1 Mlotezi Elisha amwitangaga yumwenga ywa wana wa walotezi niyo amgamba, "Keike lumwe wiite Lamoti Gieadi. Guha supa ino ya mavuta, 2 naho unabula uko, mzungule Yehu mwana Yehoshafati na mwezukuluwe dya Nimshi. Ingileni kwe chumba cha kundani, 3 akajika guha supa ino ya mavuta umgidile mwo mtwi niyo wamgamba, Zumbe Mnungu agamba, ‘Hikuhaka mavuta kunda seuta ywa Izilaeli.’ Akjika komola ulwivi niyo wagulukisa."

4 Ivo Mlotezi uyo mbwanga niyo aita Lamoti Gileadi. 5 Eze abule, awabwiilaga watowani wakulu we mwe kitala niyo agamba, "Nna ulosi wako weye mkulu ywa watowani."

Yehu niyo amuuza, "Walonga na aani mwa suwe?"

Niyo amhitula, "Mkulu nalonga na weye mkulu ywa watowani." 6 Aho wengilaga mwe chumba cho kundani wose waidi. Uko kwe chumba mlotezi amgidilaga mavuta mwo mtwi na kumgamba, "Zumbe Mnungu, Mnungu ywa Izilaeli agamba, ‘Nakuhaka mavuta unde seuta mwa want'hu wangu Izilaeli. 7 Nawe nouikome imp'huga yo mkulu ywako Ahabu vileke nilihize kwa kuwakoma wandima wangu walotezi na wandima wose wa Zumbe Mnungu. 8 Kwaviya imp'huga yose ya Ahabu neikomwe. Neniwakome pele welekwa wose wa Ahabu , kila mgosi kiziwanda mwe mp'huga ya Ahabu, mwe Izilaeli ande mtumwa hegu mlekelwa. 9 Neniitende imp'huga ya Ahabu inde enga ni imp'huga ya Yeloboamu mwana Nebati naho inde enga ni imp'huga ya Baasha mwana Ahiya. 10 Yezebeli haamoswe msanga na mnt'hu, kimba chakwe nekidigwe ni makuli mwe isi ya Yezileli.’" Eze abinde kulonga ayo, mlotezi ahalawaga kwe chumba na kunyilika.

11 Yehu eze auye kwa wakulu weyawe, yumwenga ywawe niyo amuuza, "Togola haluse mweza kwa utondowazi? Kwaajili yani mkilalu uyu keza kwako?" Yehu niyo awahitula,

"Mmanya icho akuunga." 12 Nawo niyo wamgamba "Hiyo kindedi! Kigambile icho alongile! Niyo awagamba, Zumbe Mnungu kagamba, ‘Hikuika kunda seuta ywa Izilaeli.’" 13 Ivo kila yumwenga asunguzaga kuguha valo dyakwe niyo wayanjaza vileke inde mhindo akimale mnanga, watowaga magunda na kugutila, "Yehu niye seuta!"

14 Yehu mwana Yehoshafati uyo andaga mwezukuluwe dya Nimshi, aikaga mzungu wiihile wa kumkoma Yolamu. Yolamu na want'hu wose wa Izilaeli wandaga Lamoti Gileadi wakanda mo luzo lwa kuwamila mzi use kukump'hukilwa ni Hazaeli seuta ywa Asilia. 15 Mna seuta Yolamu andaga kauya Yezileeli vileke ahone nk'wenge apatile mwo kutowana nk'hondo na seuta Hazaeli ywa Asilia. Yehu niyo awagamba wakulu weyawe, "Uneva iki nicho mkuunga, mnt'hu yoyose asekuhalawa Lamoti kuita Yezileeli kwigala zimbuli izi." 16 Niyo Yehu akwela mwe digali dyakwe dikugendezwa ni falasi na kuita Yezileeli. Yolamu andaga akei kuhona naho Ahazia seuta ywa Yuda agendaga kumkaula.

17 Ivo mwamizi akimaalaga mnanga mwo mnala wa Yezileeli, adionaga idifyo dya want'hu wa Yehu umwo andaga akeza, niyo agamba, "Naona watowani wakwiza!" Yolamu niyo agamba,

"Sagula mgendeza falasi yumwenga ukawauze uneva weza kink'hondo hegu kwa utondowazi."

18 Ivo mwigala ulosi uyo eze aite ambwilanaga na Yehu nakumgamba, "Seuta auza, Nyuwe mwiza kink'hondo hegu kwa utondowazi? Yehu niyo ahitula, Nii wauza ivo? Weye hituka kiitanye! Yudya mwamizi ywo mnala niyo agamba, Yudya mwigala ulosi kaweziilani mna hakuuya." 19 Naho atumwagwa mwigala ulosi ywa kaidi, uyo amuuzaga Yehu mbuli iidya. Yehu amhitulaga enga nk'hongo, "Nii wauza ivo? Weye hituka unitimile!"

