1 मोसा रहअ इज़राईली लै इहअ खोज़दअ लागी, "इज़राईलीओ, तम्हैं रहै बिधाते इना बधान अर बिधी मनणा लै शुचै-पाक्‍कै ज़ुंण मंऐं आझ़ लाऐ तम्हां का खोज़ी। तेता करै रहणैं तम्हैं ज़िऊंदै संघा हणैं खास्सै, तेखअ जाणै तम्हैं तैहा ज़ैगा पुजी तेते मालक बणी ज़ेते बारै बिधाता म्हारै दादा-बाबा लै ज़बान आसा दैनी दी।

2 "तिन्‍नां गल्‍ला निं तम्हैं बिस्सरुई आथी कि बिधाता तम्हैं च़ाल़्ही साला तैणीं उज़र रेगीस्तानै किहै नढैऊऐ। तेथ तम्हां ज़ुंण खरी-अऊखी पल़ी, तेता करै च़ाहा त बिधाता तम्हां शरीफ बणाणअं अर एही परख करनअ कि तम्हां तेऊए हुकम मनणै बी कि नांईं। 3 हाँ, तम्हैं बणाऐं तेऊ शरीफ तम्हां लै खास्सी भुख आणी अर खाण दैई किई तेऊ थारी भुख खतम, सह थिई खाणें एही च़ीज़ ज़ुंण तधू तैणीं थारै दादै-बाबै कधि निं भाल़ी ती। तेता दैई सखाऊअ बिधाता तम्हां का सबक कि मणछ निं सिधअ रोटी करै ज़िऊंदअ, हाम्हैं रहा तिन्‍नां सोभी बैणा करै ज़िऊंदै ज़ुंण बिधाता बोला।✝

4 "इना च़ाल़्ही साला नां ता थारै झिकल़ै धेल़्हुऐ अर नां थारै खूर शुंआंऐं। 5 तम्हैं डाहणीं अह गल्‍ल आद कि थारअ परमेशर बिधाता हआ तम्हां नैरदअ लागअ द, ज़िहअ बाब आपणैं शोहरू सज़ा दैई नैरा, तिहअ ई नैरा बिधाता तम्हां बी। 6 तैही करनअ तिहअ ई ज़िहअ थारअ परमेशर बिधाता तम्हां लै हुकम करा अर तम्हैं रहणअ तेऊए च़ाकरी तेऊए डरा हेठै रही लागी।

7 "किल्हैकि थारै तेऊ परमेशर बिधाता आसा तम्हैं तेऊ रज़दै-पज़दै देशै लाऐ दै निंईं ज़ेथ पाणींए गाडा, बधिया खाग अर डुघै पाणींए सोबल़ा आसा। 8,9 तम्हैं सका तेऊ देशे धारा का चाम्बअ काढी अर पात्थर आसा तेथ लोहै ज़िहै। तेऊ देशै निं तम्हैं भुखै-नचिशै रहणैं। तेऊ देशे ज़िम्मीं दी हआ कणक, ज़ौ, दाख, फेडू नारदाणैं, जैतूनो तेल अर मखीर आसा रज्ज़ी खाणां लै।

10 "ज़ांऊं तम्हैं खाई-पिई रज्ज़ी जाए, तेता लै करै आपणैं परमेशर बिधातो शूकर ज़ुंणी तम्हां लै अह रज़दी-पज़दी ज़ैगा दैनी। 11 तम्हैं डाहै धैन हेरे, इहअ निं हआ कि आपणैं बिधाता बिस्सरी पाए अर बिधाते ज़ुंण बधान अर बिधी आझ़ मंऐं तम्हां का लाऐ खोज़ी तिन्‍नां मनणअ छ़ाडे!✝ 12 ज़ै तम्हैं बिधाते सोभी हुकमा मने, तै हणअ तम्हां लै खाणां-पिणां लै बतेर्हअ अर रहणा लै हणैं बधिया-बधिया घअर। 13 थारी हणीं खास्सी भेडा-बाकरी अर गाऊई-बल्दे हेल़्ही, सुन्‍नअ-च़ंदी अर ज़ैदात।

14 "पर ज़ेभै तम्हां का ईंयां सोभै गल्‍ला होए, तेभै निं घमंड करी! ऐहा गल्‍ला बी निं तम्हैं कधि बिस्सरी कि तम्हैं तै मिसर देशै गलाम अर सह थिअ बिधाता ज़ुंणी तम्हैं तैहा गलामी का आज़ाद किऐ। 15 एता बी डाहै तम्हैं आद कि तेऊ बिधाता तम्हैं घोर डरैऊंणै रेगीस्ताना बाती किहै नढैऊऐ ज़ेथ झ़रीलै शपैल़ अर बडै-बडै झ़रीलै बिंच़ू रहा। पाणीं नांईं त तेथ दूर-दूर तैणीं आथी, पर बिधाता काढअ बडी टोल्हा का तम्हां लै पाणीं ताकि तम्हैं नचिशै निं रहे। 16 बिधाता दैनअ तम्हां लै शुन्‍नैं रेगीस्तानै खाण, सह थिई खाणें एही च़ीज़ ज़ुंण तधू तैणीं थारै दादै-बाबै कधि निं भाल़ी ती। बिधाता थिअ तम्हां परखदअ लागअ द ताकि तम्हैं तेऊ दी भरोस्सअ करे अर खिरी थारअ भलअ होए।

17 "ज़ेभै तम्हैं इना सोभी गल्‍ला दी सेठ होए, तेभै निं तम्हैं इहअ बोली, ‘हाम्हैं हुऐ आपणीं मैन्थ अर आपणैं ज़ोर-ज़ाहणा करै सेठ!’ 18 पर तम्हैं डाहै आद कि थारै परमेशर बिधाता दैनअ तम्हां सफल हणां लै बल। तेऊ किअ इहअ एते तैणीं कि तेऊ ती आझ़ सह करार पूरी करनी ज़ेते तेऊ थारै दादा-बाबा लै ज़बान आसा दैनी दी।

19,20 "पर मंऐं डाही हेरे तम्हां लै पैहलै ई चतैनगी दैई, ज़ै तम्हैं होरी देअआ-देबीए पूज़ा करे, बिधाता करनै तम्हैं पाक्‍कै दी तिहै ई खतम ज़िहै तेऊ तिंयां देश खतम किऐ ज़हा-ज़हा संघै तम्हैं जुध किअ।"