1 जरदण पछ़मा बाखा सारी ज़ैगा बांडणै का बाद शादै खिरी ज़ैहसू रूबेन, गाद अर पुर्बा बाखा बस्सै दै मनिश्शे गोत्रे लोग आप्पू सेटा लै। 2 ज़ैहसू बोलअ तिन्‍नां लै इहअ, "ज़िहअ बिधाता आपणैं दास मोसा बाती तम्हां लै हुकम किअ त, तम्हैं किई सोभै गल्‍ला तेही ई अर मुल्है बी निं तम्हैं किछ़ू गल्‍ला लै नांह किई।✝ 3 तधा ओर्ही आझ़ तैणीं रहै तम्हैं कबल्‍लै हाम्हां संघै। तम्हैं डाहअ बिधाते हर गल्‍ला तेही ई पूरी करनैओ धैन ज़िहअ तेऊ करना लै बोलअ त। 4 ऐबै दैनी थारै परमेशर बिधाता थारै भाई-बंधा लै बी इधी सुख-शांती, ज़ेही तेऊ करार ती किई दी। तम्हैं बी सका ऐबै आपणैं-आपणैं डेरै जरदण नदी पार पुर्बा बाखा तैहा ज़ैगा लै बापस डेऊए, ज़ेते तम्हैं बिधाते दास मोसा मालक आसा बणाऐं दै। 5 पर तम्हैं डाहै धैन अर तेऊ बधाना मनै तिहअ ई ज़ुंण बिधाते दास मोसा तम्हां का खोज़ी आसा डाहअ द। तेऊ आसा तम्हां लै हुकम किअ द कि तम्हैं झ़ूरै सिधै आपणैं परमेशर बिधाता लै अर तम्हैं ज़िऊऐ तेही ज़िन्दगी ज़िहअ बिधाता च़ाहा। तम्हैं मनै बिधाते सोभ हुकम अर तेऊ लै रहै शुचै-पाक्‍कै। सोभी गल्‍ला करै रहै तम्हैं बिधाते च़ाकरी लागी।" 6-8 खिरी दैनै ज़ैहसू तिंयां बर्गत दैई सबाही। तेऊ बोलअ तिन्‍नां लै इहअ, "डागै-धअण, सुन्‍नअ-च़ंदी, कांस्सअ, लोहअ अर खास्सै झिकल़ै लई फिरै तम्हैं ऐबै घअरा बाखा लै। अह एतरी खास्सी ज़ैदात ज़ुंण तम्हैं आपणैं दुशमणा का लुटी, डेरै पुजी बांडै एता तम्हैं आपणैं होरी भाई-बंधा लै बी।" इहअ शूणीं लागै तिंयां आपणैं घअरा लै हांढदै।

मोसा थिई जरदण नदी पुर्बा बाखा बाशान मुल्खै बस्सै दै मनिश्शे आधै गोत्रा लै ज़ैगा पैहलै ई डाही दी दैई, अर बाकी बच़ै दै आधै गोत्रा लै दैनी ज़ैहसू जरदण नदी पछ़मा बाखा होरी गोत्रा संघै हेस्सअ।

9 इहअ करै डेऊऐ रूबेन, गाद, पुर्बा बाखा बस्सै दै आधै मनिश्शे गोत्रे लोग जरदण नदी पारा पुर्बा बाखा लै बापस फिरी। होर इज़राईली छ़ाडै तिन्‍नैं कनान देशै शिलोह नाओंए ज़ैगा अर आप्पू लागै आपणीं ज़ैगा गलाद मुल्खै तैहा ज़ैगा लै हांढदै ज़ुंण मोसा तिन्‍नें बांडै पैहलै ई हेरी ती दैई ज़िहअ बिधाता हुकम त किअ द।

10 ज़ांऊं रूबेन, गाद अर पुर्बा बाखे मनिश्शे गोत्रा आल़ै जरदण नदीए पछ़मा बाखा खागै पुजै, तिन्‍नैं बणाईं पार टपणै का आजी आर बाखा कनान देशै दरैऊए बाढै एक बडी बेदी। 11 एते खबर गई कनान देशै बाकी इज़राईली का बी पुजी कि रूबेन, गाद अर पुर्बा बाखे मनिश्शे गोत्रै बणाईं जरदण खागै गिलियोत नाओंए ज़ैगा आर बाखा म्हारी हदा भितरी एक बडी बेदी! 12 ऐहा गल्‍ला शूणीं किअ जरदण पछ़मा बाखे सोभी इज़राईली शिलोह एक झाल़अ कि ऐबै हुअ सोभी पुर्बा बाखा बस्सै दै इज़राईली गोत्रा संघै जुध छ़ेल़णअ।

