1 मोसा शादै इज़राईली टोलीए सोभै सैणैं आप्पू सेटा संघा बोलअ इज़राईली लै इहअ, "बिधाते इना बधाना अर बिधी मनै तम्हैं सोभै इज़राईली इहै ई, ज़िहअ हुंह तम्हां का आझ़ खोज़ा। 2-4 ऐबै आसा तम्हैं तैहा ज़ैगा पुजणैं आल़ै ज़ुंण तम्हां लै थारै परमेशर बिधाता दैणीं। अह आसा सह परमेशर ज़हा थारै दाद-बाब मना तै, तेऊ आसा तिन्‍नां का एते करार किई दी कि अह रज़दी-पज़दी ज़ैगा ज़ुंण दुधा मखीरे गाडा बगणैं ज़ेही आसा, अह दैणीं तेऊ तम्हां लै।✝

"ज़ांऊं तम्हैं जरदण नदी पार डेओए, तम्हैं लऐ एबल धारा डेऊई। तिधी करै तम्हैं बडै-बडै पात्थर खल़ै, तेखअ लाऐ तेता दी च़ुन्‍नअ, संघा डाहै तेथ बिधाते इना बधाना लिखी।

5 "तैहा ई ज़ैगा बणाऐं तम्हैं एक बेदी बी ज़ेथ तम्हैं आपणैं परमेशर बिधाता लै बल़ीदान करी सके। पर तेथ निं इहै पात्थर लाई ज़ेता बणाणां लै लोहेओ चाण होए लाअ द।✝ 6 तम्हैं भाल़ै तेता लै इहै पात्थर ज़ुंण फाल़ी करै नांईं होए बणाऐं दै। तेखअ करै तेथ आपणैं बिधाता लै हूम बल़ी। सह बल़ी लोल़ी तम्हैं पठी बेदी दी दहई। 7 तेता बाद करै तम्हैं बिधाता का बर्गत मांगणा लै मेल़-ज़ोल़े बल़ी, संघा मनाऊंऐं तेतो भोज़ खाई सोभै बिधातो अदर करी खुशी।

8 "पर बिधाते इना बधाना निं तम्हैं तिन्‍नां पात्थरा दी लिखणअ बिस्सरी पाई अर सह लिखअ द लोल़ी पहल़णा लै सान हुअ।"

9 मोसा शादै लेबी गोत्रे सोभै प्रोहत आप्पू सेटा लै संघा बोलअ इज़राईली लै इहअ, "इज़राईलीओ, हाल्‍लअ निं पाआ, मेरी गल्‍ला दी दैआ धैन! आझ़ हुऐ तम्हैं आपणैं परमेशर बिधाते खास परज़ा, 10 ज़िहअ बिधाता बोले, तम्हैं करै तिहअ ई अर ज़ुंण बधान अर बिधी हुंह आझ़ तम्हां का खोज़दअ आसा लागअ द तेता बी निं बिस्सरी।"

11 तैहा ई धैल़ी किअ मोसा सोभी लोगा लै इहअ हुकम, 12,13 "ज़ांऊं तम्हैं जरदण नदी टपी पार बाखा डेऊई जाए, तम्हैं बांढिऐ गरज़ीम अर एबल धारा दूई बाखा। शमौन, लेबी, यहूदा, इस्साकार, एप्रैम, मनिश्शे अर बिन्यामीन गोत्र डेओऐ गरज़ीम धारा प्रैंदा लै संघा खोज़ै ज़ोरै-ज़ोरै हाक्‍का लाई सोभी इज़राईली का बिधाते बर्गता। रूबेन, गाद, आशेर, ज़बलून, दान अर नप्ताली गोत्र डेओऐ एबल धारा प्रैंदा लै, तिंयां खोज़ै ज़ोरै-ज़ोरै हाक्‍का लाई सोभी इज़राईली का फिटक।✝

14 "लेबी गोत्रे लोग खोज़ै ज़ोरै-ज़ोरै हाक्‍का लाई सोभी इज़राईली लै फिटक, अर बाकी सोभै लोग बोलै हर फिटका बाद ‘एवमस्तू’ मतलब तिन्‍नें आसा ऐहा गल्‍ला लै सैहमती। तम्हैं खोज़ै ज़ोरै-ज़ोरै इहै फिटक,✝

15 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण कारीगीरा का मुहुर्ती बझ़ैल़ा बणाणैं, मुहुर्तीए पूज़ा करा। किल्हैकि बिधाता करा इना एही च़िज़ा का नफरत।✝

16 "‘हाम्हैं करा बिधाता का एही अरज़ तिन्‍नां सोभी मणछा लै लोल़ी फिटक लागअ ज़ुंण आपणैं ईजा-बाबो अदर निं करदै।✝

17 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण सिऊंआं लाऐ दै तिन्‍नां पात्थरे ओडै ओर्ही-पोर्ही सकैऊआ।✝

18 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण कांणै मणछा उंबल़ी बाता छ़ाडा।✝

19 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण गरीब, परदेसी, बिधबा अर छ़ुटै-मुक्‍कै दै लान्हैंओ नसाफ निं दैंदै हणैं।✝

20 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण आपणीं काकी माआ संघै सुत्ता, इहअ मणछ करा आपणैं बाबे बदनामीं।✝

21 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण पशू संघै गुप्त आंगो भोग करा।✝

22 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण आपणीं सक्‍की या काकी बैहणी संघै कंज़रैई करा।✝

23 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण आपणीं शाशुई संघै कंज़रैई करा।✝

24 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण हत्या करा, च़ाऐ तेतो कोहै शाजत बी निं होए।

25 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण कहा का ढब्बै ढाकी कहा नर्दोश मणछे हत्या करे।

26 "‘हाम्हैं करा बिधाता का एही अरज़ तिन्‍नां सोभी मणछा लोल़ी फिटक लागअ ज़ुंण बिधातो बधान नांईं मने।’"✝ एवमस्तू।