywa Yuda, zawandikwagwa mwe Kitabu cha nk'humbukila che misimo za maseuta wa Izilaeli. 13 Yehoashi abanikaga na kumoselwa msanga mwe vikuta va kiseuta uko Samalia, na mwanawe Yeloboamu ywa kaidi alongozaga hant'hu ha ise.

14 Mlotezi Elisha ahumaga unyonge wiihile. Umwo andaga hagihi na kubanika, seuta Yehoashi ywa Izilaeli amtalamkilaga. Eze ambwiile Elisha ailaga akagamba, "Ho Tatee, ho tatee! Weye nokunda mwamizi mdahi ywa Izilaeli!"

15 Elisha niyo amgamba, "Hake lete uta ne misale!" Yehoashi niyo avileta. 16 Elisha amgambaga seuta ywa Izilaeli aikile lumwe kulasa. Seuta niyo aika lumwe, Elisha naye niyo aika mikono mnanga mwe mikono ya seuta. 17 Seuta atimilaga malagizo ya mlotezi na kukomola dilisha kuhinga Asilia. Elisha niyo alava sigilizi, "Lasa!" Aaho seuta eze alase, mlotezi niyo agamba, "Weye ni weye Msale wa Zumbe Mnungu uwo noupate uhumi kwa Wasilia. Noutowane na Wasilia uko Afeki mpaka uwahume."

18 Naho Elisha amgambaga seuta aguhe misale mituhu na kuitoela hasi. Seuta atoelaga misale nk'hanana nt'hatu, niyo aleka. 19 Elisha aihiyagwa vitendese, amgambaga seuta, "Nii hutowale nk'hanana shano hegu mtandatu? Ivo nokuwabananga pele Wasilia. Mna haluse nouwahume nk'hanana nt'hatu du."

20 Elisha niyo abanika, na kumoselwa msanga.

Kila mwaka mafyo ya Wamoabu wezaga kuwatowa want'hu wa Izilaeli. 21 Mwo lupisi lumwenga wa kumoselwa msanga, want'hu waonaga fyo dimwenga diinule kimba na kukiduula mwe kikuta cha Elisha na kunyilika. Aho kimba icho kize kikwafe mavuha ya Elisha mnt'hu uyo auyukaga na kukimala.

22 Seuta Hazaeli ywa Asilia awasulumizaga want'hu wa Izilaeli mwo lupisi lwose lwa useuta wa Yehoahazi. 23 Mna Zumbe Mnungu awaonelaga mbazi, Awakaulisaga kwa wengele kwajili ye Ndagano yakwe na Ibulahimu na Isaka na Yakobo. Hawabanange hegu kuwaleka mpaka ivi diyelo.

24 Hazeli seuta ywa Asilia eze abanike, Ben Hadadi mwanawe alongozaga hant'hu ha ise. 25 Seuta Yehoashi amhumaga Ben Hadadi nk'hanana nt'hatu na kuikombola mizi yose itahigwe mwo useuta wa Yehoahazi, ise dya Yehoashi.