इज़राईली किअ एई नगरी कबज़अ
1 बिधाता बोलअ ज़ैहसू लै, "आपणीं सारी सैना निंईं डेऊ एई नगरी लै। आपणअ हैअ निं चोल़ी नां डरी आथी। मुंह हेरनै तम्हैं एई नगरीए राज़ै अर तेऊए लोगा का ज़ताऊई अर सह ज़ैगा हणीं थारी। 2 ज़िहअ तम्हैं जेरिहो नगरी अर तिन्नें राज़ै लै किअ, तिहअ ई करै तम्हैं एई नगरी अर तिन्नें राज़ै लै। पर एभकी बारी सका तम्हैं तैहा नगरीए समान अर डागै-धअण आप्पू लै डाही। तम्हैं रहा नगरी पिछ़ू बाखा तिन्नां गोटणा लै ताखुई।"
3 ज़ैहसू तैर्हुअ एई नगरी संघै जुधा करना लै। तेऊ छ़ांटै आपणैं तिह हज़ार शूरबीर संघा छ़ाडै तिंयां तैहा ई राची इहअ हुकम करी, 4 "तम्हां मांझ़ै रहै एक छ़ुंढ नगरी पिछ़ू जुधा लै ताखुई पर खास्सै दूर निं तम्हैं रही अर सोभै ज़ण्हैं रहै नच़ानक घेरअ बाहणां लै तैर। 5 हुंह अर बाकी सैना एछणैं नगरीए प्रऊल़ी बाखा जुधा लै, ज़ांऊं एई नगरीए लोग हाम्हां संघै जुधा लै एछे, हाम्हां ठुहर्नअ तिन्नां सेटा का बापस ताकि तिंयां म्हारअ पिछ़अ करे। 6 तिन्नैं लोल़ी इहअ ज़ाणअ कि हाम्हैं ठुर्है तिन्नां डरै तिहै ई ज़िहै पिछ़ली बारी ठुर्है तै। इहअ करै पजैल़णैं हाम्हां तिंयां ठुर्ही नगरी का खास्सै दूर, 7 तम्हैं हणैं पिछ़ू लुक्की करै ताखुई रहै दै अर तेऊ ई मोक्कै करै तम्हैं घेरअ बाही सारी नगरी दी कबज़अ अर थारै परमेशर बिधाता हेरनी सह नगरी थारै बशै करी। 8 नगरी लै नभैऊशै घेरअ बाही चैल़ै सारी नगरी दी आग ज़िहअ बिधाता बोलअ द थिअ कि अह आसा मेरअ तम्हां लै हुकम।" 9 ज़िहअ ज़ैहसू हुकम किअ तिंयां तिह हज़ार सपाही रहै एई नगरी पछ़मा बाखा एई अर बेतेल मांझ़ै लुक्की जुधा लै ताखुई। पर ज़ैहसू काटी राच बाकी सैना संघै आपणैं डेरै ई।
10 दुजै धैल़ै दोत्ती उझ़ुअ ज़ैहसू दोत्ती-दोत्थी संघा तैरी बाकी सैना एई नगरी डेऊणा लै। ज़ैहसू अर होरी इज़राईली सैणैं निंईं बाकी सैना एई नगरी बाखा लै। 11 एई नगरी नेल़ पुजी पाऐ तिन्नैं उतर दिशा बाखा नगरी सम्हनै आपणैं डेरै। नगरी अर इज़राईली सैना मांझ़ै त उंधै सरलअ खाग। 12 ज़ैहसू तै पांज़ हज़ार शूरबीर एई नगरी पिछ़ू पछ़मा बाखा बेतेल नगरीए सिधा दी एकी ज़ैगा ताका दी डाहै दै बशैल़ी। 13 ऐबै ती ज़ैहसूए सारी सैना तैर। एकी बाखा पाअ एई नगरीए उतर दिशा बाखा ज़ैहसू आपणीं सैना पाई डेरअ अर तेता का लाऊआ ती तेऊ नगरीए पछ़मा बाखा सैना डाही दी। तेखअ काटी तैहा धैल़ी ज़ैहसू तेऊ ई खागै दी राच। 