Esperar no Senhor
Esperar no Senhor é ato de fé e confiança. A Bíblia promete que os que esperam em Deus renovam as forças, recebem direção e experimentam a fidelidade divina no tempo certo.
Renovar as forças
Os que esperam no Senhor renovam as forças. Sobem como águias, correm e não se cansam, caminham e não se fatigam.
पर ज़ुंण बिधाते आसरै रहा, अर ज़ुंण तेऊ का मज़त मांगा,
तिन्नां भेटणअ ताज़अ ज़ोर।
तिन्नां लागणै मुक्षरलै ज़िहै नऊंऐं फैंख,
तिन्नां बाहणीं ठुहर पर तिन्नों शाह निं फुलणअ,
तिंयां निं हांढी-हांढी बी दुबल़ै हणैं।"
तैबी रहा बिधाता न्हैल़अ लागी कि तम्हां लै तेऊओ जश होए। सह च़ाहा तम्हां लै झींण करनी, सह करा भलअ ई। सह हआ तिन्नां लै खुश ज़ुंण बिधाता दी भरोस्सअ डाहा।
सबर डाही रहणअ बिधाता न्हैल़ै-भाल़ै लागी।
हैअ विश्वास डाहणअ पाक्कअ,
हाँ, सबर डाही रहणअ बिधाता न्हैल़ै-भाल़ै लागी।
पर हे बिधाता, मुंह आसा भरोस्सअ मुंह भाल़णीं तेरी भलाई
ज़िऊंदी ज़िता एऊ ई संसारै।
सबर डाही रहणअ बिधाता न्हैल़ै-भाल़ै लागी।
हैअ विश्वास डाहणअ पाक्कअ,
हाँ, सबर डाही रहणअ बिधाता न्हैल़ै-भाल़ै लागी।
बिधाता आसा मेरअ प्रैश्शअ ज़ुंण मुंह बच़ाऊआ।
हुंह निं कोही का डरदअ।
बिधाता करा मेरी फाज़त आप्पै अर
हुंह निं कधि फिकर करदअ।
कदुष्ट मणछ अर मेरै दुशमण
च़ाऐ मुंह मारदै किल्है निं एछे,
पर तिन्नां लागणीं ठोहल़
संघा बधल़णैं तिंयां धरनीं।
च़ाऐ सारी सैना मुंह फेरा-फेर गोटे,
हुंह निं तैबी बी डरदअ,
तिंयां च़ाऐ मुंह संघै जुध बी छ़ेल़े,
तज़ी बी आसा मेरअ भरोस्सअ बिधाता दी अटल़।
मंऐं मांगअ बिधाता का एक्कै बरदान,
हुंह च़ाहा सिधअ इहअ कि
मुंह रहणअ सारी ज़िन्दगी बिधाते घअरै,
ताकि हुंह तिधी कबल्ली बिधाते महान भलाई भाल़ूं
अर बिधाता का हर बगत सलाह मांगूं।
ज़ेभै मुंह आफ़त पल़े, तेभै हणअ सह मेरअ आसरअ,
तेऊ डाहणअ हुंह आपणैं घअरै राज्ज़ी-राम्बल़अ अर
तेऊ डाहणअ हुंह बडी टोल्हा प्रैंदै बच़ाऊई।
तेऊ दैणीं मुल्है मेरै सोभी दुशमणा का ज़ीत।
तेखअ मनाऊंणी मुंह बल़ीदान अर ज़ै-ज़ैकार करी तेऊए भबनै खुशी।
मुंह बोल़णीं बिधाते ज़ै-ज़ैकार करना लै गिहा।
हे बिधाता, ज़ेभै हुंह अरज़ करूं तेभै शूणैं!
मुल्है दैऐ ज़बाब अर मुल्है करै झींण।
तंऐं आसा आप्पै इहअ बोलअ द, "तम्हैं लोल़ी मेरै दर्शण करदै आऐ।"
मंऐं बोलअ इहअ, "हे बिधाता, मुंह करनै तेरै दर्शण।"
हे बिधाता, ऐबै निं मुंह बाखा पिठ फरेऊई!
