1 मोसा थिअ बिधातो गूर, तेऊ दैनी संसारा छ़ाडणैं का आजी इज़राईले सोभी गोत्रा लै बर्गत।

2 मोसा बोलअ इहअ,

"बिधाता आअ सीनाई धारा का,

सह निखल़अ एदोम देशा बाखा सुरज़ा ज़िहअ,

तेऊ लाअ परान धारा का आपणैं लोगा लै धुप्पअ।

तेऊ संघै आसा लाखों स्वर्ग दूत अर

बडी आगीओ घैनअ आसा तेऊए दैहणै हाथै।

3 बिधाता झ़ूरा आपणीं पबित्र परज़ा लै खास्सअ,

सह करा तिन्‍नें फाज़त ज़ुंण तेऊए आपणैं आसा।

तिंयां शूणां तेऊए हर हुकम

अर तेऊ ई सेटा टेक्‍का माथअ।

4,5 मंऐं मोसा किअ तम्हां याकबे आद-लुआद सोभी इज़राईली गोत्रो झाल़अ,

संघा दैनअ बिधातो बधान,

इहअ करै बणाअं तम्हैं अर

थारै सैणैं आपणअ परमेशर बिधाता राज़अ।

6 रूबेन गोत्र लोल़ी सदा ज़िऊंदअ रहअ,

च़ाऐ तिंयां थोल़ै ई मणछ किल्है निं होए।

7 हे बिधाता, तूह शुण यहूदा गोत्रे लेर-पकार,

तिन्‍नां दै आपणैं लोगा सेटा बापस घअरै पजैल़ी।

हे बिधाता, तूह कर तिन्‍नें दुशमणा संघै आप्पै जुध।

8 लेबी गोत्र, तम्हैं आसा हेरै दै बिधाता मस्सा अर

मरीबा नाओंए सोबल़ा सेटा परखी,

तम्हैं निखल़ै बिधाता लै शुचै-पाक्‍कै,

प्रोहते पदबी रहणीं सदा तम्हां ई का।✝

9 तम्हैं किई इज़राईलीए बिधाता संघै करारे फाज़त।

तम्हैं झ़ूरै तेता लै आपणैं ईजा-बाबा, भाई-बैहणी

अर शोहरू-शोहरी का बी खास्सै।

10 तम्हां खोज़णअ बिधाते पबित्र ज़ैगा

याकबे आद-लुआदा का बिधातो बधान।

बिधाता सेटा बल़ीदान अर

धूपा दैणैं आल़ै हणैं इज़राईली मांझ़ै तम्हैं ई।

11 हुंह करा बिधाता का एही अरज़ कि

सह दैए थारै सोभी कामां लै बर्गत

अर तेऊ लोल़ी तम्हैं इहै बलबान बणाऐं कि

थारी एकी बाहणैं बाद निं थारै दुशमण

धरना का खल़ै उझ़दै लोल़ी रहै।

12 बिन्यामीन गोत्रा लै झ़ूरा परम प्रधान परमेशर खास्सअ,

बिधाता हणअ तम्हां फेर धारा ज़िहअ

अर तम्हैं बस्सणै तेथ मांझ़ै अर

तेऊ करनी थारी फाज़त।

13 युसुफे आद-लुआदा लै लोल़ी बिधाते

एही बर्गत हुई कि तिन्‍नें ज़ैगा-ज़िम्मीं लोल़ी

राम्बल़अ सरग हुअ अर

तिन्‍नें धरती हेठै बी लोल़ी बतेर्हअ पाणीं रहअ।

14 तिन्‍नें डाल़ै-बूटै लोल़ी

धुप्पै करै फल़ बधिया पाक्‍कै,

हर ऋता लोल़ी तिन्‍नें घणीं फसल लागी।

15 उझै धारा लोल़ी तिन्‍नें मन्‍न-मरज़ीए च़िज़ा

अर बधिया साल-फसल हुई।

16 बिधाता ज़ुंण ज़ल़दी आगीए झ़ाकल़ा दी प्रगट हआ,

सह च़ाहा इहअ कि थारी तैहा ज़ैगा लोल़ी

बधिया पज़ैआ हुई अर

सह हणअ युसुफे मुंडै राज़ मुगटा ज़िहअ।

17 एप्रैम अर मनिश्शे आद-लुआद हणीं

खास्सी हज़ारो-लाखों साबै,

तिंयां हणैं इहै बलबान कि

तिन्‍नां दरल़ाऊंणै दुशमण आपणैं बर्छ़ै करै इहै,