13 पर तेता का आजी छ़ाडअ जरदण पछ़मा बाखे इज़राईली एलीआजर प्रोहतो शोहरू पिनहास रूबेन, गाद अर जरदण पुर्बा बाखे मनिश्शे गोत्रा आल़ै सेटा गलाद मुल्खा लै। 14 पछ़मा बाखा इज़राईली गोत्रे दस सैणैं बी डेऊऐ पिनहास प्रोहता संघै हर गोत्रा का एक अर हर टोली का बी डेऊऐ एक-एक सैणअ तेऊ संघै। 15 तिंयां सोभ पुजै गलाद मुल्खै रूबेन, गाद, अर पुर्बा बाखा बस्सै दै मनिश्शे गोत्रा सेटा।

16 तिन्‍नैं खोज़अ सारी इज़राईली टोली बाखा तिन्‍नां का समाद, "तम्हैं इज़राईले परमेशरा संघै किल्है किअ धोखअ? आप्पू लै ऐहा बेदी बणाईं हुऐ तम्हैं बिधाते द्रोही! ऐबै हेरअ तम्हैं सह बिधाता मनणअ छ़ाडी भाल़ी!✝ 17 तम्हां आद निं रही! पोर नाओंए ज़ैगा म्हारै पाप करनै पिछ़ू बिधाता हाम्हां लै केही माहा मरी छ़ाडी ती? अर हाम्हां लै केही घोर सज़ा दैनी ती? तेऊ पापे सज़ा भुगतदै आसा हाम्हैं आझ़ बी लागै दै! सह पाप कै तम्हां लै थोल़अ त?✝ 18 ऐबै कै तम्हैं तेऊ बिधाता छ़ाडी कबाता च़ाल्‍लै पेठी? ज़ै आझ़ तम्हैं बिधाता का उंबल़ी बाखा डेओए, काल्‍ला निखल़णअ तेऊओ रोश्श सोभी इज़राईली टोली लै। 19 ऐबै ज़ै थारी ज़ैगा बिधाते पूज़ा-गाज़ा करना लै छ़ोतली आसा, तै एछा आर बाखा ओर्ही बिधाते जदी ज़ैगा लै ज़िधी तेऊओ पबित्र खिम्भ आसा। तम्हैं डाहा च़ाऐ जरदण नदी आर म्हारै बांडै आई दी ज़ैगा मांझ़ै बी पोर्ही आप्पू लै। पर आपणैं परमेशर बिधाते बेदी का लाऊआ होर बेदी बणाईं नां बिधाता लै द्रोह करदै लागा अर नां हाम्हां संघै करा धोखअ। 20 तम्हां आद निं रही कि जेराहे शोहरू अकानै डाही ती बिधाता लै अर्पण किई दी च़िज़ा धोखै करै आप्पू लै। तेता पिछ़ू आप्पू ता हुअ सह तेऊए टबरा संघी खतम, पर तेऊए सज़ा पल़ी सोभी इज़राईली भुगतणी अर तेऊ पापा पिछ़ू निं सिधअ अकान कल्ही मूंअ आथी।"✝

21 इना गल्‍ला शूणीं दैनअ रूबेन, गाद अर पुर्बा बाखा बस्सै दै आधै मनिश्शे गोत्रै पछ़मा बाखे इज़राईली सैणैं लै ज़बाब, 22 "बिधाता ज़हा का सारअ बल आसा, सह आसा परमेशर, सह परमेशर आसा बिधाता ज़हा का सारअ बल आसा! सह बिधाता ज़ाणा सोभी गल्‍ला कि हाम्हैं अह किज़ै किअ। हाम्हैं च़ाहा इहअ कि एतो थोघ लोल़ी सोभी इज़राईली का बी लागअ! ज़ै हाम्हैं बिधाता का उंबल़ी बाता डेऊई विश्वास घात किअ होए, तै निं लोल़ी हाम्हैं आजू ज़िऊंदै रहै।✝ 23 ज़ै हाम्हैं अह बेदी इहअ सोठी बणाईं होए कि हाम्हां निं बिधाता मनणअ, कि इहअ सोठअ होए कि ऐहा बेदी दी करनअ हाम्हां हूम, नाज़ अर मेल़-ज़ोल़े बल़ीदान, तै लोल़ी बिधाता हाम्हां लै आप्पै सज़ा दैनी।