मुल्है निं रोश्श करी, अर
मुंह निं आप्पू का दूर करी।
मेरी मज़त करनै आल़अ आसा सिधअ तूह ई,
मुंह निं शोटी डाही नां कल्ही छ़ाडी आथी, हे बिधाता,
मेरै निं ताह छ़ाडी कोहै आथी ज़ुंण मुंह बच़ाऊई सका।
मेरै ईजै बाबै बी डाहअ हुंह शोटी,
पर ताह बिधाता करनी मेरी हेर-सभाल़।
हे बिधाता, तूह खोज़ मुखा, हुंह करूं तिहअ ई ज़िहअ तूह च़ाहा,
मुंह नढैऊ राम्बल़ी बाता
ज़ेथ हुंह मेरै दुशमणा का बच़ी राज्ज़ी-राम्बल़अ रहूं।
ज़िहअ मेरै दुशमण मुल्है करनअ च़ाहा, तिन्नां निं तिहअ करनै दैई,
लोग दैआ मेरै बारै झ़ुठी शाजत अर तिंयां दैआ मुल्है डरैऊंणै आल़ी धमकी।
पर हे बिधाता, मुंह आसा भरोस्सअ मुंह भाल़णीं तेरी भलाई
ज़िऊंदी ज़िता एऊ ई संसारै।
सबर डाही रहणअ बिधाता न्हैल़ै-भाल़ै लागी।
हैअ विश्वास डाहणअ पाक्कअ,
हाँ, सबर डाही रहणअ बिधाता न्हैल़ै-भाल़ै लागी।
Espera paciente
Esperei com paciência no Senhor e Ele se inclinou para mim. Confie nele e descanse — Ele agirá no tempo certo.
हुंह डाहा सबर, संघा रहा ताह बिधाता न्हैल़अ लागी,
तूह हेरा मेरी लेर-पकार शूणीं।
तंऐं काढअ हुंह डुघी खाल़्ही अर
बरैबाद करनै आल़ी च़िक्करै जैंदरा का उझै,
तंऐं किअ हुंह सरली ज़ैगा खल़अ
संघा डाहअ हुंह राज्ज़ी-राम्बल़अ।
तंऐं दैनी मुल्है एक नऊंईं गिह,
ज़ेता बोली हुंह तेरी ज़ै-ज़ैकार करी सके।
एता भाल़ी करनअ खास्सै मणछा तेरअ अदर,
संघा डाहणअ तिन्नां बी ताह बिधाता दी आपणअ भरोस्सअ।
तूह दैआ तिन्नां लै बर्गत, ज़ुंण ताह दी भरोस्सअ डाहा,
ज़ुंण मुहुर्ती निं पूज़दै अर
ज़ुंण घमंड निं करदै।
हे बिधाता, तंऐं किऐ हाम्हां लै बतेर्है नुआहरै काम,
ताह ज़िहअ निं होर कोहै आथी!
ज़ुंण गल्ला तंऐं हाम्हां लै सोठी, तेता थकणैं गणी-गणी!
ज़ेतरी बी गल्ला तंऐं हाम्हां लै किई,
तेता निं हुंह खोज़ी-खोज़ी मुक्कदअ।
तूह निं बल़ीदान अर भैंट च़ाहंदअ,
तूह निं हाम्हां लै बोल्दअ कि बेदी दी करा पशूए हूम बल़ी।
नां तंऐं पाप माफी लै पाप बल़ी मांगी।
पर तूह च़ाहा इहअ कि हाम्हैं तेरी शुणें अर तिहअ ई करे।
तेता लै दैनअ मंऐं इहअ ज़बाब, "हे परमेशर,
हुंह आसा इधी भाल़, किल्हैकि
तेरी बधाने जंतरी दी आसा मेरै बारै लिखअ द।
मेरी खुशी आसा सह ई कि मुंह करनअ तिहअ ई ज़िहअ तूह च़ाहा,
मंऐं आसा तेरअ बधान आपणैं दिलै डाहअ द।"
हे बिधाता, ज़ेभै तेरै लोगो झाल़अ हुअ,
तेभै खोज़अ मंऐं खुशीओ समाद कि तंऐं बच़ाऊऐ हाम्हैं।
ताखा आसा आप्पै थोघ कि मेरै निं एता खोज़णैं बाझ़ी रहूंदअ।
तेरी उद्धार करने खबर निं मंऐं च़ोरी डाही,
हुंह रहअ कबल्लअ तेरै सत्त अर उद्धारे बारै खोज़दअ लागी।
ज़ेभै तेरै लोगो बडअ झाल़अ हुअ, तेभै बी निं हुंह च़ुप्पी रहअ,
हुंह रहअ खोज़दअ लागी कि तूह किहअ शुचअ-पाक्कअ आसा अर तंऐं किई म्हारी मज़त।
हे बिधाता, तूह निं मुल्है झींण करनी छ़ाडी,
तेरी अटल़ झ़ूरी अर सत्ता करै लोल़ी हुंह राज्ज़ी-राम्बल़अ रहअ।
मुल्है आसा फेरा-फेर आफ़त पल़ी दी,
तिंयां केतरी लाई गणी!