20 Yudya mnt'hu niyo agamba, "Mwigala ulosi kawezila mna haauye. Niho agendeela kulonga, Yudya akugendeza gali ni enga Yehu mwana Nimshi, kwaviya yehe adigendeza kwa nguzu."

21 Ivo Yolamu seuta ywa Izilaeli alagizaga niyo agamba, "Diike lumwe digali," Nawo wadiikaga lumwe digali dyakwe. Niho Yolamu seuta ywa Izilaeli na Ahazia seuta ywa Yuda wahalawa kila yumwenga akwelaga mwe digali dyakwe, niyo wagenda kubwilana na Yehu. Wambwilaga mwe kiwasa cha Naboti ywa Yezileeli. 22 Yolamu eze amuone Yehu amuuzaga, Togola Yehu kwiza kwa utondowazi? Yehu niyo ahitula,

"Utondowazi wani. Hant'hu mapamp'he na wasai wengi wa nyokwe Yezebeli wakei aaho?"

23 Yolamu niyo adihitula digali dyakwe na kuhalawa na kumgamba Ahazia, "Uyu kasaguka!" 24 Yehu aguhaga uta wakwe niyo amlasa Yolamu mwa maega yakwe. Msale niyo wombokanya kwo moyo wakwe naye niyo abanika ahadya he digali dyakwe. 25 Yehu amgambaga Bidikali mwambizi ywakwe, "Guha icho kimba chakwe kiduule mwe nk'honde iyo ya Naboti ywa Yezileeli. Hake kumbukila weye na miye umwo chandaga kikagendeza magali yetu na kumtimila Ahabu ise dya Yolamu umwo Zumbe Mnungu alongaga imbuli ino mwa yehe. 26 Zumbe Mnungu agambaga, Kwa sakame ya Naboti na kwa sakame ya wanawe iyo naiyone mazuwa yomboke, nakelisa kugamba nouilihize mwe nk'honde iyo. Kwaivo guha kimba cha Yolamu ukiduule mwe nk'honde ya Naboti enga ivo alongile Zumbe Mnungu."

27 Ahazia seuta wa Yuda eze aone ayo yalaile agulukaga kuhinga sila ya Beti Hagani. Yehu alagizaga want'hu wakwe akawagamba, "Mkomeni naye!" Nawo wamlumizisaga akanda mwe digali mwe sila ya kuhinga Guli hagihi na mzi wa Ibeleamu. Mna adahaga kugendeela na kunyilikila Megido niyo abanikila uko. 28 Wambizi wakwe wakiguhaga kimba chakwe mwe digali dyakwe na kukigala Yelusalemu, uko nuko amoselwagwa msanga mwe vikuta va kiseuta mwo mzi wa Daudi. 29 Mwo mwaka wa mlongo na umwenga Yolamu mwana Ahabu, Ahazia niho akongaga kwikaila mwe isi ya Yuda.

30 Yehu eze abule Yezileeli, naho Yezebeli eze eve mbuli zilaile, akehakaga langi mwa meso yakwe na kuziika vedi zifili zakwe, niyo aita mwe dilanga na kusungiila. 31 Yehu umwo andaga akengila mwe nk'hili Yezebeli niyo agamba, "Weye wikale enga Zimli weza kwa utondowazi, weye ukuwakoma mazumbe wako?"

32 Yehu akaulaga kulanga kwe dilanga niyo agamba, "Togola niani ehamwenga na miye niani?" Wakulu waidi hegu watatu wafosezaga mitwi yawe niyo wamsungiila. 33 Yehu naye niyo awagamba, "Mduleni uyo mvele hasi!" Woho nawo niyo wamduula hasi, sakame yakwe niyo yafant'huka imwenga mnanga ye nk'handula, imwenga nayo mwe falasi. Yehu niyo azombosa zifalasi ne digali dyakwe mnanga mwe kimba chakwe. 34 Akajika Yehu engilaga mwe nyumba ya kiseuta uko adyaga no kunywa. Niyo agamba, "Mmoseleni msanga mvele uyo aligitwe kwaviya ni mndele ywa kiseuta." 35 Umwo wakagenda kummosela msanga, hawaonaga chochose mna waonaga kibela cho mtwi wakwe, mavuha ye vifumba vakwe ne zinyayo zakwe du. 36 Naho wauyaga na kumgambila Yehu mbuli izi naye niyo agamba, "Ivi nivo Zumbe Mnungu alongaga kombokela kwa mndima ywakwe Eliya kulawa Tishibi akagamba, ‘Kuli nedidye kimba cha Yezebeli mwe isi ya Yezileeli. 37 Kimba chakwe Yezebeli neimwaganike enga mavi mwe nk'honde ya isi ya Yezileeli, vileke wasekudaha kugamba uyu ni Yezebeli.’"