14 ज़ांऊं एई नगरीए राज़ै ज़ैहसूए सैना भाल़ी, सह गअ दुजै धैल़ै दोत्ती आपणीं सारी सैना पाई अराबा जरदण नदी नेल़ खागै इज़राईली संघै जुधा लै एछी। तेऊ निं इहअ ज़ाणअ कि इज़राईली आसा तिंयां पिछ़ू बाखा घेरअ बाही गोटी लाऐ दै। 15 ज़ैहसू अर तेऊ संघै सोभी इज़राईली किअ इहअ दखाअ कि तिंयां ठुर्है तिन्नां डरै रेगीस्ताना बाखा लै बापस। 16 एई नगरीए सैना शादै एकी-दुजै लै हाक्का लाई-लाई नगरी का सोभै मर्ध संघा ठुर्है ज़ैहसू अर इज़राईली दरल़ाऊंदै पिछ़ू अर इहअ करै निखल़ै तिंयां नगरी का खास्सै दूर। 17 इहअ करै ठुर्है एई नगरीए8:17 एई नगरीए आई अर बेतेल सोभ मर्ध इज़राईली पिछ़ू अर पिछ़ू छ़ुटी तिन्नां का नगरीए प्रऊल़ी बी घुआल़ी।
18 तेखअ बोलअ बिधाता ज़ैहसू लै, "आपणअ बर्छ़अ हार एई नगरी बाखा लै, अह नगरी लाई मंऐं तेरै बशै करी।" ज़ैहसू हारअ आपणअ बर्छ़अ एई नगरी बाखा।8:18 लुआ. 17:9 19 ज़ांऊं ज़ैहसू एई नगरी बाखा बर्छ़अ हारअ, ज़ुंण इज़राईली नगरी पिछ़ू ताखुई तै रहै दै, तिंयां डेऊऐ झ़ट-पटै नगरी लै ठुर्ही संघा किअ तेथ कबज़अ अर तेखअ चैल़ी तिन्नैं हेरा-हेरी सारी नगरी आग। 20 ज़ांऊं इज़राईली दरल़ाऊंदै डेऊऐ दै एई नगरीए तिन्नैं मर्धै पिछ़ू बाखा नदर दैनी, तिन्नां का शुझुई कि सारी नगरी आसा आग शाची दी अर उझै आसा सरगा बाखा लै धूँओ बादल़ उझ़ुअ द! तिन्नां नां आजू ठुहर्ने हिम्मत रही अर नां पिछ़ू ठुर्हनै हिम्मत रही! किल्हैकि ज़ुंण इज़राईली रेगीस्ताना बाखा तै ठुर्हदै लागै दै, तिंयां फिरै तिन्नां लै पिछ़ू, 21 ज़ांऊं ज़ैहसू अर तिन्नैं होरी इज़राईली भाल़अ कि ज़ुंण इज़राईली पछ़मा बाखा लुक्की तै रहै दै तिन्नैं हेरी सारी नगरी आग चैल़ी गिम्मी अर सरगा बाखा लै आसा धूँ लागअ द, अर तिंयां फिरै पिछ़ू संघा पल़ै एई नगरीए मर्धा मारदै चुटी। 22 ज़ुंणी इज़राईली नगरी आग चैल़ी तिंयां बी आऐ नगरी बागै जुधा लै अर एई नगरीए लोग पल़ै आजू-पिछ़ू दोहरी बाखा इज़राईली मांझ़ा-मांझ़ी अर तिंयां पाऐ सोभ मारी। तिन्नां मांझ़ै नां कुंण ठुर्ही सकअ अर नां बच़ी सकअ। 23 एई नगरीओ राज़अ निंयं तिन्नैं ज़ैहसू सेटा लै ज़िऊंदअ ढाकी।