24 "पर इहअ करनै पिछ़ू ती म्हारै दिलै एही सोठ कि आजू निं इहअ हआ कि कहा पोस्ती थारी आद-लुआद म्हारी आद-लुआदा लै इहअ बोले, ‘इज़राईलीए परमेशर बिधाता संघै निं थारअ किछ़ै नातअ आथी! 25 बिधाता आसा तम्हैं रूबेन, गाद अर पुर्बा बाखा बस्सै दै मनिश्शे गोत्रा आल़ै हाम्हां इज़राईली का ज़ुदै जरदण दरैऊआ पार डाहै दै, बिधाता आसा इज़राईलो परमेशर पर तम्हैं निं एथ साझ़ू आथी।’ इहअ करै सका थारी आद-लुआद म्हारी आद-लुआदा बिधाते च़ाकरी करनै का रोक्‍की। 26 तैही बणाईं हाम्हैं इधी आप्पू लै अह बेदी, पर अह निं भैंट या हूम बल़ीदान करना लै आथी, 27 पर अह बेदी हणीं म्हारै अर थारै लोगा मांझ़ै, थारी अर म्हारी आदी-लुआदी मांझ़ै शाजता ज़ेही कि हाम्हैं बी सका बिधाते पबित्र ज़ैगा एछी हूम, मेल़-ज़ोल़े बल़ीदान करी, तेऊए च़ाकरी करी अर आजू थारी आद-लुआद म्हारी आद-लुआदा का इहअ निं बोले कि बिधाते च़ाकरी लै साझ़ू आथी। 28 तैही किअ हाम्हैं इहअ बच़ार, ज़ै आजू केभै थारी लुआद म्हारी लुआदा लै इहअ बोले बी, तै सका हाम्हैं इहअ बोली कि बिधाते बेदी ज़ेही बणाईं दी ऐहा बेदी भाल़ा! अह आसा म्हारै दादै-बाबै बणाईं दी कि हाम्हां अर तम्हां मांझ़ै शाजती दैणैंओ काम करे। 29 हाम्हैं निं बिधाता लै द्रोह किअ, नां हाम्हैं तेऊओ बधान छ़ाडअ। नां हाम्हैं कधि इहअ करी सकदै कि बिधाते खिम्भा आजूए पबित्र बेदी छ़ाडी हूम, नाज़ अर मेल़-ज़ोल़े बल़ीदान करना होर बेदी बणांए!"

30 रूबेन, गाद अर पुर्बा बाखा बस्सै दै आधै मनिश्शे गोत्रे इना गल्‍ला शूणीं हुऐ पिनहास प्रोहत अर तेऊ संघै आऐ दै इज़राईली गोत्रे सैणैं अर टोलीए सोभ सैणैं खास्सै खुश।

31 एलीआजर प्रोहते शोहरू पिनहास प्रोहतै बोलअ रूबेन, गाद अर पुर्बा बाखा बस्सै दै मनिश्शे गोत्रा आल़ै लै, "ऐबै लागअ हाम्हां का थोघ कि बिधाता आसा हाम्हां संघै। तम्हैं निं बिधाता संघै किछ़ै विश्वास घात किअ। हथू बच़ाऊऐ तम्हैं इज़राईली बिधाते सज़ा का।"

32 तेखअ डेऊअ एलीआजर प्रोहतो शोहरू पिनहास सोभी सैणैं संघी गलाद मुल्खा का रूबेन, गाद अर पुर्बा बाखा बस्सै दै मनिश्शे गोत्रा आल़ै सेटा का फिरी। कनान देशै पुजी खोज़ी तिन्‍नैं होरी इज़राईली का ईंयां गल्‍ला पठी। 33 इना गल्‍ला शूणीं हुऐ सोभै इज़राईली खास्सै खुश, अर तिंयां लागै परमेशरे ज़ै-ज़ैकार करदै। तेखअ निं तिन्‍नैं रूबेन, गाद गोत्रा संघै जुध करने अर तिन्‍नें मुल्खा बरैबाद करने गल्‍ला भिई किई आथी।

34 रूबेन अर गाद गोत्रा आल़ै बोलअ इहअ, "अह बेदी आसा हाम्हां सोभी लै शाजत कि बिधाता ई आसा परमेशर।" तैही डाहअ तिन्‍नैं तैहा बेदी नाअं, "शाजत*।"