ज़ैहसू 18

बाकी बच़ै दै देशे बांड

1 ज़ांऊं इज़राईली सारअ कनान देश ज़िती हेरअ, तेखअ हुई सारी इज़राईली टोली शिलोह ज़ैगा कठा संघा किअ तिधी बिधातो मेल़-ज़ोल़ो खिम्भ खल़अ। 2 अज़ी तै इज़राईले साता गोत्रे लोग बच़ै दै ज़हा लै कनान देशै हेस्सअ नांईं भेटअ त। 3 तेखअ बोलअ ज़ैहसू इज़राईली लै, "एऊ सारै देशा गिम्मणा लै केभै तैणीं रहणअ तम्हां बल़ैघदै लागी? अह देश दैनअ तम्हां लै तेऊ बिधाता ज़हा थारै दाद-बाब मना तै। 4 ऐबै करा इहअ, तम्हैं छ़ांटा आप्पू जैंदरा का हर गोत्रा मांझ़ै चअन-चअन मणछ। तिंयां छ़ाडणैं मुंह भाल़ै कि सारै देशै हांढी ज़ैगा नापी एछे अर आपणैं-आपणैं गोत्रे ज़रुरतीए साबै तिंयां ज़ैगा भाल़ी बापस फिरी तेतो हाल मुखा खोज़े। 5 तेखअ करनै एऊ बाकी बच़ै दै देशे सात हेस्सै। यहूदा गोत्र आपणैं दखण अर युसुफे लुआद रहणैं उतरा बाखा मुल्खै आपणीं ज़ैगा ज़ुंण तिन्‍नें हेस्सै एछी आसा गऐ दै।

6 "इना साता हेस्सैओ पूरअ हाल आणा बाढै लिखी मुंह सेटा लै। तेखअ पाणीं मुंह परमेशर बिधाता सेटा परच़ी कि बिधाता तम्हां मांझ़ै कहा लै कुंण हेस्सअ दैणअ। 7 लेबी गोत्र निं तम्हां साता संघै बी ज़िम्मींए हेस्सैदार हणैं किल्हैकि बिधाता तिन्‍नां लै ज़ुंण प्रोहते पदबी आसा दैनी दी, तिन्‍नों हेस्सअ आसा सह ई। गाद, रूबेन, मनिश्शे आधै गोत्रा लै आसा जरदण पार बाखा बिधाते दास मोसा ज़ैगा दैई हेरी दी।"

8 तिंयां डेऊऐ सारै देशा भाल़ै अर नापी-ठाप्पी तेते सारी गल्‍ला लिखदै अर ज़ैहसू डाहअ तिन्‍नां लै इहअ बोली, "तम्हैं एछा एऊ सारै देशे ज़ैगा भाल़ी अर नापी-ठाप्पी करै मुंह सेटा लै फिरी। तेखअ पाणीं मुंह तम्हां लै इधी शिलोह नगरी बिधाता सेटा परच़ी कि कुंण ज़ैगा कसरै हेस्सै दैणीं।"

9 तिंयां मणछ आऐ तेऊ सारै देशै हांढी, संघा डाही तिन्‍नैं सारी गल्‍ला बही दी लिखी कि सात हेस्सै किहै-किहै हणैं, नगरी बी डाही तिन्‍नैं बाढै गणी करै लिखी। खिरी पुजै तिंयां सारअ काम करी शिलोह ज़ैहसू सेटा बापस फिरी। 10 शिलोह पुछ़अ ज़ैहसू परच़ी पाई बिधाता, संघा दैनी इज़राईले बाकी बच़ै दै साता गोत्रा लै सह ज़ैगा बांडी।