24 इज़राईली पाऐ एई नगरीए सोभ मर्ध तिधी उज़र रेगीस्ताने ज़ैगा मारी ज़िधी तैणीं तिंयां तिन्नां दरल़ाऊंदै पिछ़ू ठुर्है तै। तेखअ डेऊऐ तिंयां एई नगरी लै अर ज़ुंण तिधी बच़ै दै थिऐ तिंयां बी पाऐ तिन्नैं सोभ मारी। 25,26 ज़ैहसू त डाहअ द तेभै तैणीं एई नगरी बाखा आपणअ बर्छ़अ हारी ज़ेभै तैणीं एई नगरीए सोभ लोग मारी निं हेरै। तैहा धैल़ी पाई एई नगरीए सारी परज़ा मारी। तिंयां थिऐ मर्ध अर बेटल़ी संघी कोई बारा हज़ार ज़ण्हैं। 27 ज़िहअ बिधाता ज़ैहसू लै बोली त डाहअ द, इज़राईली डाहै एई नगरीए डागै-धअण अर लुटअ द समान आप्पू लै। इहअ करै किअ तिन्नैं नगरीए सारी ज़ैदाता दी कबज़अ। 28 ज़ैहसू किई एई नगरी दहई करै सदा लै उज़र अर सह नगरी आसा आझ़ तैणीं बी तेही ई उज़र पल़ी दी। 29 एई नगरीए राज़े ल्हास डाही ज़ैहसू बडै बूटे शाण्हीं दी उडै तैणीं च़ुंढदी लाई अर ज़ांऊं छ़ैल्ली डेऊंदी लागी ज़ैहसू दैनअ ल्हासा डाल़ा का उंधै थुआल़णेंओ हुकम संघा डाही तेऊए ल्हास नगरीए प्रऊल़ी आजू अर तेथ प्रैंदै डाहअ पात्थरो बडअ रूल़ लाई सह आसा आझ़ तैणीं बी तिहअ ई।8:29 बधा. 21:23
एबल धारा खोज़अ परज़ा का बधान
30 तेखअ बणाईं ज़ैहसू एबल नाओंए धारा प्रैंदै इज़राईले परमेशर बिधाता लै एक बेदी। 31 सह बेदी बणाईं तेऊ तेही ई ज़िहअ मोसा गूरै तेऊ का खोज़ी त डाहअ द अर ज़िहअ मोसा गूरै लिखी दी बधाने कताबा दी थिअ लिखअ द, "बेदी बणाऐं सादै पात्थरा करै तेथ निं छ़िणीं-ठोल्लू करै काटुऐ पात्थर लाई।" तेथ किऐ तिन्नैं बिधाता लै हूम बल़ी अर मेल़-ज़ोल़ो बल़ीदान।8:31 लुआ. 20:25 32 ज़ुंण बधान मोसा गूरै त लिखअ द, तेते बणाईं तेऊ सोभी इज़राईली नदरी च़ुआल़ी करै पात्थरे शिला दी एक होर नकल।8:32 बधा. 27:2,8 33 सोभ इज़राईली, तिन्नें सैणैं, सैणैं, पांच़ अर तिन्नां मांझ़ै रहणैं आल़ै परदेसी हुऐ बिधाते करारे मणशू दोहरी बाखा लेबी प्रोहता बाखा मुंह करी खल़्हुऐ दै। आधै इज़राईलीए पिठ ती गरज़ीम अर आधै इज़राईलीए पिठ ती एबल धारा बाखा। बिधाते गूर मोसा त तिन्नां लै हुकम डाहअ द करी कि ज़ेभै सह बगत एछे तेभै लऐ इज़राईली लै बर्गत दैई।8:33 बधा. 11:29 34 तेखअ पहल़अ ज़ैहसू सारअ बधान ज़ोरै-ज़ोरै। ज़ुंण बधाने कताबा दी बर्गता अर फिटक तै लिखै दै तिंयां बी खोज़ै तिहै ई पहल़ी करै ज़िहै तेथ लिखै दै थिऐ।8:34 बधा. 31:11 35 ज़ेतरै बी हुकम मोसा लिखी तै डाहै दै तिंयां खोज़ी ज़ैहसू तेऊ झाल़ै लै सोभी इज़राईली, बेटल़ी-माठै अर सोभी परदेसी का ज़ोरै-ज़ोरै पहल़ी करै पठी।