1 जरदण नदी पछ़मा बाखा बी भेटअ युसुफे ज़ेठै मनिश्शे गोत्रा हेस्सअ। गलादो बाब माकीर थिअ मनिश्शेओ ज़ेठअ शोहरू अर सह थिअ जोधअ, तैही थिअ मोसा तेऊ लै गलाद अर बाशान जरदण नदी आर पुर्बा बाखा बांडै दैई हेरअ द। 2 पर मनिश्शे गोत्रे बाकी आधी टोली लै दैनी जरदण नदी पार टपी पछ़मा बाखे ज़ैगा। तिंयां थिऐ एबीएजेर, हेलेक, अजरीएल, शकेम, हेपेर, शमीदा ज़ुंण आपणीं-आपणीं टोलीए साबै युसुफे ज़ेठै शोहरू मनिश्शे खिंबे सैणैं मणछ तै। 3 पर तिन्‍नां मांझ़ै त हेपेर नाओं मणछ मनिश्शेओ आजू पल़पोचअ, सह थिअ गलादो शोहरू अर तेऊओ दादू बोल़णअ त माकीर। हेपेरे शोहरू सलफोदे हुई आजू शोहरी ई शोहरी, तिन्‍नां नाअं त मेहला, नोहा, होग्ला, मिल्का, तिर्सा। 4 तिंयां डेऊई एलीआजर प्रोहत अर नूने शोहरू ज़ैहसू अर इज़राईली सैणैं सेटा, संघा लागी इहअ बोल्दी, "बिधाता थिअ आपणैं दास मोसा लै इहअ हुकम किअ द कि हाम्हां लै बी दैऐ म्हारै भाई-बंधा जैंदरी हेस्सअ।" ज़ैहसू दैनअ तिन्‍नां लै तिन्‍नें च़ाच़ू संघै हेस्सअ बांडी ज़िहअ बिधाता हुकम किअ त तिहअ ई।✝ 5 तैही भेटै मनिश्शे गोत्रा पुर्बा बाखा बांडै आऐ दै गलाद अर बाशाना का लाऊआ जरदण नदी पछ़मा बाखा दस हेस्सै। 6 किल्हैकि मनिश्शे गोत्रा दी बणाईं शोहरू संघै शोहरी बी हेस्सैदार अर होरी आधै गोत्रे टोली लै ती जरदण आर गलाद मुल्खै ज़ैगा दैई हेरी दी।

7 ज़ुंण ज़ैगा मनिश्शे गोत्रा लै भेटी, तेते सिअं आसा आशेर पोर्ही शकेम नगरी सम्हनै मिकमतात नगरी तैणीं। तिधा का फिरी दखणा बाखा ज़िधी एनप्पतूही लोग थिऐ बस्सै दै। 8 तपूहे सारी ज़ैगा ता आई मनिश्शे हेस्सै पर तपूह नगरी ज़ुंण मनिश्शे सिऊंआं दी पल़ी, सह डेऊई एप्रैम गोत्रे हेस्सै। 9 तिधा का उंधै होथी तिन्‍नें सिअं कानाह गाडा तैणीं। पर गाडे दखणा बाखे नगरी ती मनिश्शे गोत्रे ज़ैगा पर तिंयां एप्रैम गोत्रे हेस्सै दैनी दी। तिधा का उतरा बाखा डेऊई तिन्‍नें सिअं नाल़ो-नाल़ मांझ़ समुंदरे बाढै तैणीं। 10 दखणा बाखा ज़ैगा आई एप्रैम गोत्रे बांडै अर मनिश्शे लै आई उतरा बाखा अर पछ़मा बाखा ती तिन्‍नें सिअं मांझ़ समुंदर। मनिश्शे गोत्रे उतर पछ़म दिशे सिऊंआं पोर्ही हआ तै आशेर गोत्रा आल़ै अर उतर पुर्ब दिशा बाखे सिअं मिला ती इस्साकार गोत्रा आल़ै संघै। 11 मनिश्शे गोत्रे बांडै आई इस्साकार अर आशेर गोत्रे मुल्खै बी नगरी तेते गराऊंआं संघी। तिंयां नगरी ती बेथ-शान अर इबलाम तेते सोभी बडै-होछ़ै गराऊंआं संघी, दोर, एनदोर, तनाक, मगिदो नगरी बी आऐ तेते गराऊंआं संघी मनिश्शे गोत्रे हेस्सै। 12 मनिश्शे गोत्रा आल़ै निं तिन्‍नां नगरी अर गराऊंऐं बस्सै दै लोगा तेता का पोर्ही काढी सकै अर तैही रहै तिंयां कनानी तिधी बस्सी। 13 बादा का ज़ांऊं इज़राईली खास्सै बलबान बी हुऐ, तिन्‍नैं निं सोभै कनानी तेऊ देशा का बागै काढै आथी पर तिन्‍नैं डाहै तिंयां आपणैं बगारू लाई।

14 युसुफे खिंबा का आऐ ज़ैहसू सेटा संघा लागै इहअ बोल्दै, "बिधाता दैनी हाम्हां एही बर्गत कि हाम्हैं आसा होरी गोत्रा का खास्सै अर तम्हैं पाई हाम्हां लै एक्‍कै परच़ी अर हेस्सअ बी भेटअ हाम्हां सह ई एक्‍कै अर सह ज़ैगा आसा हाम्हां लै थोल़ी!"

15 ज़ैहसू बोलअ तिन्‍नां लै इहअ, "ज़ै तम्हैं खास्सै आसा अर एप्रैम गोत्रा बस्सणा लै धारा बाखो मुल्ख थोल़अ आसा, तै सिक्‍का आजू तेऊ बणां बाखा लै ज़ेथ रपाई अर परिजी लोग थिऐ। तेते डाल़-बूट काटी करा आप्पू रहणा लै ज़ैगा।"

16 युसुफे खिंबा आल़ै बोलअ इहअ, "धारा बाखे मुल्खै निं हाम्हैं अक्‍की च़ाल्‍लै पर जज्रेल खागै सरली ज़ैगा बेथ-शान नगरी अर तेते गराऊंऐं बस्सै दै कनानी का आसा लोहे रथ।"

17 ज़ैहसू बोलअ युसुफे खिंबे एप्रैम अर मनिश्शे गोत्रा लै, "हाँ, तम्हैं आसा सोभी का खास्सै अर बलबान बी, तम्हां लै आसा थारै हेस्सै का लाऊआ होर ज़ैगा दैणीं ज़ाईज़। 18 धारा बाखा सारअ मुल्ख बी हणअ थारअ, आसा सह बण पर तम्हैं पाआ तेते डाल़-बूट काटी संघा गिम्मा तैहा एकी का दुजै पुंझ़ा तैणीं। रही कनानीए गल्‍ल, तिंयां बी हेरनै तम्हां तेता का बागै काढी च़ाऐ तिन्‍नां का लोहे रथ अर तिंयां केतरै बी बलबान किल्है निं होए।"