बिन्यामीन गोत्रे हेस्सै ज़ैगा

11 सोभी का आजी निखल़ी बिन्यामीन गोत्रे परच़ी। तिन्‍नां लै दैनअ तिन्‍नें टोलीए साबै हेस्सअ अर तिन्‍नें ज़ैगा पल़ी यहूदा अर युसुफ गोत्रे मुल्खै मांझ़ै। 12 उतरा बाखा हुई तिन्‍नें सिअं जरदण नदी का शुरू अर सह डेऊई जेरिहो नगरी उतरा बाखे ढल़ाना बाती अर पछ़मा बाखा डेऊई तिन्‍नें सिअं धारा बाखे देशा बाती बेताबेन रेगीस्तानै तैणीं।

13 तिधा का डेऊई तिन्‍नें सिअं दखणा बाखा लूज नगरी तैणीं ज़ेता लै बेतेल बी बोला। तिधा आजू होथी तिन्‍नें सिअं बेथ-हारोन दखणा बाखा धारा बाती अत्रोदार नगरी तैणीं। 14 तिधा का फिरी तिन्‍नें सिअं बेथ-हारोन सम्हनै दुजी बाखा अर तेखअ फिरी तैहा धारे दखणा बाखा किर्यातबाल नगरी सेटा ज़ेता लै किर्यात-ज़रीम बी बोला, ज़ुंण यहूदी गोत्रे हेस्सै थिई आई दी। अह ती बिन्यामीन गोत्रे पछ़मा बाखे सिअं।

15 तिन्‍नें दखणा बाखे सिअं हुई किर्यातबाल नगरीए पुंझ़ा का शुरू ज़ेता लै किर्यात-ज़रीम बी बोला अर नपतूहे कुहै सेटा। 16 तिधा का डेऊई तिन्‍नें सिअं धारे गोधा बाती बेन-हिनोम खागा बाती आजू उतरा बाखा रपाई नाओंए खागा तैणीं। तिधा का फिरी भिई दखणा बाखा हिनोम खागा बाती अर तिधा का होथी जबेशे नगरी दखणा बाखा अनरोगल़ तैणीं। 17 तिधा का फिरी उतरा बाखा अनेशमेश अर तेखअ डेऊई गलीलोत बाखा ज़ुंण अदुमीम कुआल़ी आर बाखा आसा अर तिधा का होथी रूबेने शोहरू बोहन नाओंए पात्थरा तैणीं। 18 तिधा आजू डेऊई बेथ अराबे उतरा बाखे ढल़ाना बाती अराबा खागा तैणीं। 19 तिधा आजू डेऊई तिन्‍नें सिअं बेथ ओगल़ी उतरा बाखे पुंझ़ा बाती खारै समुंदरे उतरा बाखा पुंझ़ै तैणीं जरदण नदीए मडोखरै तैणीं। अह ती बिन्यामीन गोत्रे दखणा बाखे सिअं।

20 तिन्‍नें पुर्बा बाखे सिअं ती जरदण नदी। अह त बिन्यामीन गोत्रो तिन्‍नें सोभी टोली लै पठी हेस्सअ अर तिन्‍नें सिअं ज़ेते मालक तिंयां हुऐ।

21 ज़ुंण नगरी बिन्यामीन गोत्रे हेस्सै तिन्‍नें खिंब अर टोलीए साबै आई तिंयां ती जेरिहो, बेथ ओगल़ी, एमेकसीस, 22 बेथ-अराबा, ज़मरीम, बेतेल, 23 अबीम, पारा, ओफरा, 24 कपरमोनी, ओफनी अर गिबा। ईंयां ती बारा नगरी अर इना नगरी संघै गराअं भेटै तिन्‍नां लाऊआ। 25 होर ती गबोन नगरी, रामाह, बरोत 26 मिज़पे, कपीरा, मोसा, 27 रकेम, जिप्रेल, तराल़ा, 28 सेला, अलेप, जबेश ज़ेता लै एरुशलेम बी बोला, गिबा अर किर्यात नगरी। ईंयां ती च़ौदा नगरी अर इना सोभी नगरी संघै गराअं तै तेता का लाऊआ। अह एतरअ आअ बिन्यामीन गोत्रे हेस्सै तिन्‍नें खिंब अर टोलीए साबै।