ज़िहै बणें बल्द आपणैं शींगा करै होरी पशू दरल़ाऊआ।

18 ज़बलून हणअ समुंदरे बाता

बपारा दी खास्सअ सफल अर

इस्साकार रहणअ आपणैं घअरै भेडा-बाकरी

अर साल-फसला करै सेठ।

19 समुंदरे बाढै रेता जैंदरी

ज़ुंण च़िज़ा तिन्‍नां लोल़णी,

तेतो बपार करी हणैं तिंयां

इहै सेठ कि तिन्‍नां शादणैं होरी गोत्रे लोग बी

बिधाते पबित्र ज़ैगा, संघा करनअ

तिन्‍नां बिधाता लै तिहै धर्मीं हूम अर बल़ीदान ज़िहअ बिधाता च़ाहा।

20 तेऊ बिधाते लोल़ी ज़ै-ज़ैकार हुई

ज़ुंण गाद गोत्रे सिअं खास्सी बिरली करा।

तिन्‍नां रहणैं आपणैं दुशमणा लै इहै ताखुई

ज़िहअ सिह होरी पशू तुंबी दी झ़ाफल़ी दैणा लै

च़ैहनूई हआ रहअ द।

21 तिन्‍नैं छ़ांटी सोभी का बधिया ज़ैगा आप्पू लै,

तिन्‍नैं किअ तिहअ ई धर्म पूरअ ज़िहअ बिधाता बोलअ त

अर इज़राईले होरी गोत्रे बी किई तिन्‍नैं मज़त।

22 दान गोत्रे लोग आसा ज़ुआन सिहा ज़िहै,

तिन्‍नैं दैनअ आपणीं जुहल़ी का

बाशान मुल्खा लै त्रुपल़अ

संघा दैनी आपणैं दुशमणा लै झ़ाफल़ी।

23 नप्ताली गोत्रै किअ बिधाता खुश,

बिधाता दैनी तिन्‍नां लै बर्गत

तिन्‍नें सिअं लागी पछ़मा बाखा

गलील समुंदरा पोर्ही दखण तैणीं।

24 मेरी आसा बिधाता का एही अरज़ कि

सह आशेर गोत्रा इज़राईले

सोभी गोत्रा का खास्सी बर्गत दैए

तिन्‍नें ज़ैगा लोल़ी खास्सै जैतूने डाल़-बूट हुऐ

ताकि तिन्‍नां का खास्सअ जैतूनो तेल होए।

25 तिन्‍नें नगरी फेरे गहल़ अर

प्रऊल़ी हणीं खास्सी उछ़टी अर

तेथ हणीं लोहै अर कांस्से

आगल़ी लागी दी।

हुंह च़ाहा इहअ कि तिंयां लोल़ी

बलबान हुऐ अर सारी अमरा राज्ज़ी-राम्बल़ै रहै।

26 इज़राईलीओ, ज़िहअ थारअ परमेशर बिधाता आसा,

तिहअ निं होर कोहै आथी।

ज़ुंण बादल़े रथा दी शुंआर हई

थारी मज़त अर फाज़त करदअ एछा।

27 सह आसा अमर परमेशर

ज़ुंण तम्हां लै शरण दैआ,

ज़ुंण तम्हां सदा आपणीं महान बाहा करै डाहा सभाल़ी।

सह हेरा तम्हां का आजी थारै दुशमणा दरल़ाऊई,

तेखअ छ़ाडा तम्हां सह तिन्‍नां खतम करदै।

28 तम्हैं याकबे आद-लुआद ज़िधी बस्सणै*,

तिधी रहणैं तम्हैं निहंचै, तम्हैं निं तिधी कोही तंग करनै,

तेऊ देशै हणीं तम्हां इज़राईली लै खाणां-पिणां लै बतेर्ही पज़ैआ

अर ज़ेभै च़ाहे तेभै हणअ सरग।

29 इज़राईलीओ, बिधाता आसा तम्हां लै खुश,

तम्हां ज़िहै निं संसारै होर कोहै लोग आथी ई,

ज़ुंण बिधाता मिसर देशे गलामी का आणै बच़ाऊई।

बिधाता आसा थारी फाज़त करनै आल़ी ढाल

अर थारै दुशमणा मारना लै तलबारा ज़िहअ।

थारै दुशमण पल़णै थारै च़रणैं कि

तम्हैं तिन्‍नां छ़ाडे, पर तम्हां झेचणैं तिंयां कैल़ै* का।"