बधान 34

मोसा गूरे मौत

1 थोल़ै धैल़ै बाद लागअ मोसा मोआब सऊंऐं रेगीस्ताना का हांढदअ। सह डेऊअ तिधा का पिसगा धारा नेबो नाओंए च़ुंडी प्रैंदै ज़ुंण जरदण नदी आर बाखा जेरिहो नगरी सम्हनै आसा। बिधाता रहैऊई मोसा का उतरा बाखा गलाद मुल्खा पोर्ही दान नगरी तैणीं ज़ैगा। 2 कनान देशै ज़िधी-ज़िधी नप्ताली, एप्रैम, मनिश्शे अर यहूदा गोत्र जरदण नदी पार डेऊई बस्सणै आल़ै तै, सह ज़ैगा रहैऊई बिधाता मोसा का मांझ़ समुंदरै तैणीं। 3 मोसा भाल़अ तिधा का दखण रेगीस्तान, जेरिहो नगरी ज़िधी खास्सै खज़ूरे बूट आसा, तेऊ खागा पोर्ही उंधै ज़ोआर नगरी तैणीं।

4 तेखअ बोलअ बिधाता मोसा लै इहअ, "अह आसा सह ई ज़ैगा ज़ेते करार मंऐं आबराम, इसहाक अर याकबा संघै आसा किई दी कि तिन्‍नें आद-लुआदा लै दैणीं मुंह एक ज़ैगा। ऐबै हेरी मंऐं ताखा अह रहैऊई। पर तूह निं आप्पू जरदण नदी पार टपी ऐहा ज़ैगा पुजणअ आथी।"✝34:4 मूल. 12:7; 26:3; मूल. 28:13

5 तेखअ हुअ इहअ कि बिधातो दास मोसा गअ मोआब देशै तिधी ज़ांऐं, ज़िहअ बिधाता बोली त हेरअ द। 6 बिधाता डाहअ मोसा मोआब देशै बेथ-पोर नगरी नेल़ खागै दाबी। इहअ थोघ निं आझ़ तैणीं कोही का आथी कि सह बिधाता किधी ज़िहअ डाहअ। 7 ज़धू मोसा ज़ांऐं गअ, तधू ती तेऊए अमर एकी शौआ बिहा साले, तज़ी बी शुझिआ त तेऊए आछी का राम्बल़अ अर एतरी प्रोढी अमरा बी थिऐ तेऊ राम्बल़ै ज़ोर-ज़ाहण।

8 इज़राईली तै मोआब देशै सरलै रेगीस्तानै डेरै पाऐ दै, तिधी किअ तिन्‍नैं मोसा लै तिहा धैल़ै तैणीं लेरा-पकारा पाई शोग ज़िहअ तिन्‍नों रबाज़ थिअ।

मोसे पदबी दी बेठअ आजू ज़ैहसू

9 मोसा हेरी ती मरनै का आजी आपणीं पदबी नूने शोहरू ज़ैहसू का सभाल़ी। बिधाता दैनी ज़ैहसू लै राम्बल़ी समझ़-बुध। ज़िहअ ज़ैहसू बोला त, इज़राईली शूणां तै तिहअ ई अर ज़ुंण हुकम बिधाता मोसा का खोज़ै तै, तिन्‍नां बी मना तै तिंयां तिहै ई।

मोसा त बिधातो महान गूर

10 इज़राईला दी निं तधा बाद भिई बिधातो इहअ गूर निखल़अ ज़िहअ मोसा थिअ। बिधाता करा त तेऊ संघै मुंहां नदरी प्रगट हई गल्‍ला अर✝34:10 लुआ. 33:11 11 सह छ़ाडअ त बिधाता महान अर डरैऊंणै च़मत्कार करदअ मिसर देशे माहा राज़ै अर तेऊए सारै देशे लोगा सेटा। 12 इज़राईली सम्हनै निं होरी कोही गूरै इहै महान अर डरैऊंणै च़मत्कार किऐ ज़ुंण मोसा किऐ।