Esperar no Senhor

31 Hianagi Ra Anumzamofonte’ma, amuha nehu’za zamentintima nehaza vahe’mo’za, kasefa hankave eneri’za tumpamo hiaza hu’za haresga hu’za vano nehu’za, zamagama resnazana zmasafekura nosu’za, kama vanazana zamavesra osugahie.

18 Ana hu’neanagi Ra Anumzamo’a arimpa fruzane asunku zana tamagrite eri ama hunaku tusiza huno avenesigeno tamavega anteno mani’ne. Na’ankure Ra Anumzana fatgo avu’avaza hu Anumza mani’ne. Hagi agrite’ma zamentintima nehaza vahemota muse hugahaze.

14 Ra Anumzamofonku avega antenka mani’nenka, oti hankavetinenka atregeno kagu’amo’a hankave enerisnigenka, Ra Anumzamo’ma kazama hanigu akohenka mani’nenka aveganto.

13 Tamagerfa hu’na namentintima huana, henka’a Ra Anumzamofo knare’zana, nagrama mani’nama vanua knafina kegahue. 14 Ra Anumzamofonku avega antenka mani’nenka, oti hankavetinenka atregeno kagu’amo’a hankave enerisnigenka, Ra Anumzamo’ma kazama hanigu akohenka mani’nenka aveganto.

Ra Anumzamofoma humuse hunte nunamu zagame Deviti asunte’nea zagamere

1 Ra Anumzamo’a nagri tavi mani’neno, nagu’vazi ne' mani’neankina, nagra na’anku korora hugahue? Ra Anumzamo’a nagrira hankave vihuni’a mani’neanki’na, na’anku nagra nahirahikura hugahue? 2 Hanki havi avu’ava zama nehaza vahe’mo’zama nazeri haviza hunaku erava’o nehanageno, ha' vahe’nimo’za nahenaku egahazanagi, ana vahe’mo’za traka hu’za masegahaze. 3 Rama’a sondia vahe kerafamo’za nahenaku kafo eme ante’za navazagi kagigahazanagi, nagra korora osugahue. Ha' vahenimo’za hara agafa hu’za eme hunantegahazanagi, Ra Anumzamofonku amuhara hugahue. 4 Ra Anumzamofona mago zanku antahigesue, Knare nagrira natresanigena kasefa’ma hu’nama manisnua kna’afina, Agri nompina manivava nehu’na, knare avu’ava’a nege’na, musena hunente’na Agri mono nompi mani’nena kama naverima hanigura kegahue. 5 Hanki hazenke zama esania knafina, Agra’a navre franekino, Agra’a seli mono nompi navre frakigahie. Ana nehuno navresga huno onagamu’a have agofetu nantesige’na knare hu’na manigahue. 6 Anama hanige’na nagri’ma nazeri kagi’naza ha' vaheni’a naza hanige’na hara huzmagetenerena, ranke hu’na musenkase nehu’na, Ra Anumzamofo mono nompina ofa kresramna vugahue. Ana nehu’na zavena ahe’na zagamera Ra Anumzamofontega hugahue. 7 Ra Anumzamoka naza huogu’ma kagritegama nunamuma nehanugenka, kasunku hunantenka nunamuni’a antahinamio. 8 Nagu’amo’a agritega nunamu hunka agriku hako huno hige’na, nagra Ra Anumzamokarega nunamuna nehue. 9 Ra Anumzamoka kamefira hunaminka kavugosa rukrahera nehunka, eri’za vahekamo’na krimpa aheonanto. Na’ankure kagra ko’ma nagu’vazinka e’nana Anumza mani’nananki, kamefira hunaminka onatrenka, nagu’vazinka nazahuo. 10 Nenfa’ene nenrera’enena zanamefira hunamigaha’anagi, Ra Anumzamo’a navareno kegava hunantegahie. 11 Ra Anumzamoka Kagra’a kavukvara rempi hunamio. Ha' vaheni’amo’za kafonte’za mani’nazanki, kegava hunantenka navrenka knare huno fatgo hu’nea kantera vuo. 12 Nagrira natrege’na ha' vahe’nimofo zamazampina va’nenkeno zamagri’ma zamavesi’niaza hu’za nazeri havizana osiho. Na’ankure ana vahe’mo’za nagrira havige hunante’za e’za nazeri koro nehaze. 13 Tamagerfa hu’na namentintima huana, henka’a Ra Anumzamofo knare’zana, nagrama mani’nama vanua knafina kegahue. 14 Ra Anumzamofonku avega antenka mani’nenka, oti hankavetinenka atregeno kagu’amo’a hankave enerisnigenka, Ra Anumzamo’ma kazama hanigu akohenka mani’nenka aveganto.