मेरै पापै गोटअ हुंह च़ऊ बाखा,
ऐबै निस्सी मुखा किछ़ै बात शुझुई,
तिंयां आसा मेरै मुंडे शराल़ा का बी खास्सै अर
ऐबै गअ मेरअ हैअ चुटी।
हे बिधाता, मुंह बच़ाऊ! तूह कर ऐबै मेरी मज़त।
ज़ुंण मुंह मारने ताका आसा,
तिंयां लोल़ी तै हारै अर आप्पू मांझ़ै झाखुऐ।
ज़ुंण मुल्है आफ़त पल़णां लै खुश हआ,
तिंयां लोल़ी तै पिछ़ू हटै अर शर्मिंदै हुऐ।
हे बिधाता, हाम्हैं आसा तेरै आसरै,
तूह कर म्हारी मज़त, हाम्हां डाह बच़ाऊई।
ताह बिधाता करै हआ म्हारै दिलै खुशी,
किल्हैकि हाम्हैं करा ताह पबित्र परमेशरा दी भरोस्सअ।
हे बिधाता, हाम्हां लै दै आपणीं बर्गत,
हाम्हां लै कर झींण, ज़ेही हाम्हैं ताखा आशा डाहा।
हुंह रहअ ताह न्हैल़अ भाल़अ लागी कि ताह हेरनी मेरी मज़त करी,
अर हुंह रहा तेते आसरै ज़ुंण तंऐं ज़बान आसा दैनी दी।
ज़िहै पहरी न्हैल़ै-भाल़ै रहा लागी कि राच केभै च़ाल्ली भैई,
तिहअ रहा हुंह बी ताह मालका न्हैल़अ लागी,
हुंह रहा तिन्नां पहरी का बी खास्सअ ताह मेरै मालक बिधाता न्हैल़अ चतैन।
हुंह रहा परमेशरे आसरै अर
हुंह डाहा तेऊ ई दी आशा।
तम्हैं डाहणीं बिधाता दी आशा,
संघा रहणअ तैहा बाता हांढदै लागी ज़ुंण तेऊ खोज़ी,
तेऊ बणाणैं तम्हैं धरतीए मालक अर
तम्हां का जाणअ आपणीं आछी शुझुई कि कदुष्ट हुऐ बरैबाद।
Confiança e perseverança
Confie no Senhor de todo o coração. Sede pacientes na tribulação — o Senhor é fiel e cumprirá todas as suas promessas.
तम्हैं डाहै दिला का बिधाता दी भरोस्सअ,
आपणीं समझ़े भरोस्सै निं रही।
हर गल्ला लै लणअ बिधाता पुछ़ी,
तै हेरनी तेऊ तम्हां का आज़री बात खोज़ी।
सिधअ इहअ ई निं, हाम्हां लागा बूरै बगता दी बी परमेशरे प्रतप्पो इहअ सोठी करै घमंड करनअ कि बूरै बगता संघै सबर, अर सबर करी बूरै बगता दी खरै निखल़णैं करै हआ आशा पैईदा,
हुंह करा एही प्राथणां परमेशर तम्हां आपणीं महान शगती करै होर बी खास्सै जोधै बणांए, ताकि तम्हैं हर दुख तकलिफी सबर करी खुशी-खुशी ज़िरी सके।
भाईओ, प्रभू एछणैं तैणीं करा सबर, हेरा, कृषाण बी करा पृथूईए किम्मती फल़े आशा डाही करै पैहली अर खिरी हणैं आल़ी बरसाती तैणीं सबर।
इहअ ई करा तम्हैं बी सबर, अर आपणैं दिला करा मज़बूत, किल्हैकि प्रभू एछणें शुभ धैल़ी आसा नेल़।
हाम्हां का थोघ निं आसा कि परमेशर करा सबर करनै आल़ै मणछो अदर, तम्हैं आयूबे सबर करने बारै ता आसा शूणअ द, अर प्रभू बाखा ज़ुंण तेतो फल तेऊ भेटअ, तेतो बी आसा तम्हां का थोघ, ज़िहअ करै प्रभूए खास्सी झींण प्रगट हआ।
ज़ांऊं तम्हैं परमेशरो सत्त मनअ, तम्हैं हेरै शुचै बणाईं। ऐबै लागा तम्हां आपणैं संघी विश्वासी संघै कबल्ली दिला-मन्नां का झ़ूरी करनी।
