1 "ज़ै तम्हां मांझ़ै कुंण मर्ध आपणीं बेटल़ी का किज़ू गल्‍ला पिछ़ू खास्सअ नराज़ होए कि सह निं तैहा संघै रहणअ ई च़ाहंदअ, सह दैऐ बैईदाऊअ लिखी करै तैहा बेटल़ी छ़ाडी।✝ 2 सह छ़ाडी दी बेटल़ी ज़ै कहा होरी संघै बैह करे, 3 पर सह दुजअ मर्ध बी तैहा का खुश नांईं होए अर सह बी तैहा बैईदाऊअ दैई छ़ाडी दैए या सह दुजअ मर्ध मरी जाए, 4 दुजै मर्धा संघै रही बस्सी करै निं सह बेटल़ी तेखअ तेऊ मर्धा संघै भिई बैह करी सकदी ज़ुंण तेसो पैहलअ लाल़अ थिअ। इना इहै च़िल़्हखरै कामां करै लागणीं तैहा ज़ैगा छ़ोत ज़ुंण बिधाता तम्हां लै दैणीं, एता का आसा बिधाता नफरत।

5 "ज़ै कहा शोहरू अर शोहरीए बैहा हई अज़ी साल बी निं हुई होए, तेऊ निं तम्हैं जुधा लै छ़ाडी अर नां किज़ू कामों तेऊ लै बोझ़ पाई। तेऊ दैणअ एकी साला तैणीं तेऊए लाल़ी संघै राज्ज़ी-मौज़ी घअरै रहणैं।

6 "ज़ेभै तम्हैं कहा लै ऋण दैए, तम्हैं सका तेऊ का किज़ै बांधअ ढाकी ताकि सह बादा का ऋण भरे। पर तम्हैं निं तिन्‍नें घअरो नाज़ा पिशणैंओ थरेट या तेते तल़ी बांधै डाही, तेता करै सका तिन्‍नां लै आफ़त पल़ी, तेथ नाज़ पिशी लागा तिन्‍नां आपणैं टबरा का रोटी खैऊंणी।

7 "ज़ै तम्हां मांझ़ै कुंण आपणैं भाई-बंधो हरण करी ज़ोरा-ज़ोरी गलाम हणां लै बेच़णअ च़ाहे, तेऊ इहै च़ोरा पाऐ मारी ताकि तम्हां इज़राईली मांझ़ा का एही बूराई दूर होए।✝

8 "मंऐं आसा सोभी प्रोहता का खोज़ी डाहअ द कि तेभै किज़ै करनअ ज़ै तम्हां मांझ़ै कहा कोहल़ होए, तम्हैं डाहै एतो धैन हेरे, ज़िहअ करना लै प्रोहत तम्हां लै बोले, तम्हैं करै तिहअ ई।✝ 9 ऐहा गल्‍ला बी निं तम्हैं बिस्सरुई कि मिसर देशा का एछदी बारी बिधाता मिर्यामा लै किज़ै किअ त।✝

10 "ज़ेभै तम्हां मांझ़ै कुंण आपणैं भाई-बंधा लै ऋण दैए, सह सका तिन्‍नां का बांधअ मांगी ताकि तिंयां तेऊ का काढै दै ऋणा बापस भरे। पर तैहा बांधे च़िज़ा निंदअ निं तेऊए घअरा भितरी डेऊई।✝ 11 तम्हैं न्हैल़ै घअरा बागै रही अर तिंयां आणै तैहा च़िज़ा घअरा का बागा लै ज़ेता बांधै डाहणां लै तिन्‍नैं ज़बान आसा दैनी दी।

12 "पर ज़ै सह मणछ पठी दाल़जी होए कि तेऊ का आसा सुत्तणा लै एक्‍कै दोहल़ू अर सह ई डाहअ तेऊ बांधै पाई। तेऊ बांधै आप्पू का डाही निं तूह निंजा सुत्ती आथी। 13 पर तेता लऐ तूह धैल़अ उडणैं का आजी तेऊ लै बापस दैई! ताकि सह बैल़ी नैत्तै-तात्तै सुत्ते अर ताल्है बिधाता सेटा बर्गत दैणा लै अरज़ करे। बिधाता हआ इना इहै धर्मीं कामां भाल़अ लागअ द।

14 "ज़ै तम्हैं कहा गरीब मणछा आप्पू सेटा कामैं लाए, तिन्‍नें मज़दूरी निं खाई आथी, च़ाऐ सह थारअ आपणअ भाई-बंध इज़राईली होए या कुंण परदेसी होए।✝ 15 पर तम्हैं डाहणअ हर बगत इहअ खैल कि ईंयां आसा गरीब ज़ुंण मज़दूरी खटी हर धैल़ै आपणैं लान्हैं-सुन्हैं धाचा। तैही लऐ तिन्‍नें मज़दूरी धैल़अ उडणैं का आजी तिन्‍नें हाथै दैई। इहअ निं हआ कि तिंयां बिधाता सेटा लेर-पकार पाए अर तेतो दोश ताल्है लागे।

16 "ज़ै कसरै शोहरू ज़ुल्म किअ होए, तेता पिछ़ू निं तेऊए ईजा-बाबा लै मौते सज़ा दैई अर नां कसरै ईजा-बाबे ज़ुल्मा पिछ़ू शोहरू लै मौते सज़ा दैई। ज़ुंण दोशी आसा, सज़ा बी लोल़ी तेऊ ई भेटी।✝

17 "कहा छ़ुटै-मुक्‍कै अर परदेसी मणछा निं हारदै-मारदै लागी। नां तम्हैं कहा बिधबा बेटल़ी का ऋणे बदल़ै तेसे झिकल़ै बांधै ढाकी।✝ 18 तम्हैं डाहणीं आप्पू सदा अह गल्‍ल आद कि तम्हैं थिऐ मिसर देशै गलाम अर सह थिअ थारअ परमेशर बिधाता ज़ुंणी तम्हैं तिधा का छ़ड़ैऊई आणै। तैही दैआ हुंह तम्हां लै इहअ करनैओ हुकम।

19 "ज़ेभै तम्हैं आपणैं खेचा का नाज़ लऊए, तेभै ज़ै तम्हैं एक कुंभल़अ नाज़ खेचै बिस्सरी पाए तेता आणदै निं खेचा लै फिरी डेऊई। तिन्‍नां दैऐ गरीब, परदेसी, बिधबा अर छ़ुटै-मुक्‍कै दै लान्हैं लै रहणैं। इहअ करै दैणीं बिधाता तम्हां लै थारै सोभी कामां दी बर्गत।✝

20 "ज़ेभै तम्हैं जैतूने बूटा का फसल झाल़े, तेता का निं पठी आप्पू लै झाल़ी, तेथ बी दैऐ बिधबा, परदेसी, गरीबा अर छ़ुटै-मुक्‍कै दै लान्हैं लै धख एही रहणैं। 21 ज़ेभै तम्हैं दाखे फसल चोल़े, तेतो चोल़ै पैहलअ भ्रह अर बाकी दैऐ गरीब, परदेसी, बिधबा अर छ़ुटै-मुक्‍कै दै लान्हैं लै रहणैं। 22 तम्हैं डाहणीं सदा अह गल्‍ल आद कि ज़धू तम्हैं मिसर देशै गलाम थिऐ, तधू आसा तम्हैं बी एही ई गरीबी काटी दी अर तैही दैआ हुंह तम्हां लै इहअ करनैओ हुकम।"