Anumzamo’ma azahanigu Deviti kre’nea zagamere

1 Hagi Ra Anumzamo’ma nzama hanigura akohe’na avega ante’na mani’nogeno, Agra rukrahe hunamino zavi krafageni’a antahi’ne. 2 Ana nehuno hapake kerifima antahintahi hakarema nehu’na mani’nogeno, navazu husga huno havere nantege’na, oti hankaveti’na oti’noe. 3 Ana huteno Anumzantimofo agima erisgama hu' zagamera kasefa zagame nami’ne. E’ina hu’neana vahe’mo’zama nege’za Ra Anumzamofoma koro’ma hunte’za Agrite’ma zamentintima hanagu anara hu’ne. 4 Hanki zamavufaga rama nehaza vahete’ene havi anumzante’ma zamentintima nehaza vahete’ma amema renti osuno, Ra Anumzamofonte’ma amentintima hanimo’a, agra muse hugahie. 5 Ra Anumzana nagri Anumzamoka vahe’mota osugaza rama’a hentofa zantamina hurante’nane. Tagri’ma hurante’nana zantmimofo antahintahima retro’ma huntenana antahintahia, rama’agino avompina krentegara osu’ne. Hanki mago vahe’mo’a kagri knara osu’ne. Kagrama hentofa zantmima hu’nana zantmima hampri’nama kesuana ana makara hampri vagaoregosue. 6 Hagi kresramnama nevuno ofama hu zankura musena nosane. Hanki menina nazeri ani hanke’na antahi ani' hue. Kagra tevefima kre fananehu ofane kumi ofagura nantahinonkane. 7 Hagi anante nagra amanage hu’noe, ko, Nagra ama oe. Anumzamofo avontafepina nagriku hu’za avona krente’naze. 8 Anumzanimoka kagri kavesi’ma avaririzanku muse nehue. Hagi kasegeka’amo’a tumonifi me’ne. 9 Nagra fatgo kavukava zanka’a eri fraraoki’na, ana maka vaheka’a zamasami’noe. Ra Anumzamoka Kagra kenka antahinka hu’nane, nagra vahekura korora hu’na nagira hamunki’na omani’noanki vahe’ma zmagu’ma vazi’nana zana huama hu’na vahe kevua zamasmi’noe. 10 Hagi fatgo kavukava’ma nehana zanka’a nagu’afina atrogenora frakino omne’ne. Hanki kema hu’nana kere’ma amage’ma antenka vahe’ma zamagu’ma nevazina hihamuka’amofo agenkea eriama hu’na zamasmi’noe. Hagi tusi’a vahekrerfa mani’nazafi eriama hu’na vagaore kavesi zamofone, kema hu’nana kere’ma otinenka ana zama hu kavukavara eriama hu’na zamasmi’noe. 11 Hanki Ra Anumzamoka, kasunkuma hunenantana zana azeorinka, vagaore kavesizane ke’ma hunana kere’ma amage’ma antenka ana zama hu kavukava zamo’a kegava hunantegahie. 12 Na’ankure ohampriga’a hazenkemo kaginante’ne. Hagi kuminimo’a agonagna huno marerineno kama vanuankana rehiza hunantenege’na, ke’zanku nehue. Ana nehu’na kuminimofo nampamo’a nasenifima me’nea zamo’a nazokamofo nampana azeri agateregeno hankaveni’a omne amne hie. 13 Hanki Ra Anumzamoka muse hugantoanki nagu’vazio! Ra Anumzamoka ame hunka enka nazahuo! 14 Hanki nagri’ma nahe frinaku’ma nehaza vahe’mo’za zamagazegu nehanageno antahintahizmimo’a savari hugahie. Hanki hazenkefima mani’noge’zama musema nehaza vahe’mo’za zamagazegu hugahaze.

20 Ra Anumzamofonku tagra avega anteta manineta amuhara nehunankino, Agrake’za hankotia mani’neankino, taza hugahie. 21 Agriku tagu’amo’a musena nehie, na’ankure tagra, Agri ruotge agifi tamentintia nehune. 22 Ra Anumzamoka kagripi amuha zantia me’neanki, vagaore kavesi’zanteti maka knafina kegava hunka refiteranto.

5 Ra Anumzamofonku avega ante’noe. Nagu’amo’a Agriku avega ante’neankina, agri nanekere amuhara nehue. 6 Kenage’ma kuma kvama nehaza vahe’mo’zama, ame huno nanterama rumsama hanigu avegama nentazama’a, agatereno nagu’amo’a tusiza huno Ra Anumzamofonkura avega nente. Tamage rumsama hanigu avegama nentazama’a agatereno nagu’amo’a tusiza huno Ra Anumzamofonkura avega nente.

5 Anumzamoka Kagrikuke nagra akohe’na kavega ante’na mani’noe. Nagra Kagripi amuha zani’a ante’noe.

34 Ra Anumzamofonte kamentintia nehunka, Agri avu’avaza’ma’a nevararigeno, rankagi negamino mopa kamigahie. Hagi negesankeno kefo avu’ava’ma nehaza vahe’mo’za haviza hugahaze.

5 Anumzamofona mika kagu’areti hunka antahi’neminka, nagrani’a antahintahiretira makazana hugahue hunka osuo. 6 Hanki mikazama hanampina antahiminka agihanta nevazigeno, vanana kana azeri ante fatgo hugantegahie.