तम्हां लागा एकी-दुजै संघै झ़ूरी करनी ई करनी, किल्हैकि तम्हां आसा परमेशरा का नऊंईं ज़िन्दगी भेटी दी। तम्हां निं अह ज़िन्दगी किज़ू एही च़िज़ा करै आथी भेटी ज़ुंण बरैबाद हणीं, पर अह आसा तेता करै भेटी दी ज़ुंण सदा लै हणीं। हाम्हां आसा नऊंईं ज़िन्दगी परमेशरे ज़िऊंदै अर सदा रहणैं आल़ै बैणा करै भेटी दी। ज़िहअ परमेशर पबित्र शास्त्रा दी बोला,
"मणछ आसा घाहा ज़िहअ
अर एते सारी शोभा आसा घाहे फूला ज़ेही,
घाहा शुक्का अर फूल बी अल़ा धरनीं।
पर प्रभूओ बैण रहणअ जुगै-जुगै इहअ ई बणी।"
अह आसा खुशीए समादो बैण ज़ुंण तम्हां का आसा खोज़अ द।
कई लोग सोठा इहअ कि प्रभू आसा आपणीं फिरी एछणें करारा पूरी करना लै बल़ैग पांदअ लागअ द। पर प्रभू निं एऊ साबै बल़ैग करदअ आथी लागअ द। तेऊ आसा तम्हां लै सबर डाहअ द। किल्हैकि सह निं कोही बरैबाद करनअ च़ाहंदअ। पर सह च़ाहा इहअ कि हरेक मणछ आपणैं पापो प्राश्त करे अर परमेशरा सेटा फिरी एछे।
तेखअ बोलअ ईशू आपणैं च़ेल्लै लै, "ज़ेभै हुंह मणछो पूत फिरी एछणअ, तेभै हणअ स्वर्गो राज़ तिन्नां दस कुंआरी शोहरी ज़िहअ ज़ुंण आपणैं मसाल्लै ज़ाल़ी बैहा लै लाल़ीए साथणीं बणी लाल़ै सेटा मिलदी डेऊई। तिन्नां मांझ़ै ती पांज़ ऐडी पर पांज़ ती समझ़कार। तिन्नैं ऐडी शोहरी आप्पू संघै मसाल्लै ता निंयैं ज़ाल़ी पर आप्पू संघै होर जैतूनो तेल निं निंयं। पर ज़ुंण शोहरी समझ़कार आसा ती, तिन्नैं निंईं आप्पू संघै जैतूने तेले शिंगी बी भरी। ज़ांऊं लाल़ै एछणा लै खास्सी बल़ैग पल़ी, तिन्नां लागी उंघी अर खिरी सुत्ती तिंयां।
"आधा राची शूणीं गाज़ै-बाज़ेए छ़ेल़ अर इहअ बोल्दै, ‘हेरा लाल़अ आअ अर सोभ साथणीं च़ाल्ला लाल़ी संघै लाल़ै का मिलदी।’ तेखअ लागी तिंयां दस कुंआरी आपणैं-आपणैं मसाल्लै सोहरदी। तिन्नैं ऐडी बोलअ तिन्नां समझ़कार साथणीं का इहअ, ‘आपणैं जैतूने तेला का दैआ धख-धख हाम्हां लै बी, किल्हैकि म्हारै मसाल्लै च़ाल्लै हिठी।’ तिन्नैं समझ़कार शोहरी दैनअ तिन्नां लै ज़बाब, ‘इहअ निं हआ कि अह तेल नां हाम्हां लै पूरअ होए अर नां तम्हां लै, एता का आसा भलअ इहअ कि तम्हैं आणा हाट्टी का आप्पू लै होर तेल मोलै लई।’
"ज़ांऊं तिंयां हाट्टी लै तेला मोल लंदी डेऊई, तेतरी गअ लाल़अ एछी अर ज़ुंण तेऊ मोक्कै तिथी तैर थिई, तिंयां डेऊई लाल़ी पिछ़ू बैहे पांडा लै। तेतरी हेरअ दुआर हूल़ी। पिछ़ू लागी दुआरा बागै खल़्हुई तिंयां बाकी कुंआरी शोहरी बी बोल्दी, ‘हे मालक, हे मालक, हाम्हां लै बी खोल्ह पोर्ही दुआर।’
"लाल़ै दैनअ तिन्नां लै ज़बाब, ‘हुंह खोज़ा तम्हां का सत्त, हुंह निं तम्हां बछ़ैणदअ कि तम्हैं कुंण आसा?’
"बिऊंतै रहा किल्हैकि तम्हां का निं ऐहा गल्लो थोघ आथी कि सह साईत केभै हणीं ज़ेभै हुंह फिरी एछणअ।