1 बिधाते गूर मोसे ज़ांऐं हणैं बाद किई बिधाता ज़ैहसू संघै गल्‍ला। ज़ैहसू थिअ नूनो शोहरू अर सह करा त मोसा गूरा संघै च़ाकरी।✝ 2 बिधाता बोलअ ज़ैहसू लै इहअ, "मेरअ दास मोसा गअ मरी। ऐबै कर हिम्मत, तूह अर सोभै इज़राईली तैर्हिआ, संघा टपा जरदण दरैऊआ पारा बाखा तेऊ देशा लै ज़ुंण मंऐं तम्हां इज़राईली लै आसा लाअ द दैई।✝ 3 मंऐं ज़ुंण मोसा लै ज़बान दैनी कि ज़िधी-ज़िधी तम्हैं गंईं डाहे सह ज़ैगा दैणीं मुंह तम्हां लै।✝ 4 दखण रेगीस्ताना उझै उतर दिशा लाबानोन धारा तैणीं, पुर्बा दिशा फरात दरैऊआ ओर्ही पछ़म दिशा दी माहा समुंदरा तैणीं हणअ सारअ हित्ती लोगो अह देश थारअ।✝

5 "ज़ैहसू, तेरी ज़िऊंदी ज़िता निं ताह कोहै हारी सकदअ। ज़िहअ हुंह मोसा संघै रहअ, तिहअ हणअ हुंह ताह संघै बी। हुंह रहणअ सदा ताह संघै, नां शोटी डाहंदअ।✝ 6 हैअ डाह, तूह आसा ऐबै इना एतरै लोगो सैणअ, ईंयां लागणै तेऊ देशै ताह पजैल़णैं ज़ेता दैणें करार मंऐं इने दादा-बाबा संघै थिई किई दी। 7 तूह डाह हैअ, तूह करै सिधअ एतरअ कि ज़ुंण बधान मंऐं मेरै दास मोसा का दैनअ त, तेऊ मनै ज़िहअ मंऐं खोज़अ तिहअ ई। तेता का निं ओर्ही नां पोर्ही फिरी, अर तूह ज़िधी-ज़िधी बी डेओए, तिधी-तिधी हणअ तेरअ हर काम सफल। 8 बधाने अह कताब निं लोल़ी तम्हैं कधि बिस्सरी, एता करै धैल़-राच उझ़दी-बेशदी पहल़ी अर ज़ुंण एथ लिखअ द आसा, तेऊ साबै लोल़ी तम्हैं ज़िन्दगी ज़िऊई। तै हणैं तम्हैं ऐहा ज़ैगा सोभी गल्‍ला दी सफल।✝ 9 इहअ डाहै आद कि ताल्है आसा मंऐं हुकम किअ द, तूह डाहै हैअ! तूह निं डरी आथी अर नां हैअ चोल़ी। किल्हैकि ज़िधी-ज़िधी तूह डेओए, तिधी-तिधी रहणअ हुंह तेरअ परमेशर बिधाता ताह संघै आप्पै।"

10 तेखअ किअ ज़ैहसू इज़राईली सोभी टोलीए सैणैं लै हुकम, 11 "सारी इज़राईली टोलीए सोभी डेरै लै दैआ इहअ हुकम कि आप्पू-आप्पू लै चाणां सोभै रोटी-च़ोक्‍कण, किल्हैकि चिई धैल़ै भितरी लागणअ तम्हां जरदण नदी पार टपी तेऊ देशा गिम्मदै डेऊणअ ज़ेते तम्हैं थारै परमेशर बिधाता मालक आसा लाऐ दै बणाईं।"

12 तेखअ बोलअ ज़ैहसू रूबेन, गाद टोली आल़ै अर मनिश्शे गोत्रा मांझ़ै आधी टोली लै, 13 "तैहा गल्‍ला करा आद ज़ुंण बिधाते गूर मोसा तम्हां लै बोलअ त कि बिधाता दैणीं तम्हां लै जरदण नदी पुर्बा बाखे ज़ैगा कि तम्हैं इधी बस्से। 14 थारी बेटल़ी, लान्हैं-सुन्हैं अर डागै-चैणैं ता रहणैं ऐबै इधी, पर तम्हां मांझ़ै जुधा करनै आल़ै शूर-बीर टपा आपणैं शस्त्रा संघी आपणैं होरी इज़राईली भाई-बंधा का आजू जरदण नदी पार। एऊ साबै करा तम्हैं तिन्‍नें तेभै तैणीं मज़त, 15 ज़ेभै तैणीं तिंयां जरदण नदी पछ़मा बाखा तैहा सारी ज़ैगा गिम्मी निं हेरे ज़ुंण बिधाता तिन्‍नें बांडै आसा दैनी दी। ज़ांऊं होरी सोभी इज़राईली टोली बी राज्ज़ी-राम्बल़ै बस्सी जाए, तेखअ सका तम्हैं बापस फिरी इधी जरदण नदी पुर्बा बाखा ऐहा ज़ैगा मौज़ी बस्सी ज़ुंण बिधाते दास मोसा थारै बांडै आसा दैनी दी।"

16 तिन्‍नैं दैनअ ज़ैहसू लै ज़बाब, "हाम्हां करनअ ज़िहअ-ज़िहअ तूह खोज़े तिहअ ई अर ज़िधा लै तूह हाम्हां छ़ाडे हाम्हां लागणअ तिधा लै हांढदै। 17 ज़िहअ हाम्हैं मोसो हुकम मना तै, तेरअ हुकम बी मनणअ हाम्हां तिहअ ई। सिधअ इहअ लोल़ी हुअ, ज़िहअ बिधाता मोसा संघै रहा त, तिहअ ई लोल़ी सह ताह संघै बी रहअ। 18 ज़ुंण बी ताल्है द्रोह करे, ज़ुंण तेरअ हुकम नांईं मने, सह पाणअ हाम्हां मारी। पर तूह हअ बलबान अर हिम्मत कर।"