3 E’i ana zankerompage tagrama knafima ufresuta muse hanune. Na’ankure tagra antahi’none, e’i ana knazampina knare hu’neankino taza hanigeta oti hanavetineta ana knazama enerita kazigazi huta vugahune. 4 Knazama erino kazigazi huno vu’zamo’a, tavutava fore higeno, ana zamo’a Anumzamo tavregahie amuhazana eriama nehie.

11 Agri’a masanentake hankavereti tamazeri hankavetinketa kazikazi huta nevuta, akoheta agazone huta musezampi manigahaze.

Knazama akoheno manineno erizamofo naneke

7 Hagi nafuhetma, tamarimpa antefru hutma mani’netma, Ramo’ma esigura avega anteho. Hoza vahe’mokizmi zamageho, zamarimpa antefru hu’za mani’ne’za, hozazamifima ese ko runtege, vagare ko runtenige’za hozazmifinti knare nezama hamarenaku avegama nentazankna hiho. 8 Tamagranena akohetma mani’netma oti hanavetiho, na’ankure Ramo’ma esania knamo’a kofta hu’ne.

11 Antahi’naze, knazampima ufre’za azeri agatere’naza vahera muse hiho hunezamantone. Jopu’ma knazampima kazigazi huno agatere’nea zamofo agenke’ane, henka’ama hunte’nea zamofona antahi’naze. Ramofompina asunku’zane, vahe’ma avesinteno asuraginte’zana avite’ne.

22 Tamagrama tamage kere’ma amagema antetma nevazazamo, tamazeri agru tamagu tamena higetma, neramafuma ovesinte avesinte tamagu’areti nehutma, tamaguareti hutma mago magomota ovesinte avesintea nehaze. 23 Na’ankure tamagra kasefa’ma hu’nazana, haviza nehia avimazanteti rompage, haviza osu avimzama Anumzamofo mevava kea asimu me’nea ke’areti kasefara hu’naze. (Jon 3:1-9) 24 E’ina hu’negu avontafepina anage hu’ne, Maka vahe’mo’za trazankna hu’nazankino, maka konariri zamimo’a trazamofo amosregna higeno, ana trazamo hagege higeno, amosre’amo evuramiankna hugahaze.

25 Hianagi Anumzamofo nanekemo’a mevava hugahianki’za, ama’i ana naneke huama hu’za tamasami’naze. (Ais 40:6-8.)

9 Ramo’a huvempama hu’nea kerera, mago’a vahe’mo’zama nentahizaza huno akoheno eri’zana e’norie. Hagi akoheno kavega anteno mani’neno, mago’a vahe’mo’za fanane osnaze huno mani’ne. Hianagi maka vahe’mo’za zamagu’a rukrehe hanazegu zamavega anteno mani’ne.

10ni’a vene’nene omase mofa’nemokizmi fronka naneke

1 E’i ana knafina mona kumamo’a 10ni’a venenene omase mofanemo’za lampe tavizami’a eriri eriri huza, a' erinaku hia ne' ome tutagiha hunaku vu’naza kna hu’ne. 2 Mago 5fu’a vene omase mofane’mokizmia knare antahintahia omanene. Hagi mago 5fu’a vene omase mofane’mokizmia knare antahintahi me’ne. 3 Hagi knare antahintahima omanenea mofane’mo’za rampe tavi zamia eri’nazanagi, mago’a masevena e’ori’naze. 4 Hu’neanagi knare antahintahima me’nea mofane’mo’za tafero zamifina mago’a masevena eririza rampe tavi zaminena vu’naze. 5 Hagi a’ma erinaku’ma hu’nea nera kora omegeno zamu toko hige’za mase’naze. 6 Hianagi kenage amu’nompi mago ne’mo kezatino, A’ma eri nera hago e’ne! Atiramita eme keho! Hige’za, 7 anante ana maka mofanemo’za oti’za tavizmi erira hu’naze. 8 Anante knare antahintahima omane’nemo’za, knare antahintahima me’nemokizmia zmantahige’za, mago’a masavena tamiho, na’ankure tavi timo’a asu nehie huza hazage’za, 9 knare antahintahima eri’namo’za kenona huzamante’za, i’o masave timo’a tamagri’ene tagri’enena knarera huorantegosianki, feno nontega vuta, tamagra su’zana ome miza seho hu’naze. 10 Ana masave mizasenaku nevazageno, a’ma eriku’ma hu’nea nera ege’za, tro’ma hu’za mani’naza mofa’nemo’za, aravehu ne’zama retro hunte’nea nompi agrane marerizageno kahana erigi’ne. 11 Henka ana knare antahizazmi omane 5fu’a mofa’nemo’za e’za Ramoke, Ramoke kahana anagiranto hu’naze. 12 Hianagi kenona huzamanteno, tamage hu’na neramasmue, nagra tamagena antahina osu’noe. 13 E’ina hu’negu kva huta maniho, na’ankure Vahe’mofo Mofavrema ete esiankna ontahi’naze.